Ancillary Practices for Three Guru Yogas—Tibetan
Practices › Guru Yoga | Schools & Systems › Kagyü | བོད་ཀྱི་བླ་མ། › ཇོ་སྐྱབས་པདྨ་འཕྲིན་ལས་སྙིང་པོ། | བོད་ཀྱི་བླ་མ། › མི་ལ་རས་པ། | བོད་ཀྱི་བླ་མ། › མར་པ་ཆོས་ཀྱི་བློ་གྲོས། | བོད་ཀྱི་བླ་མ། › སྒམ་པོ་པ་བསོད་ནམས་རིན་ཆེན།
Marpa, Milarepa & Gampopa
Courtesy of Himalayan Art Resources
༄༅། །རྗེ་བཙུན་མར་མི་དྭགས་གསུམ་གྱི་བླ་མའི་རྣལ་འབྱོར་ཐིག་ལེ་སྐོར་གསུམ་གྱི་སྔོན་རྗེས་ཀྱི་སྤྱི་ཆིངས་རྡོ་རྗེའི་དྲྭ་བ་ཞེས་བྱ་བ།
བླ་མ་ལ་ཕྱག་འཚལ་ལོ།
མཆོག་གསུམ་གྲུབ་ཐོབ་རྒྱ་མཚོ་ལ། །
བྱང་ཆུབ་བར་དུ་སྐྱབས་སུ་མཆི། །
འགྲོ་ཀུན་སངས་རྒྱས་ཐོབ་བྱའི་ཕྱིར། །
བྱང་ཆུབ་མཆོག་ཏུ་སེམས་བསྐྱེད་དོ། །
རང་སྣང་རྣམ་དག་རྒྱལ་བའི་ཞིང་། །
ངོ་མཚར་བཀོད་པ་བསམ་མི་ཁྱབ། །
ཡེ་ཤེས་འོད་ལྔའི་གཞལ་ཡས་ཁང་། །
འདོད་ཡོན་མཆོད་པའི་སྤྲིན་ཕུང་འཁྲིགས། །
རྟོག་མེད་པད་ཉི་རོ་གདན་སྟེང་། །
རང་ལུས་རྡོ་རྗེ་རྣལ་འབྱོར་མ། །
ཆགས་མེད་པདྨ་རཱ་གའི་མདངས། །
ཐབས་ཤེས་དབྱེར་མེད་གྲི་ཐོད་འཛིན། །
ལོངས་སྤྱོད་རྒྱན་རྫོགས་བདེ་དྲོད་འབར། །
མདུན་མཁར་འོད་ལྔ་འཁྲིགས་པའི་དབུས། །
སེངྒེ་གླང་ཆེན་རྟ་དང་ཁྱུང་། །
ནམ་མཁའ་ལྡིང་གི་ཁྲི་ཆེན་ལ། །
ཉི་ཟླ་པདྨ་རིན་པོ་ཆེར། །
འདིར་སོ་སོའི་ལྷ་བསྐྱེད་བཙུད། དེ་ནས།
མངོན་སུམ་ལྟ་བུར་གསལ་བ་ལ། །
སྣང་ལ་རང་བཞིན་མ་གྲུབ་པའི། །
གནས་གསུམ་ཨོཾ་ཨཱཿཧཱུཾ་གིས་མཚན། །
འོད་འཕྲོས་རང་བཞིན་ཞིང་ཁམས་ནས། །
རང་འདྲ་སྤྱན་དྲངས་དབྱེར་མེད་གྱུར།
ཨོཾ། ཁྱབ་བདག་དངོས་པོ་ཀུན་གྱི་རང་བཞིན་ནི། །
གནས་མེད་འགྲོ་འོང་བྲལ་བ་ནམ་མཁའ་བཞིན། །
ཆུ་ཟླ་བཞིན་དུ་གར་དམིགས་དེར་སྣང་བ། །
དཔལ་ལྡན་བླ་མ་གནས་འདིར་སྣང་བར་མཛོད། །
ཨོཾ་བཛྲ་ས་མཱ་ཛཿ
རིན་ཆེན་སེང་ཁྲི་དར་ཟབ་དང་། །
ཉི་ཟླ་པདྨའི་གདན་མཆོག་ལ། །
