Guru Rinpoche Visualization—Tibetan

Practices › PrayersGuru Rinpoche Prayers | Deities › Guru Padmasambhava | Practices › PrayersGuru Rinpoche PrayersLe'u Dünma | Literary Genres › Termas | Collections & Cycles › Nyingma Mönlam | བོད་ཀྱི་བླ་མ།འཇམ་དབྱངས་མཁྱེན་བརྩེའི་དབང་པོ།

English | Français | བོད་ཡིག

འཇམ་དབྱངས་མཁྱེན་བརྩེའི་དབང་པོ།

Guru Padmasambhava

༄༅། །ཨོ་རྒྱན་རིན་པོ་ཆེའི་གསོལ་འདེབས་སྤྱིའི་རྟེན་བསྐྱེད་མདོར་བསྡུས་ལམ་ཟབ་སྙིང་པོ་བཞུགས་སོ།།

 

ན་མོ་གུ་རུ། ཨོ་རྒྱན་རིན་པོ་ཆེའི་གསོལ་འདེབས་སྤྱིའི་རྟེན་བསྐྱེད་ལ།

ཐོག་མར་སྐྱབས་སུ་འགྲོ་བ་ནི།

ན་མོ༔ བླ་མ་བདེ་གཤེགས་འདུས་པའི་སྐུ༔

དཀོན་མཆོག་གསུམ་གྱི་རང་བཞིན་ལ༔

བདག་དང་འགྲོ་དྲུག་སེམས་ཅན་རྣམས༔

བྱང་ཆུབ་བར་དུ་སྐྱབས་སུ་མཆི༔

སེམས་བསྐྱེད་ནི།

སེམས་བསྐྱེད་འགྲོ་བ་ཀུན་དོན་དུ༔

བླ་མ་སངས་རྒྱས་བསྒྲུབས་ནས་ནི༔

གང་ལ་གང་འདུལ་ཕྲིན་ལས་ཀྱིས༔

འགྲོ་བ་བསྒྲལ་བར་དམ་བཅའོ༔

ཡན་ལག་བདུན་པ་ནི།

བླ་མ་ཡི་དམ་མཁའ་འགྲོ་གཤེགས༔

ཉི་ཟླ་པདྨའི་གདན་ལ་བཞུགས༔

ལུས་ངག་ཡིད་གསུམ་གུས་ཕྱག་འཚལ༔

ཕྱི་ནང་གསང་བའི་མཆོད་པ་འབུལ༔

ཉམས་ཆག་སྡིག་སྒྲིབ་མཐོལ་ཞིང་བཤགས༔

གསང་སྔགས་བསྒྲུབས་ལ་རྗེས་ཡི་རང་༔

སྨིན་གྲོལ་གསང་སྔགས་ཆོས་འཁོར་བསྐོར༔

མྱ་ངན་མི་འདའ་བཞུགས་སུ་གསོལ༔

སྙིང་པོ་སེམས་ཅན་དོན་དུ་བསྔོ༔

ཡང་དག་རྡོ་རྗེའི་དོན་རྟོགས་ཤོག༔

རྟེན་བསྐྱེད་དངོས་ནི།

མདུན་གྱི་ནམ་མཁར་འོད་ལྔའི་ཀློང་༔

སེང་ཁྲི་པདྨ་ཉི་ཟླའི་སྟེང་༔

སྐུ་གསུམ་རྒྱལ་བ་འདུས་པའི་དངོས༔

རྩ་བའི་བླ་མ་པདྨ་འབྱུང་༔

དཀར་དམར་མདངས་ལྡན་ཞི་ཁྲོའི་ཉམས༔

པད་ཞྭ་གསང་ཕོད་ཆོས་གོས་དང་༔

ཟ་འོག་བེར་སྨུག་བརྗིད་པར་གསོལ༔

ཕྱག་གཡས་རྡོ་རྗེ་རྩེ་ལྔ་དང་༔

གཡོན་པས་བྷནྡྷ་ཚེ་བུམ་བསྣམས༔

གྲུ་མོ་གཡོན་ན་ཁ་ཊྭཱཾ་འཆང་༔

རྡོ་རྗེའི་སྐྱིལ་ཀྲུང་དང་བཅས་ཏེ༔

སྐུ་གསུང་ཐུགས་ཀྱི་དཀྱིལ་འཁོར་ལས༔

རྩ་གསུམ་ཆོས་སྲུང་རབ་འབྱམས་ཀུན༔

འཕྲོ་འདུའི་གཟི་བྱིན་ལམ་མེ་བ༔

མངོན་སུམ་བཞིན་དུ་བཞུགས་པར་གྱུར༔

ཅེས་གསལ་བཏབ་ལ། གསོལ་འདེབས་ལེའུ་བདུན་མ་དང་བསམ་པ་ལྷུན་འགྲུབ་མ། གཞན་ཡང་ཚིག་བདུན་གསོལ་འདེབས་དང༌། བར་ཆད་ལམ་སེལ་སོགས་གཏེར་ཁ་སྔ་ཕྱི་ལས་བྱུང་བ་དང༌། དམ་པ་གོང་མའི་རྡོ་རྗེའི་གསུང་ཚོགས་བྱིན་རླབས་ཅན་གྱི་གསོལ་འདེབས་གང་རིགས་མོས་གུས་གདུང་ཤུགས་དྲག་པོས་བྱ།

དེ་ཙམ་མི་ནུས་ན་བླ་མ་སྐུ་གསུམ་དང༌། བསམ་པ་ལྷུན་གྲུབ་ཁོ་ནས་ཀྱང་ཆོག །གང་ལྟར་ཡང་མཇུག་ཏུ་ཐུགས་རྒྱུད་བསྐུལ་བའི་ཕྱིར་བཛྲ་གུ་རུའི་བཟླས་པ་ཅི་ནུས་བྱས་མཐར།

བླ་མའི་གནས་གསུམ་འབྲུ་གསུམ་ལས༔

འོད་ཟེར་རིམ་དང་གཅིག་ཆར་འཕྲོས༔

བདག་གི་གནས་གསུམ་ཐིམ་པ་ཡིས༔

དབང་བཞི་ཐོབ་ཅིང་སྒྲིབ་བཞི་དག༔

ལམ་བཞི་སྒོམ་པའི་སྣོད་དུ་གྱུར༔

མཐར་ནི་རང་ཐིམ་དབྱེར་མེད་ངང་༔

བློ་འདས་ཆོས་སྐུའི་རང་ཞལ་བལྟ༔

དགེ་བ་འདི་ཡིས་མྱུར་དུ་བདག །

ཨོ་རྒྱན་བླ་མ་འགྲུབ་གྱུར་ནས། །

འགྲོ་བ་གཅིག་ཀྱང་མ་ལུས་པ། །

དེ་ཡི་ས་ལ་འགོད་པར་ཤོག །

ཅེས་སོགས་བསྔོ་སྨོན་གྱིས་རྒྱས་གདབ་བོ། །

 

ཞེས་པའང་སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པའི་ཐུགས་དམ་ཞལ་འདོན་དུ་འདི་ལྟར་བྲིས་ཞེས་བཀའ་སྩལ་བལྟར། མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པའི་སྡེས་བྲིས་པ་དགེ་ལེགས་སུ་གྱུར་ཅིག། །།

 

This website uses cookies to collect anonymous usage statistics and enhance the user experience.
Decline
Accept