Beautiful String of Jewels—Tibetan

༄༅། །གདམས་པ་རིན་ཆེན་ཕྲེང་མཛེས་ཞེས་བྱ་བ།

རྗེ་བླ་མ་རྣམས་ལ་ཕྱག་འཚལ་ལོ། །

ཚེ་མི་རྟག་སྟོན་ཀའི་སྤྲིན་དང་འདྲ། །

དུས་ད་ལྟ་ཡོད་པ་ད་ལྟ་མེད། །

ལུས་འདི་ནི་ཆུ་ཡི་ཆུ་བུར་བཞིན། །

དབུགས་རྒྱུ་བ་རླུང་གསེབ་མར་མེ་མཚུངས། །

གྲོགས་བཟང་པོ་ལྷ་བུ་འདྲ་བ་ཡང་། །

ཤུལ་དུ་བསྐྱུར་ནས་འགྲོགས་དབང་མེད། །

རྒྱུ་ནོར་རྫས་རི་ལྟར་སྤུངས་ཡོད་ཀྱང་། །

ཁབ་ཙམ་ཞིག་ཁྱེར་བའི་དབང་ནི་མེད། །

ཁོ་འཆི་བདག་གཤིན་རྗེ་ཞེས་བྱ་བས། །

དབང་མ་སྟེར་ཕྱི་མའི་ཡུལ་དུ་ཁྲིད། །

ལུས་མཛེས་པའི་ལང་ཚོ་བཀྲག་ལ་གསལ། །

མཚར་སྡུག་གི་མེ་ཏོག་འདྲ་ན་ཡང་། །

དུས་ནམ་ཞིག་མི་རྟག་སད་ཀྱིས་ཁྱེར། །

དགྲ་འཆི་བདག་གཤིན་རྗེ་མཆེ་བ་གཙིགས། །

ལས་ངན་པའི་ཞགས་པས་དབང་མེད་བསྡམ། །

རྒྱོབ་སོད་ཀྱི་གནམ་ས་གང་བའི་དུས། །

སྐྱབས་བླ་མ་དཀོན་མཆོག་གསུམ་ལས་མེད། །

དུས་ད་ལྟ་རང་དབང་ཡོད་པའི་དུས། །

བློ་དམ་པའི་ཆོས་ལ་ཕྱོགས་པས་ན། །

ལས་བྱས་པ་དོན་དང་ལྡན་པར་འགྱུར། །

རང་སེམས་འདི་རྟ་རྒོད་དང་འདྲ་བས། །

ངེས་འབྱུང་ལྕག་གིས་བྲབ་པ་དང་། །

ཚེ་འདིར་སྣང་འཁྲུལ་པའི་ཞེན་པ་ཐོངས། །

འགྲོ་བ་ཀུན་ཕ་མར་ཤེས་བྱས་ནས། །

བྱམས་སྙིང་རྗེ་བྱང་ཆུབ་སེམས་གཉིས་བསྒོམ། །

ཐེག་ཆེན་གྱི་བློ་སྦྱོང་འབྱོང་བར་མཛོད། །

དྲིན་ཆེ་ལྡན་རྩ་བའི་བླ་མ་དེ། །

དུས་ནམ་ཡང་མ་བརྗེད་སྙིང་དབུས་བསྒོམ། །

གསོལ་བཏབ་དང་དབང་བླང་ཐུགས་ཡིད་བསྲེ། །

སེམས་གདོད་ནས་སྐྱེ་མེད་ཆོས་སྐུའི་གཤིས། །

གདངས་རང་བཞིན་འོད་གསལ་འགགས་པ་མེད། །

རྩལ་སྣ་ཚོགས་ཤར་བ་སྤྲུལ་པའི་སྐུ། །

དེ་སྐུ་གསུམ་དབྱེར་མེད་ལྷུན་གྱིས་གྲུབ། །

རང་རིག་པའི་གནས་ལུགས་དེ་ཡི་ངང་། །

བློས་བཅོས་སླད་མ་བྱེད་ཕྱམ་བརྡལ་ཐོང་། །

རྣམ་རྟོག་གི་རྗེས་སུ་མ་འབྲང་ཞོག །

གང་སྣང་ཀུན་རང་གྲོལ་འགྲོ་བར་གྱིས། །

ཐུན་མཚམས་སུ་ཁ་འདོན་བཟླས་བརྗོད་དང་། །

བཟང་སྤྱོད་སོགས་སྨོན་ལམ་ཡང་ཡང་གདབ། །

ཚུལ་དེ་སྐད་གདམས་པའི་ཕྲེང་བ་འདི། །

ཚེ་རིང་གི་དམ་ཆོས་སྒྲོན་མ་ལ། །

བསམ་པ་བཟང་པོས་གདམས་པ་དགེ །

དགེ་བས་བྱང་ཆུབ་མྱུར་ཐོབ་ཤོག །

ཅེས་པའང་ཆོས་ཀྱི་བློ་གྲོས་པས་སོ། །