བདག་གཞན་འགྲོ་བའི་དོན་མཛད་ཕྱིར། །
དཔལ་ལྡན་བླ་མ་བཞུགས་སུ་གསོལ། །
ལུས་ཀྱིས་གུས་པའི་བརྐྱང་ཕྱག་འཚལ། །
ངག་གིས་དད་པའི་བསྟོད་ཕྱག་འཚལ། །
ཡིད་ཀྱིས་བརྩེ་གཅིག་མོས་ཕྱག་འཚལ། །
ཕྱག་འཚལ་དཔལ་ལྡན་བླ་མ་ལའོ། །
བདག་སོགས་སེམས་ཅན་ཐམས་ཅད་ཀུན། །
སྒོ་གསུམ་སྒྲིབ་པ་དག་པར་ཤོག །
སྐུ་གསུམ་སྐུ་ལྔའི་བདག་ཉིད་ཆེ། །
བླ་མའི་སྐུ་ལ་ཕྱག་འཚལ་བསྟོད། །
ཟབ་རྒྱས་ཐེག་དགུའི་ཆོས་ཀྱི་མཛོད། །
བླ་མའི་གསུང་ལ་ཕྱག་འཚལ་བསྟོད། །
ཀུན་མཁྱེན་ཡེ་ཤེས་ལྔ་དང་ལྡན། །
བླ་མའི་ཐུགས་ལ་ཕྱག་འཚལ་བསྟོད། །
བྲལ་སྨིན་དྲུག་བཅུ་རྩ་བཞི་མངའ། །
བླ་མའི་ཡོན་གཏན་ཚོགས་ལ་བསྟོད། །
མཁའ་མཉམ་འཁོར་བ་དོང་ནས་སྤྲུགས། །
བླ་མའི་ཕྲིན་ལས་ཚོགས་ལ་བསྟོད། །
སྟོང་ཁམས་ཕྱི་ཡི་མནྜལ་དང་། །
ཕུང་ཁམས་ནང་གི་མནྜལ་དང་། །
རིགས་ཁམས་གསང་བའི་མནྜལ་རྣམས། །
འབུལ་ལོ་བླ་མ་རྗེ་ལ་འབུལ། །
བཞེས་ནས་བདག་རྒྱུད་བྱིན་གྱིས་རློབས། །
འགྲོ་རྣམས་ཚོགས་ཆེན་རྫོགས་པར་ཤོག །
སྣང་སེམས་འདྲེས་པའི་ཕྱི་མཆོད་དང་། །
གཙང་རྨེ་དག་པའི་ནང་མཆོད་དང་། །
ཟུང་འཇུག་གཉིས་མེད་གསང་མཆོད་རྣམས། །
རྗེ་བཙུན་བླ་མ་རྣམས་ལ་འབུལ། །
བཞེས་ནས་བདག་གཞན་བྱིན་གྱིས་རློབས། །
ཚོགས་གཉིས་བྲེ་ཁ་གང་བར་ཤོག །
བཀྲ་ཤིས་རྫས་རྟགས་རྒྱལ་སྲིད་བདུན། །
བཅུ་དྲུག་ལྷ་མོའི་རོལ་གར་བསྒྱུར། །
འཁོར་འདས་བཀོད་པ་ཅིར་ཡར་སྣང་། །
དཔལ་ལྡན་བླ་མའི་ཚོགས་ལ་འབུལ། །
བཞེས་ནས་སྣང་སྲིད་བྱིན་གྱིས་རློབས། །
ཉམས་རྟོགས་རྩལ་ཁ་རྒྱས་པར་ཤོག །
ཐོག་མེད་དུས་ནས་ད་ལྟའི་བར། །
མ་རིག་དབང་གིས་བསགས་པ་ཡི། །
མི་དགེ་བཅུ་དང་མཚམས་མེད་ལྔ། །
རང་བཞིན་ཁ་ན་མ་ཐོ་དང་། །
སྡོམ་གསུམ་འགལ་ཉམས་འདས་རལ་གྱི། །
བཅས་པའི་ཁ་ན་མ་ཐོ་རྣམས། །
རྗེ་བཙུན་བླ་མའི་སྤྱན་སྔར་བཤགས། །
སྒྲིབ་ཚོགས་མ་ལུས་བྱང་ནས་སུ། །
ས་ལམ་བར་ཆད་མེད་པར་ཤོག །
སོ་སོའི་སྐྱེ་བོས་བསགས་པ་ཡི། །
ཟག་བཅས་དགེ་ལ་རྗེས་ཡི་རངས་། །
འཕགས་པའི་ཚོགས་ཀྱིས་བསགས་པ་ཡི། །
ཟག་མེད་དགེ་ལ་རྗེས་ཡི་རང་། །
དཔལ་ལྡན་བླ་མ་དམ་པ་ཡི། །
རྣམ་ཐར་ཀུན་ལ་རྗེས་ཡི་རང་། །
མ་བྱས་བསགས་པའི་དགེ་བ་དེས། །
ཚོགས་གཉིས་འབད་མེད་ལྷུན་གྱིས་གྲུབ། །
ས་ལམ་མྱུར་དུ་རྫོགས་པར་ཤོག །
གདུལ་བྱའི་སེམས་ཅན་ཐམས་ཅད་ཀྱི། །
རང་རང་དབང་པོ་མཚམས་པ་ཡི། །
ཟབ་རྒྱས་ཆོས་ཀྱི་འཁོར་ལོ་དེ། །
རྒྱུན་ཆད་མེད་པར་བསྐོར་དུ་གསོལ། །
རྨོངས་པའི་དྲྭ་བ་ཀུན་བཅད་དེ། །
ཡེ་ཤེས་སྣང་བ་རྒྱས་པར་ཤོག །
ངོ་བོ་རྟག་པ་ཆོས་ཀྱི་སྐུ། །
རྒྱུན་གྱི་རྟག་པ་ལོངས་སྤྱོད་རྫོགས། །
ཆད་མེད་རྟག་པ་སྤྲུལ་པའི་སྐུ། །
སྐུ་གསུམ་ཚུལ་སྟོན་བླ་མ་རྣམས། །
མྱ་ངན་འདའ་ཚུལ་མི་སྟོན་པར། །
རྟག་བརྟན་འགྱུར་མེད་གཡུང་དྲུང་གི །
ངོ་བོར་དུས་ཀུན་བཞུགས་ནས་སུ། །
གདུལ་བྱར་གྱུར་ཀུན་སངས་རྒྱས་ཀྱི། །
ས་ལ་མྱུར་དུ་འགོད་པར་ཤོག །
བདག་གཞན་འགྲོ་བ་མ་ལུས་པའི། །
ཟག་བཅས་ཟག་མེད་ཟུང་འཇུག་གི །
དུས་གསུམ་དགེ་ཚོགས་ཅི་བསགས་པ། །
འགྲོ་རྣམས་བླ་མ་སངས་རྒྱས་ཀྱི། །
གོ་འཕང་ཐོབ་ཕྱིར་བསྔོ་བར་བྱ། །
བདག་སོགས་ཚེ་རབས་གར་སྐྱེས་ཀྱང་། །
བླ་མ་རྣམས་དང་མི་འབྲལ་ཞིང་། །
གདམས་ཟབ་བདུད་རྩི་ལོངས་སྤྱད་ནས། །
རྗེ་དང་དགོངས་པ་མཉམ་ནས་སུ། །
ཕྲིན་ལས་མཐའ་དག་སྒྲུབ་པར་ཤོག །
ཁྱབ་བདག་བླ་མའི་གནས་བཞིའི་ས་བོན་ལས། །
འོད་འཕྲོས་སྲས་བཅས་རྒྱལ་བའི་བྱིན་རླབས་བསྡུས། །
སླར་ཡང་རང་ཐིམ་དབང་དང་དངོས་གྲུབ་ཐོབ། །
སྒྲིབ་བྲལ་སྐུ་དང་ཡེ་ཤེས་མངོན་དུ་གྱུར། །
ཨོཾ་ཨཱཿཧཱུཾ་སྭཱ་ཧཱ།
ཞེས་སྤྱི་སྔགས་དང་སོ་སོའི་མཚན་སྔགས་ཀྱང་བཟླ།
རྗེ་མར་པ་ཆོས་ཀྱི་བློ་གྲོས་ལ་གསོལ་བ་འདེབས། །
རྗེ་མི་ལ་བཞེད་པ་རྡོ་རྗེ་ལ་གསོལ་བ་འདེབས། །
རྗེ་དྭགས་པོ་ཟླ་འོད་གཞོན་ནུ་ལ་གསོལ་བ་འདེབས།
སྐབས་ཐོབ་སོ་སོར་བརྗོད། སྤྱིར་བཏང་དུ་རྡོ་རྗེ་འཆང་ཐུང་མ་དང་ཀར་མཁྱེན་འདོན། །བླ་མ་རིན་པོ་ཆེ་ལ་གསོལ་བ་འདེབས། སོགས་བརྗོད་དོ། །
བླ་མ་རིན་པོ་ཆེ་ལ་གསོལ་བ་འདེབས། །
བདག་འཛིན་བློ་ཡི་ཐོངས་བར་བྱིན་གྱིས་རློབས། །
དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །
ཆོས་མིན་རྣམ་རྟོག་འགགས་པར་བྱིན་གྱིས་རློབས། །
རང་སེམས་སྐྱེ་མེད་རྟོགས་པར་བྱིན་གྱིས་རློབས། །
འཁྲུལ་པ་རང་སར་ཞི་བར་བྱིན་གྱིས་རློབས། །
སྣང་སྲིད་ཆོས་སྐུར་འཆར་བར་བྱིན་གྱིས་རློབས། །
ཚོགས་ཡོད་ན།
རང་གཞོན་མཛེས་ལང་ཚོ་ལྟ་ན་སྡུག །
ལུས་ཚོ་བསྣུམ་ཆེ་བརྗིད་བཀྲག་མདངས་ལྡན། །
མདུན་རང་བྱུང་ཐོད་སྒྱེད་གསུམ་སྟེང་དུ། །
རང་ཐོད་པ་ཀག་གིས་འཕར་བ་བཙུག །
དེའི་ནང་དུ་རང་ལུས་ལྟེམ་གྱིས་ཞུ། །
སྙིགས་མ་དག་ལྦུ་བའི་ཚུལ་དུ་ལུད། །
ཟེར་རླང་པ་འཁོར་འདས་དྭངས་བཅུད་ཀུན། །
སྔགས་འབྲུ་གསུམ་ཆར་ལྟར་བབས་ནས་ཐིམ། །
རྫས་དཀར་མངར་ཤ་ལྔ་བདུད་རྩི་ལྔ། །
ལྷ་མཆོད་སྒྲུབ་བརྟེན་བསྐང་དགྱེས་པའི་ཚོགས། །
གནས་སྟོང་ཁམས་མ་ལུས་གང་བར་གྱུར། །
སེམས་རྣམ་ཤེས་མཆོད་པའི་ལྷ་མོའི་ཚོགས། །
མདོག་དཀར་སེར་དམར་ལྗང་མཐིང་ནག་ཁྲ། །
གྲངས་ཉི་ཟེར་རྡུལ་ལྟར་འཁྲིགས་པ་དེས། །
གནས་མཆོད་ཡུལ་ཀུན་ལ་སོ་སོར་མཆོད། །
ཕ་བཀའ་བརྒྱུད་གྲུབ་ཐོབ་རྒྱ་མཚོ་དང་། །
ལྷ་རྩ་གསུམ་རབ་འབྱམས་རྒྱ་མཚོ་ལ། །
ཚོགས་ཟག་མེད་བདུད་རྩི་མཆོད་སྤྲིན་འབུལ། །
དབང་བྱིན་རླབས་དངོས་གྲུབ་མ་ལུས་སྩོལ། །
རྐྱེན་བར་ཆད་ལྷག་མེད་དབྱིངས་སུ་ཞི། །
ཚེ་གཅིག་ལ་སངས་རྒྱས་འགྲུབ་པར་མཛོད། །
སྐྱབས་མཆོག་གསུམ་ཀུན་འདུས་བླ་མ་དང་། །
ལྷ་ཡི་དམ་རྒྱུད་སྡེ་བཞི་དྲུག་དང་། །
མ་གནས་གསུམ་མཁའ་འགྲོ་ཆོས་སྐྱོང་དང་། །
ཡུལ་སྣང་སྲིད་ལྷ་འདྲེ་ཆེ་ཕྲ་དང་། །
གནས་འགྲོ་དྲུག་བར་དོའི་ཡིད་ལུས་དང། །
སྔོན་ཚེ་རབས་མང་པོའི་ལན་ཆགས་རྣམས། །
དེ་ཀུན་ཀྱང་བླ་མའི་རོལ་པར་ཤར། །
ད་འཁོར་འདས་རོ་མཉམ་མགྲོན་རིགས་ལ། །
ཐུགས་གང་ལ་གང་བཞེད་དེ་ལ་དེར། །
དུས་གཅིག་ལ་འཆར་བས་ཐུགས་དམ་བསྐང་། །
