Final Words—Tibetan

༄༅། །སྐུ་འདའ་ཁའི་གསུང་བཞུགས་སོ།།

ཨོཾ། དམིགས་མེད་སྟོང་ཆེན་དབྱིངས་རུམ་ལས་འཕོས་པའི། །

ལྷུན་གྲུབ་རང་སྣང་མཚན་དཔེའི་ལང་ཚོ་འབར། །

གང་འདུལ་མོས་ངོར་ཆུ་ཟླའི་རོལ་གར་བཞིན། །

མཁའ་སྤྱོད་རྡོ་རྗེ་བཙུན་མོ་འཁོར་བཅས་བྱོན། །

དངོས་འབྱོར་ཡིད་སྤྲུལ་བློ་ཡིས་ཉེར་བླངས་ནས། །

དམ་རྫས་སྤྱན་གཟིགས་མཆོད་གཏོར་གསེར་སྐྱེམས་བཅས། །

སྔགས་དང་ཏིང་འཛིན་བདེན་གཉིས་ནུས་སྟོབས་ཀྱིས། །

བར་སྣང་གནམ་སའི་ཁོར་ཡུག་བཀང་སྟེ་འབུལ། །

ཁྲག་འཐུང་དབང་པོ་དགྱེས་སྐྱེད་གསང་བའི་ཡུམ། །

གནས་གསུམ་དཔའ་བོ་མཁའ་འགྲོའི་གཙུག་གི་རྒྱན། །

སྐལ་བཟང་མཁའ་སྤྱོད་ཞིང་དུ་འཁྲིད་པའི་གཉེན། །

སྐྱབས་གཅིག་རྡོ་རྗེ་རྣལ་འབྱོར་མ་ལ་བསྟོད། །

མི་བཟད་སྙིགས་མའི་དུས་འདིར་མ་ཁྱོད་ཀྱི། །

བྱིན་རླབས་དབྱར་མཚོ་ལྟར་འཕེལ་གྲགས་སྙན་ལ། །

སེམས་ཅན་རེ་ལྟོས་འཆའ་ཞིང་གསོལ་འདེབས་ན། །

མཁའ་འགྲོའི་གྲལ་མཇུག་ཟིན་པའི་སྐལ་བཟང་སྩོལ། །