Root Downfalls of the Vajra Vehicle—Tibetan

Samaya | Confession | Indian MastersAśvaghoṣa

English | བོད་ཡིག

Aśvaghoṣa

Vajra and bell

Further Information:

༄༅། །རྡོ་རྗེ་ཐེག་པ་རྩ་བའི་ལྟུང་བ།

རྒྱ་གར་སྐད་དུ། བཛྲ་ཡཱ་ན་མཱུ་ལ་པཏྟི།

བོད་སྐད་དུ། རྡོ་རྗེ་ཐེག་པ་རྩ་བའི་ལྟུང་བ།

འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །

ཀུན་ནས་དྭང་བས་བླ་མ་ཡི། །

ཞབས་ཀྱི་པདྨར་རབ་བཏུད་དེ། །

རྩ་བའི་ལྟུང་བ་བཅུ་བཞི་ནི། །

རྒྱུད་ལས་གསུངས་པ་བཤད་པར་བྱ། །

གང་ཕྱིར་རྡོ་རྗེ་འཛིན་པ་ཡིས། །

དངོས་གྲུབ་སློབ་དཔོན་རྗེས་འབྲང་གསུངས། །

དེ་བས་དེ་ལ་བརྙས་པ་ནི། །

རྩ་བའི་ལྟུང་བ་དང་པོར་བཤད། །

དང་པོ་ཕོག་པ་མཐོལ་ལོ་བཤགས། །

བདེ་གཤེགས་བཀའ་ལས་འདས་པ་ནི། །

ལྟུང་བ་གཉིས་པ་ཡིན་པར་བཤད། །

གཉིས་པ་ཕོག་པ་མཐོལ་ལོ་བཤགས། །

རྡོ་རྗེའི་སྤུན་ལ་ཁྲོས་ནས་ནི། །

ཉེས་པར་བརྗོད་པ་གསུམ་པ་ཡིན། །

གསུམ་པ་ཕོག་པ་མཐོལ་ལོ་བཤགས། །

སེམས་ཅན་རྣམས་ལ་བྱམས་པ་སྤངས། །

བཞི་པ་ཡིན་པར་རྒྱལ་བས་གསུངས། །

བཞི་པ་ཕོག་པ་མཐོལ་ལོ་བཤགས། །

ཆོས་ཀྱི་རྩ་བ་བྱང་ཆུབ་སེམས། །

དེ་སྤོང་བ་ནི་ལྔ་པ་ཡིན། །

ལྔ་པ་ཕོག་པ་མཐོལ་ལོ་བཤགས། །

རང་ངམ་གཞན་གྱི་གྲུབ་པའི་མཐའ། །

ཆོས་ལ་སྨོད་པ་དྲུག་པ་ཡིན། །

དྲུག་པ་ཕོག་པ་མཐོལ་ལོ་བཤགས། །

ཡོངས་སུ་མ་སྨིན་སེམས་ཅན་ལ། །

གསང་བ་སྒྲོགས་པ་བདུན་པ་ཡིན། །

བདུན་པ་ཕོག་པ་མཐོལ་ལོ་བཤགས། །

ཕུང་པོ་སངས་རྒྱས་ལྔའི་བདག་ཉིད། །

དེ་ལ་སྨོད་པ་བརྒྱད་པ་ཡིན། །

བརྒྱད་པ་ཕོག་པ་མཐོལ་ལོ་བཤགས། །

རང་བཞིན་དག་པའི་ཆོས་རྣམས་ལ། །

སོམ་ཉི་ཟ་བ་དགུ་པ་ཡིན། །

དགུ་པ་ཕོག་པ་མཐོལ་ལོ་བཤགས། །

གདུག་ལ་རྟག་ཏུ་བྱམས་ལྡན་པ། །

བྱེད་པ་དེ་ནི་བཅུ་པར་འདོད། །

བཅུ་པ་ཕོག་པ་མཐོལ་ལོ་བཤགས། །

མིང་སོགས་བྲལ་བའི་ཆོས་རྣམས་ལ། །

དེར་རྟོག་པ་ནི་བཅུ་གཅིག་པ། །

བཅུ་གཅིག་ཕོག་པ་མཐོལ་ལོ་བཤགས། །

སེམས་ཅན་དད་དང་ལྡན་པ་ལ། །

སེམས་སུན་འབྱིན་པ་བཅུ་གཉིས་པ། །

བཅུ་གཉིས་ཕོག་པ་མཐོལ་ལོ་བཤགས། །

དམ་ཚིག་རྫས་ནི་ཇི་བཞིན་ཉིད། །

མི་བསྟེན་པ་དེ་བཅུ་གསུམ་པ། །

བཅུ་གསུམ་ཕོག་པ་མཐོལ་ལོ་བཤགས། །

ཤེས་རབ་རང་བཞིན་བུད་མེད་ལ། །

སྨོད་པར་བྱེད་པ་བཅུ་བཞི་པ། །

བཅུ་བཞི་ཕོག་པ་མཐོལ་ལོ་བཤགས། །

སྔགས་པས་འདི་དག་སྤངས་ནས་ནི། །

དངོས་གྲུབ་ངེས་པར་ཐོབ་པར་འགྱུར། །

གཞན་དུ་དམ་ཚིག་ལས་ཉམས་ན། །

ཉམས་པ་བདུད་ཀྱིས་གཟུང་བར་འགྱུར། །

དེ་ནས་སྡུག་བསྔལ་མྱོང་འགྱུར་ཞིང༌། །

ཐུར་དུ་བལྟས་ཏེ་དམྱལ་བར་འགྲོ། །

དེ་བས་ང་རྒྱལ་བཅོམ་ནས་ནི། །

བདག་ཉིད་མ་འཁྲུལ་ཤེས་པར་བྱ། །

མཉམ་པར་བཞག་པས་བླ་མ་ལ། །

ཅི་འབྱོར་པ་ཡིས་མཆོད་བྱས་ནས། །

གསུམ་ལ་སྐྱབས་འགྲོ་ནས་བརྩམས་ཏེ། །

བྱང་ཆུབ་སེམས་སོགས་སྡོམ་པ་ནི། །

གལ་ཏེ་བདག་ལ་ཕན་འདོད་ན། །

སྔགས་པས་འབད་དེ་གཟུང་བར་བྱ། །

རྡོ་རྗེ་ཐེག་པའི་རྩ་བའི་ལྟུང་བ་སློབ་དཔོན་ཆེན་པོ་རྟ་དབྱངས་ཀྱིས་མཛད་པ་རྫོགས་སོ།། །།

 

• Download this text: EPUB MOBI PDF