རྗེ་བླ་མའི་ཐུགས་དང་འགལ་བ་སོགས། །
སྡིག་ཉམས་ཆགས་ཉེས་ལྟུང་དག་པ་དང་། །
རྒྱུ་ཚོགས་གཉིས་རྫོགས་ནས་སྒྲིབ་གཉིས་བྱང་། །
ཉམས་རྟོགས་པའི་རྩལ་ཆེན་མྱུར་དུ་རྫོགས། །
ལམ་ལྔ་བགྲོད་ས་བཅུ་ཐོབ་པ་ལ། །
གེགས་གོལ་ཤོར་ནམ་ཡང་མི་འབྱུང་ཞིང་། །
འབྲས་དོན་གཉིས་ལྷུན་གྲུབ་སྐུ་གཉིས་ཐོབ། །
ཚེ་གཅིག་ལ་མངོན་སངས་རྒྱས་པར་ཤོག །
ཚོགས་ལ་རོལ་ནས།
རྗེ་བླ་མའི་ཕྲིན་ལས་སྤྲུལ་པའི་ཚོགས། །
མགོན་མ་ཧཱ་ཀ་ལ་དུད་སོལ་མ། །
དཔལ་རང་བྱུང་རེ་ཏི་སྤྱང་ཞོན་མ། །
ཞིང་སྐྱོང་བའི་ལྷ་སྨན་ཚེ་རིང་མཆེད། །
མ་མཁའ་འགྲོ་གིང་ལང་ཕོ་ཉའི་ཚོགས། །
གནས་མུ་རན་སྐྱོང་བའི་ལྷག་མགྲོན་ལ། །
ཚོགས་ལྷག་མ་འདོད་ཡོན་མཆོད་པའི་སྤྲིན། །
རྫས་ཟག་མེད་བདུད་རྩི་རྒྱ་མཚོ་ཆེ། །
གཞན་ཤ་རི་ཁྲག་མཚོ་རུས་པའི་གྲམ། །
འདི་བཞེས་ལ་ལས་བཞིའི་ཕྲིན་ལས་སྒྲུབ། །
རྐྱེན་ཕྱི་ནང་བར་ཆད་མི་འབྱུང་ཞིང་། །
སེམས་ཉམས་རྟོགས་འཕེལ་བའི་སྡོང་གྲོགས་མཛོད། །
མདུན་གྱི་བླ་མའི་ལྷ་ཚོགས་རྣམས། །
འོད་དུ་ཞུ་ནས་རང་ལ་ཐིམ། །
ཐུགས་ཡིད་གཅིག་འདྲེས་ངང་ལ་བཞག །
འདི་བྱ་འདི་བྱེད་གཏད་སོ་བྲལ། །
མ་བཅོས་རང་བབས་ཕྱག་རྒྱ་ཆེ། །
བདག་གཞན་འགྲོ་བ་མ་ལུས་པའི། །
ཟག་བཅས་ཟག་མེད་ཟུང་འཇུག་གི །
དུས་གསུམ་དགེ་ཚོགས་ཅི་བསགས་པ། །
འགྲོ་རྣམས་བླ་མ་སངས་རྒྱས་ཀྱི། །
གོ་འཕང་ཐོབ་ཕྱིར་བསྔོ་བར་བྱ། །
བདག་སོགས་ཚེ་རབས་གར་སྐྱེས་ཀྱང་། །
བླ་མ་རྣམས་དང་མི་འབྲལ་ཞིང་། །
གདམས་ཟབ་བདུད་རྩི་ལོངས་སྤྱད་ནས། །
རྗེ་དང་དགོངས་པ་མཉམ་ནས་སུ། །
ཕྲིན་ལས་མཐའ་དག་སྒྲུབ་པར་ཤོག །
སྒྲུབ་བརྒྱུད་ཀརྨ་ཀཾ་ཚང་གི །
བསྟན་པས་ས་ཆེན་ཁྱབ་པ་དང་། །
བསྟན་སྒོར་ཞུགས་པའི་གང་ཟག་རྣམས། །
གྲུབ་པ་ཐོབ་པའི་བཀྲ་ཤིས་ཤོག །
ཅེས་པ་འདིའང་པདྨ་ཕྲིན་ལས་སྙིང་པོའམ་ཀརྨ་ཕྲིན་ལས་རྒྱ་མཚོས་བཀྲ་ཤིས་ཆོས་གླིང་གི་རི་ཁྲོད་དུ་སྦྱར་བའོ། །འགྲོ་རྣམས་བླ་མས་རྗེས་སུ་འཛིན་པར་གྱུར་ཅིག །
