Advice for Beginners—Tibetan
Literary Genres › Advice | བོད་ཀྱི་བླ་མ། › མི་ཕམ་རིན་པོ་ཆེ།
English | Deutsch | Español | Français | Italiano | Português | 中文 | བོད་ཡིག
Ju Mipham Namgyal Gyatso
Courtesy of Himalayan Art Resources
Further information:
༄༅། །ལས་དང་པོ་པ་ལ་གདམས་པ་བཞུགས།
༄༅། །ཀྱེ་ཧོ། །འཁོར་བའི་བྱ་བ་ཀུན་ལ་སྙིང་པོ་མེད། །
མི་བརྟན་གཡོ་བ་གློག་གི་ཟློས་གར་མཚུངས། །
འཆི་བ་འདི་ཡང་ནམ་འབྱུང་ཆ་མེད་ལ། །
ཅིས་ཀྱང་འཆི་ངེས་བློ་སྣ་བསྟུང་ནས་སུ། །
བླ་མའི་གདམས་ངག་གནད་དུ་བསྣུན་བྱས་ཏེ། །
རྩེ་གཅིག་དབེན་པར་རང་སེམས་ཕུ་ཐག་བཅད། །
སེམས་ནི་གློག་དང་རླུང་དང་སྤྲིན་དང་འདྲ། །
མི་བསམ་དགུ་བསམ་སྣ་ཚོགས་རྟོག་པས་བསླད། །
ལེགས་པར་བརྟགས་ན་གཞི་རྩ་གང་ཡང་མེད། །
བར་སྣང་སྨིག་རྒྱུ་ལྟ་བུར་ངོ་བོས་སྟོང་། །
སྟོང་བཞིན་སྣང་ལ་སྣང་བཞིན་སྟོང་པ་ཡི། །
རང་སེམས་རང་བབས་བཞག་ནས་རྣལ་མར་སྡོད། །
གོམས་པ་བརྟན་ན་རང་སེམས་གཤིས་ལུགས་མཐོང་། །
བླ་མར་མོས་གུས་ཆེ་ན་བྱིན་རླབས་འཇུག །
ཚོགས་བསགས་སྒྲིབ་པ་སྦྱང་ན་རྟོགས་པ་སྐྱེ། །
དེ་བས་ནན་ཏན་འབད་པས་ཉམས་སུ་ལོངས། །
ལས་དང་པོ་པ་ཁ་ཅིག་གིས་ཉམས་ལེན་གྱི་གདམས་པ་དགོས་ཟེར་བ་ལ་མི་ཕམ་པས་བསླབ་བྱར་བྲིས། དགེའོ།། །།
