Vajrakīla Tantra Fragment Recitation Manual—Tibetan

Vajrakīla | Sādhanas | Tibetan Mastersའཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

Vajrakīla

Further Information:
Download this text:

༄༅། །ཕུར་པ་རྩ་དུམ་རྒྱུད་ཀྱི་བཀླགས་ཐབས་ཕྲིན་ལས་མཆོག་གྲུབ་ཅེས་བྱ་བ་བཞུགས་སོ། །

 

ན་མོ་ཤྲཱི་བཛྲ་ཀུ་མཱ་ར་ཡེ།

ཕུར་པའི་རྒྱུད་ཀྱི་རྒྱལ་པོ་རྩ་དུམ་བཀླག་པར་འདོད་པས་སྔོན་འགྲོ་སྐྱབས་སེམས་ནི།

བླ་མ་དཔལ་ཆེན་ཞི་ཁྲོའི་ལྷ། །

མཁའ་འགྲོའི་ཚོགས་ལ་སྐྱབས་སུ་མཆི། །

གཞན་དོན་བྱང་ཆུབ་མྱུར་ཐོབ་ཕྱིར། །

རྒྱུད་ཀྱི་རྒྱལ་པོ་བཀླག་པར་བགྱི། །

ལན་གསུམ།

དངོས་གཞི་ནི།

ཨཿ རྡོ་རྗེ་སྟོང་པ་ཉིད་ཀྱི་དབྱིངས། །

སྙིང་རྗེ་སྒྱུ་མ་རང་ཤར་བའི། །

རིག་པ་མཚོན་ཆེན་ཧཱུྃ་མཐིང་ནག །

ཡོངས་གྱུར་པད་ཉི་ལྷ་ཆེན་སྟེང༌། །

རྡོ་རྗེ་གཞོན་ནུ་ནམ་མཁའི་མདོག །

མཐིང་དཀར་དམར་བའི་ཞལ་གསུམ་པ། །

གཡས་གཉིས་རྩེ་དགུ་རྩེ་ལྔ་དང༌། །

གཡོན་གཉིས་མེ་དཔུང་ཁ་ཊྭཱྃ་བསྣམས། །

ཐ་མས་རི་རབ་ཕུར་བུ་འདྲིལ། །

དཔལ་དང་དུར་ཁྲོད་ཆས་ཀྱིས་བརྒྱན། །

ཡུམ་ཆེན་འཁོར་ལོ་རྒྱས་འདེབས་མ། །

ཨུཏྤལ་དུང་ཁྲག་བསྣམས་པས་འཁྱུད། །

ཡེ་ཤེས་མེ་དཔུང་ཀློང་ན་བཞུགས། །

 

ཐུགས་ཀར་འོད་ཀྱི་གུར་ཁྱིམ་དུ། །

རྡོ་རྗེ་སེམས་དཔའ་ཚོན་གང་བ། །

དེ་ཡི་ཐུགས་ཀར་པད་ཉིའི་སྟེང༌། །

ཧཱུྃ་སྔོན་རྟག་ཏུ་འཆར་བ་གསལ། །

དམ་ཚིག་ཡེ་ཤེས་གཉིས་སུ་མེད། །

དབང་བསྐུར་གདོད་ནས་རང་ཆས་རྫོགས། །

 

ཐུགས་སྲོག་ཧཱུྃ་ལས་རྒྱུད་ཀྱི་སྒྲ། །

ཆོས་དབྱིངས་ཁྱབ་པར་འཕྲོས་པ་ཡིས། །

རྩ་གསུམ་རྒྱལ་བ་རབ་འབྱམས་མཆོད། །

རིགས་དྲུག་བརྟན་གཡོའི་བག་ཆགས་སྦྱོངས། །

ཐམས་ཅད་དག་པ་ཡི་དམ་སྐུ། །

སྒྲ་གྲགས་རྡོ་རྗེའི་རྒྱུད་ཀྱི་སྒྲ། །

རང་རིག་སྐྱེ་མེད་གཅིག་ཏུ་རྫོགས། །

དག་པ་རབ་འབྱམས་ངང་ནས་བཀླག །

ཨོཾ་བཛྲ་ཛི་ཧཱ།

ལན་གསུམ་གྱིས་ལྕེ་རྡོ་རྗེར་བྱིན་གྱིས་བརླབས་ནས་རྒྱུད་ཀྱི་རྒྱལ་པོ་བཀླགས་པའི་མཐར་རྩ་སྔགས་ཅི་ནུས་བཟླ། དབྱངས་གསལ་ཡེ་དྷར་ཡིག་བརྒྱ་ལན་གསུམ་རེས་བྱིན་བརླབ་བརྟན་པར་བྱས་མཐར།

 

ཁམས་གསུམ་སེམས་ཅན་ཐམས་ཅད་ཀུན། །

རྡོ་རྗེའི་རྒྱུད་ཀྱི་སྒྲ་བསྒྲགས་པས། །

འཁྲུལ་རྟོག་བདུད་བཞི་ཀུན་བཅོམ་ནས། །

སྐྱེ་མེད་ཆོས་སྐུ་མངོན་གྱུར་ཤོག །

 

ལྷ་སྣང་རིག་སྟོང་དབྱིངས་སུ་ཐིམ། །

དབྱིངས་རིག་འབྲལ་མེད་ཕྱག་རྒྱར་ཤར། །

བཛྲ་ཀཱ་ཝཱ་ཙི་རཀྵ་ཧཾ།

ཞེས་གནས་གསུམ་བསྲངས་ཤིང་གོ་བགོ །

 

ཨོཾཿ དབྱིངས་ཀྱི་ངོ་བོ་ཆོས་སྐུ་རྡོ་རྗེ་སེམས། །

རིག་པ་རང་སྣང་བཛྲ་ཀུ་མཱ་ར། །

དབྱིངས་རིག་ཟུང་འཇུག་རྩ་བརྒྱུད་བླ་མ་ཡིས། །

མཆོག་ཐུན་དགེ་ལེགས་འགྲུབ་པའི་བཀྲ་ཤིས་ཤོག །

ཅེས་བརྗོད་པས་ཤིས་པར་བྱའོ། །

 

ཅེས་པའང་རང་སློབ་དད་དམ་མཁྱེན་དཔྱོད་དགེ་བ་མཆོག་ལྡན་ནས་བསྐུལ་ངོར་ཆོས་ཀྱི་བློ་གྲོས་པས་བྲིས་པ་དགེ་ཞིང་བཀྲ་ཤིས་པར་གྱུར་ཅིག། །།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK