Vajra Song of Empty Sound—Tibetan
Schools & Systems › Dzogchen | Literary Genres › Songs and Poems | བོད་ཀྱི་བླ་མ། › འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།
འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།
Photographer unknown
Further information:
༄༅། །གྲགས་སྟོང་རྡོ་རྗེའི་གླུ་དབྱངས།
ཨ་ཧོ།
རང་རིག་འོད་གསལ་དབུ་མ་ཡི་གྲོང་ཁྱེར། །
རིག་སྟོང་ཕ་རྒོད་པད་འབྱུང་དེ་བཞུགས་ཡོད། །
ཡེ་ཤེས་སྤྱན་གྱིས་རྟག་པ་རུ་གཟིགས་མཛོད། །
བུ་ཧྲུལ་ང་ལ་བྱིན་རླབས་ཞིག་སྩོལ་མཛོད། །
རང་བྱུང་གཉུག་མའི་ཤེས་རིག་ནི་ཟང་མ། །
མ་བཅོས་སོ་མ་ཀ་དག་གི་ངོ་བོ། །
རང་བཞིན་ལྷུན་གྲུབ་འོད་གསལ་གྱི་གཏིང་གདང་། །
ཡེ་ནས་ལྷུན་རྫོགས་བྱ་རྩོལ་དང་བྲལ་བའི། །
གདོད་མའི་མགོན་པོ་རང་ཆས་སུ་བཞུགས་སོ། །
ཨ་ཧོཿ
རང་རིག་བླ་མ་ཆོས་སྐུ་ཡི་ངོ་བོ། །
རང་གདང་འགགས་མེད་ཞི་ཁྲོ་ཡི་ཚོམ་བུ། །
རིག་རྩལ་མ་འགགས་དཔའ་བོ་དང་མཁའ་འགྲོ། །
རིག་པའི་རང་ཆས་སུ་བཞུགས་པས་སྐྱིད་དོ། །
དངོས་གྲུབ་ཕྲིན་ལས་རང་སྣང་གི་བཀོད་པ། །
རྟོགས་ན་དངོས་གྲུབ་མ་རྟོགས་ན་འདྲེར་སྣང་། །
དོན་ལ་མ་གྲུབ་ཡེ་ཤེས་ཀྱི་སྒྱུ་མ། །
ཅིར་ཡང་འཆར་ཞིང་ཞེན་མེད་ཀྱི་རྣལ་འབྱོར། །
རང་གྲོལ་བུ་ཡང་བློ་བདེ་ང་སྐྱིད་དོ། །
གཏད་མེད་རྒྱལ་པོ་བློ་གྲོས་ཀྱི་རྣལ་འབྱོར། །
གང་ཤར་འཛིན་མེད་ཉམས་དབྱངས་ཀྱི་མཆོད་པ། །
དུས་ཀྱི་རྒྱལ་པོ་མཁའ་འགྲོ་ཡི་དུས་ཆེན། །
གྲགས་སྟོང་རྡོ་རྗེའི་གླུ་དབྱངས་གི་རོལ་མོ། །
འདིས་ཀྱང་འཁོར་བ་དོང་སྤྲུགས་སུ་ཤོག་ཅིག།
ཅེས་པའང་རིག་འཛིན་ཀུན་བཟང་འོད་གསལ་སྙིང་པོ་རྩལ་གྱིས་སོ།། །།
