Short Prayer to Abbot, Master and King—Tibetan
Practices › Prayers › Guru Rinpoche Prayers | Deities › Guru Padmasambhava | Schools & Systems › Nyingma | བོད་ཀྱི་བླ་མ། › བདུད་འཇོམས་རིན་པོ་ཆེ།
Guru Padmasambhava
Courtesy of Himalayan Art Resources
Further information:
༄༅། །མཁན་སློབ་ཆོས་གསུམ་གྱི་གསོལ་འདེབས་བསྡུས་པ།
རྒྱལ་ཀུན་རིགས་ཀྱི་ཅོད་པན་གསུང་རྡོ་རྗེ། །
རང་བྱུང་སྤྲུལ་སྐུ་སྔགས་ཀྱི་སློབ་དཔོན་ཚུལ། །
བོད་ཁམས་སྐྱོབ་པའི་གཉེན་གཅིག་བཀའ་དྲིན་ཅན། །
ཨོ་རྒྱན་སངས་རྒྱས་གཉིས་པ་ལ་གསོལ་བ་འདེབས། །
རྒྱལ་ཀུན་གསང་བ་འཛིན་པའི་དབང་ཕྱུག་གང་། །
སྟོན་པའི་རྒྱལ་ཚབ་སྡོམ་བརྩོན་བཤེས་གཉེན་ཚུལ། །
བསིལ་ལྡན་ཐོག་མའི་མཆོད་གནས་བཀའ་དྲིན་ཅན། །
མཁན་ཆེན་བོ་དྷི་སཏྭ་ལ་གསོལ་བ་འདེབས། །
རྒྱལ་ཀུན་མཁྱེན་རབ་ཡེ་ཤེས་འཇམ་དཔལ་དབྱངས། །
ཞིང་འདིར་བསམ་བཞིན་ཆོས་སྐྱོང་རྒྱལ་པོའི་ཚུལ། །
གངས་ཅན་བསྟན་པའི་ཤིང་རྟ་བཀའ་དྲིན་ཅན། །
མངའ་བདག་ཁྲི་སྲོང་ལྡེའུ་བཙན་ལ་གསོལ་བ་འདེབས། །
རྩེ་གཅིག་སྙིང་ནས་རྗེས་དྲན་བདག་སོགས་རྣམས། །
ཚོགས་གཉིས་ཡོན་ཏན་མཛོད་ལ་དབང་འབྱོར་ཞིང་། །
རྣམ་གསུམ་རིང་ལུགས་དྲི་མེད་སྔ་འགྱུར་སྲོལ། །
གླིང་བཞིའི་ཁྱོན་ཀུན་རྟག་ཁྱབ་འཕེལ་རྒྱས་ཤོག །
ཅེས་པའང་རིགས་ཀྱི་བུ་ཕྲིན་ལས་ནོར་བུས་དོན་དུ་གཉེར་བའི་ངོར། འཇིགས་བྲལ་ཡེ་ཤེས་རྡོ་རྗེས་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དུ་བྲིས་པ་ཡོངས་སུ་དགེའོ།།
