Aspirations in Accordance with the Dharma—Tibetan

Aspiration Prayers | Tibetan Mastersརྡོ་གྲུབ་ཆེན་འཇིགས་མེད་བསྟན་པའི་ཉི་མ།

English | Deutsch | Español | Français | བོད་ཡིག

རྡོ་གྲུབ་ཆེན་འཇིགས་མེད་བསྟན་པའི་ཉི་མ།

The Third Dodrupchen

Further Information:

༄༅། །སྨོན་ལམ་ཆོས་ལ་བཏབ་པ།

སྐྱིད་ན་བསྙེན་བཀུར་བྱ་བའི་ཞིང་། །

སྡུག་ན་ཡུས་ཀྱིས་འབོད་པའི་ཡུལ། །

ཚེ་འདིའི་རེ་ས་ཕྱི་མའི་སྐྱབས། །

པདྨ་འབྱུང་གནས་སྤྱན་རས་གཟིགས། །

དྲིན་ཆེན་རྩ་བའི་བླ་མ་གསུམ། །

མཚན་དང་རྣམ་འགྱུར་ཐ་དད་ཀྱང་། །

དགོངས་ཀློང་མཛད་པ་དབྱེར་མེད་ཕྱིར། །

སོ་སོར་མི་འཛིན་གཅིག་ཏུ་བསྡུ། །

གསོལ་བ་འདེབས་སོ་ཐུགས་རྗེས་ཟུངས། །

དུས་རྣམ་ཀུན་ཏུ་བྱིན་གྱིས་རློབས། །

དལ་འབྱོར་མི་ལུས་ཐོབ་དུས་སུ། །

སྙིང་པོའི་ལྷ་ཆོས་འགྲུབ་པར་ཤོག །

ཚེ་ཐུང་དགུན་ཉི་འདྲ་བ་འདི། །

དོན་ལྡན་ཆོས་ལ་འདྲིལ་བར་ཤོག །

གདོང་ཐུག་འཆི་བ་བྱུང་ཙ་ན། །

ཆོས་ཀྱི་ར་མདའ་སླེབ་པར་ཤོག །

ཐག་རིང་ཕྱི་མར་འགྲོ་བའི་ཚེ། །

ཆོས་ཀྱི་ལམ་རྒྱགས་མང་བར་ཤོག །

ཚེ་འདིར་ཆོས་ཀྱི་ས་བོན་ཐེབ། །

ཕྱི་མ་ལོ་ཐོག་ལེགས་པར་ཤོག །

གར་སྐྱེས་གང་དུ་སོང་ན་ཡང་། །

ཆོས་ཀྱི་བག་ཆགས་སད་པར་ཤོག །

སྐྱིད་སྡུག་ལེགས་ཉེས་ཅི་བྱུང་ཡང་། །

བློ་གཏད་ཆོས་ལ་བྱེད་པར་ཤོག །

ཆོས་ཀྱི་འཇུག་སྒོ་མ་ནོར་བ། །

དད་པའི་རྩ་བ་བརྟན་པར་ཤོག །

ཆོས་ཀྱི་གཞི་མ་མ་འཆུགས་པ། །

མི་འཚེའི་བརྟུལ་ཞུགས་བརླིང་བར་ཤོག །

ཆོས་ཀྱི་སྲོག་ཤིང་མ་ཡོ་བ། །

བདེན་པའི་གཞུང་ལམ་སྲོང་བར་ཤོག །

ཆོས་ཀྱི་ཉིང་ཁུ་མ་བསླད་པ། །

བྱང་ཆུབ་སེམས་གཉིས་འབྱོངས་པར་ཤོག །

དམ་ཆོས་རྒྱལ་པོ་ཡི་གེ་དྲུག །

གཡེལ་མེད་བཟླས་སྒོམ་བྱེད་པར་ཤོག །

ཆོས་བཞིན་སྒྲུབ་ལ་བར་ཆད་མེད། །

མཐུན་རྐྱེན་ཡིད་བཞིན་འཛོམ་པར་ཤོག །

བླ་མ་ལྷ་ལ་དཔང་བཅོལ་ནས། །

སྨོན་ལམ་ཆོས་ལ་བཏབ་པ་འདི། །

བཏབ་སར་ཐེབས་ཤིན་ཕྱིར་མི་ལྡོག །

ཆུད་ཟོས་མེད་པར་འགྲུབ་པར་ཤོག །

དད་ལྡན་དགྲ་བླ་འཕན་དར་གྱི་ངོར་བསྟན་ཉིས་བྲིས།། །།

 

• Download this text: EPUB MOBI PDF