Excellent Path of Supreme Great Bliss—Tibetan

Practices › Calling the Guru from Afar | བོད་ཀྱི་བླ་མ།བྱ་བྲལ་སངས་རྒྱས་རྡོ་རྗེ།

English | བོད་ཡིག

བྱ་བྲལ་སངས་རྒྱས་རྡོ་རྗེ།

Chatral Rinpoche, Sangye Dorje

Further information:
Download this text:

༄༅། །བླ་མ་རྒྱང་འབོད་གསོལ་འདེབས་བདེ་ཆེན་མཆོག་གི་ལམ་བཟང་ཞེས་བྱ་བ་བཞུགས་སོ།།

 

ན་མོ་གུ་རུ་བྷྱ།

རྒྱུ་འབྲས་ཐེག་པ་ཀུན་ནས་བླ་མ་ནི། །
སངས་རྒྱས་སྤྲུལ་པར་གསུངས་ཕྱིར་དེར་མོས་པས། །
གང་ཞིག་གསོལ་བཏབ་བྱིན་རླབས་བསླུ་མེད་དུ། །
འབྱུང་མོད་གཙོ་བོར་མོས་གུས་ཉིད་ལ་རག །
ཐེ་ཚོམ་ངང་ནས་ཁ་ཙམ་རྒྱང་འབོད་ཀྱིས། །
བྱིན་རླབས་དངོས་གྲུབ་ཉེ་རྒྱུར་ག་ལ་འགྱུར། །
བློ་གཏད་ལིང་བསྐྱུར་ཕུར་ཚུགས་གསོལ་འདེབས་དང་། །
བླ་མ་རྒྱང་འབོད་འདི་ལྟར་བྱ་བ་གཅེས། །

བླ་མ་མཁྱེན།

ཞེས་ལན་གསུམ་བོས་ནས་ཐུགས་རྗེ་ལྷོངས་པར་བྱས་ལ།

ངོ་བོ་ཆོས་སྐུ་ཀུན་ཁྱབ་ནམ་མཁའ་ཡི་ངང་ནས། །

རང་བཞིན་ལོངས་སྐུ་འགག་མེད་ཉི་འོད་ལྟར་གསལ་ཞིང་། །

ཐུགས་རྗེ་སྤྲུལ་སྐུ་འཇའ་ཚོན་ལྟ་བུ་རུ་བཞེངས་པའི། །

སྐུ་གསུམ་དབྱེར་མེད་དགོངས་པ་སྙིང་དབུས་སུ་སད་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

མཐའ་བརྒྱད་སྤྲོས་བྲལ་རྫོགས་ཆེན་ཡེ་གཞིའི་དོན་རྟོགས་ཤིང་། །

ལྟ་སྒོམ་ཤུབས་ནས་དོན་པའི་གསེང་ལམ་གྱི་སྦུབས་ནས། །

བྱ་རྩོལ་ཞེ་འདོད་ཟད་པའི་འབྲས་བུ་ལ་སྦྱོར་བའི། །

གཞི་འབྲས་དབྱེར་མེད་གདོད་མའི་ཆོས་སྐུ་རུ་གྲོལ་བར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

བརྒྱ་ལ་ལན་གཅིག་རྙེེད་པའི་དལ་འབྱོར་གྱི་རྟེན་བཟང་། །

དོན་མེད་སྟོང་ཟད་མ་གཏོང་སྐྱེ་འཆི་དང་བར་དོའི། །

གདམས་ཟབ་རང་བྱན་ཆུད་པའི་སྐྱེལ་མ་དང་འགྲོགས་ནས། །

སྐུ་གསུམ་རང་རྩལ་རྫོགས་པའི་རྟོགས་ཚད་དང་ལྡན་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

ཕྱི་ནང་སྣོད་བཅུད་སྐད་ཅིག་མི་རྟག་པའི་མཚང་རིག །

ཡེ་ནས་མ་བྱུང་མ་སྐྱེས་འཕོ་འགྱུར་དང་བྲལ་བའི། །

བདེ་ཆེན་འདུས་མ་བྱས་ཤིང་ལྷུན་གྲུབ་ཀྱི་ས་ལ། །

མ་འབད་བཞིན་དུ་སྐད་ཅིག་ད་ལྟ་རང་ཕྱིན་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

འཇིགས་རུང་འཁོར་བའི་གཡང་ས་ཡ་ང་འདི་སྐྱོབ་པའི། །

དམ་ཆོས་ཐེག་དགུའི་རྩེ་རྒྱལ་ཨ་ཏི་དང་ཡང་ཏིའི། །

སྨིན་གྲོལ་བདུད་རྩིའི་བཅུད་རོལ་དགའ་སྟོན་གྱི་ངང་ནས། །

འཁོར་བའི་འདམ་ནང་བྱིངས་ལས་ད་ལྟ་རང་ཐར་བར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

འཁོར་བའི་འཁྲུལ་འཁོར་དཀར་ནག་བདེ་སྡུག་གི་རྩ་བ། །

ལྷན་སྐྱེས་ཀུན་བརྟག་མ་རིག་ས་བོན་ལ་ཐུག་ཕྱིར། །

བདག་མེད་ཤེས་རབ་རང་བྱུང་རིག་པ་ཡི་སྒྲོན་མེས། །

གཏི་མུག་སྙིང་གི་མུན་པ་རང་མལ་དུ་སངས་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

ཡེ་གྲོལ་རིག་པ་དོན་དམ་གནས་ལུགས་ཀྱི་སྐྱབས་ཡུལ། །

མ་ངེས་ཉི་ཚེའི་སྐྱབས་འགྲོས་མཐར་འབྲས་ནི་མི་ཐོབ། །

བསྐྱབ་བྱ་སྐྱོབ་བྱེད་སྐྱབས་འགྲོ་འཁོར་གསུམ་དང་བྲལ་བའི། །

ཡོངས་གྲུབ་སེམས་ཀྱི་རྡོ་རྗེ་སྐྱབས་མཆོག་ཏུ་རྟོགས་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

བདག་གཞན་འཁོར་འདས་རེ་དོགས་འཇུར་བུ་ཡིས་བཅིངས་པའི། །

ཡིད་སྨོན་འདུ་བྱེད་སེམས་བསྐྱེད་བཟང་ཞེན་ལས་འདས་ཀྱང་། །

མཐའ་བྲལ་དོན་དམ་བྱང་ཆུབ་སེམས་ཉིད་ཀྱི་གཤིས་ལས། །

ནམ་ཡང་འདའ་བ་མེད་པའི་ཐག་ཆོད་ལ་གནས་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

ཐོག་མེད་དུས་རིང་བརྟག་དཀའི་སྒྲིབ་གཉིས་ཀྱི་མུན་སྟུག །

འོད་གསལ་རིག་པ་ཡེ་ཤེས་མདངས་ལྡན་གྱི་ཉི་མས། །

ཉེས་ལྟུང་བག་ཆགས་དྲི་མ་རང་ངོ་རུ་སངས་ནས། །

དྲི་མེད་དུང་མདོག་མགོན་པོ་བདག་ལ་རང་འགྲུབ་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

གནས་ལུགས་རང་ངོ་ཤེས་པའི་ཚོགས་ཆེན་དེ་རྫོགས་ནས། །

ཁྱད་ཆོས་དྲུག་ལྡན་ཀུན་བཟང་དགོངས་ཀློང་དུ་ཕྱམ་གདལ། །

འབད་རྩོལ་སྤྲོས་པ་ཀུན་བྲལ་ཨ་ཏི་ཡི་ཐེག་པས། །

ཆོས་སྐུའི་རྒྱས་སྲིད་ཚེ་འདི་ཉིད་ལ་རང་ཟིན་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

གསོལ་འདེབས་མོས་གུས་དྲག་པོའི་ཉེ་རྒྱུ་ལ་བརྟེན་ནས། །

རིག་སྟོང་དོན་གྱི་བླ་མ་སྙིང་དབུས་སུ་མཇལ་ཏེ། །

སེམས་ལ་རིག་པ་རྩལ་གྱི་དབང་ཆེན་དེ་ཐོབ་ཕྱིར། །

མཚོན་བྱ་དོན་གྱི་དགོངས་བརྒྱུད་ད་ལྟ་རང་འཕོ་བར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

བསགས་སྦྱོང་རང་སར་དག་ཀྱང་བསོད་ནམས་ཚོགས་མི་གཅོག །

བདག་གཞན་གཉིས་སུ་མེད་ཀྱང་སེམས་བསྐྱེད་རྒྱུན་མི་བཅད། །

རང་སེམས་བླ་མར་ཤེས་ཀྱང་མོས་གུས་ལ་རྟག་འབུང་། །

ལྷ་སྐུ་ལོགས་ན་མེད་ཀྱང་རིམ་གཉིས་ལ་བརྩོན་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

མདོར་ན་དབེན་པའི་རི་ཁྲོད་བྲག་ཕུག་དང་སྤྱིལ་བུར། །

གཅིག་ཤེས་ཀུན་གྲོལ་མ་བསྒོམ་སངས་རྒྱས་ལམ་ཉིད་ལས། །

དགོས་མེད་བྱ་བཏང་རྒྱལ་པོའི་བརྟུལ་ཞུགས་དང་འགྲོགས་ཏེ། །

འཁོར་འདས་བར་ལག་འགྱེལ་ནུས་དེ་ཁོ་ན་འབྱུང་བར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

རང་དོན་ཆོས་སྐུ་སྐྱེ་མེད་སྤྲོས་བྲལ་གྱི་དབྱིངས་ནས། །

འགག་མེད་གཟུགས་སྐུ་གཞན་དོན་ཕྲིན་ལས་དང་བཅས་པ། །

མངོན་གྱུར་སྲས་བཅས་རྒྱལ་བའི་ཤུལ་ལམ་དེ་སྙོགས་ནས། །

ཁམས་གསུམ་འཁོར་བ་དོང་སྤྲུགས་སྨོན་པ་བཞིན་འགྲུབ་པར། །

སངས་རྒྱས་ངོ་བོ་རྡོ་རྗེའི་བླ་མ་ཁྱེད་མཁྱེན་ནོ། །

 

ཞེས་པའང་སྙིང་པོའི་རྣལ་འབྱོར་ལ་མོས་པ་ཅན་ཉག་བླ་ཨ་འབའ་ནས་སྲིད་ན་རིང་བའི་ལྷ་རྫས་རེག་བྱ་དང་ནཻ་པཱ་ལའི་སྒོར་བརྒྱ་རྩའི་མཎྜལ་བཅས་དངོས་དང་ཡི་གེའི་ལམ་ནས་བསྐུལ་ངོ་མ་ལྡོག་པར་དུས་ཞབས་ཀྱི་བྱ་བྲལ་བ་སངས་རྒྱས་རྡོ་རྗེས་ཤིང་གླང་ཟླ་ ༨ ཚེས་ ༡༥ དགེ་བར་སྦས་ཡུལ་ཡོལ་མོ་གངས་རིའི་ནགས་འདབས་སུ་སྦྱར་བ་དགེའོ།། །། སརྦ་མངྒ་ལཾ།།

 

This website uses cookies to collect anonymous usage statistics and enhance the user experience.
Decline
Accept