A Precious Garland—Tibetan
Literary Genres › Lamrim | བོད་ཀྱི་བླ་མ། › སྒམ་པོ་པ་བསོད་ནམས་རིན་ཆེན།
སྒམ་པོ་པ་བསོད་ནམས་རིན་ཆེན།
Painting by Drugu Choegyal Rinpoche
Further information:
༄༅། །དྭགས་པོ་ཆོས་བཞིའི་རྩ་བ་སྐྱེས་བུ་གསུམ་གྱི་ལམ་གྱི་མཆོག་རིན་པོ་ཆེའི་འཕྲེང་བ་ཞེས་བྱ་བ་བཞུགས་སོ། །
སྡོམ་དང་དམ་ཚིག་གུས་སེམས་མ་ཉམས་ཤིང༌། །
ལུང་དང་རྟོགས་པ་བྱིན་རླབས་བརྒྱུད་པར་ལྡན། །
ཇོ་བོའི་བཀའ་བརྒྱུད་བླ་མ་དམ་པ་ལ། །
རྐང་གི་ཁོང་དང་སྙིང་གི་དཀྱིལ་ནས་འདུད། །
ཐེག་པ་ཐམས་ཅད་བརྗོད་བྱར་བསྟན་པ་ཡི། །
སྐྱེས་བུ་གསུམ་གྱི་ལམ་གྱི་རིམ་པ་འདི། །
དུས་གསུམ་འཕགས་པ་རྣམས་ཀྱི་གཞུང་ལམ་སྟེ། །
ཆོས་བཞིས་རྒྱས་བཤད་དེ་དག་རེ་རེའང༌། །
ལྟ་སྒོམ་སྤྱོད་པ་གསུམ་གྱིས་ཉམས་སུ་བླང༌། །
ཡང་དག་ལྟ་བ་ལས་འབྲས་སྒོམ། །
དགེ་སྡིག་འཇུག་ལྡོག་སྤྱོད་པ་སྟེ། །
འབྲས་བུ་མཐོ་རིས་ལྷ་མི་གཉིས། །
སྐྱེས་བུ་ཆུང་ངུ་བསྡུས་པ་ཡིན། །
བདག་མེད་ལྟ་བ་ཉེས་དམིགས་བསྒོམ། །
ངེས་འབྱུང་བསླབ་པ་གསུམ་སྤྱོད་པ། །
འབྲས་བུ་ཉན་རང་བྱུང་ཆུབ་སྟེ། །
སྐྱེས་བུ་འབྲིང་པོ་བསྡུས་པ་ཡིན། །
བདེན་གཉིས་ལྟ་བ་ཟུང་འཇུག་སྒོམ། །
ཕ་རོལ་ཕྱིན་དྲུག་སྤྱོད་པ་སྟེ། །
འབྲས་བུ་མི་གནས་མྱ་ངན་འདས། །
སྐྱེས་བུ་ཆེན་པོ་བསྡུས་པ་ཡིན། །
ཆོས་ཉིད་ནམ་མཁའ་ལྟ་བུ་ལ། །
སྣང་བ་བྱང་ཆུབ་སེམས་སུ་སྦྱང༌། །
བདེན་གཉིས་ཚོགས་གཉིས་བསྒྱུར་བ་འདི། །
སྐུ་གཉིས་རྒྱུ་རུ་ཤེས་པར་བྱ། །
བདག་གིས་བདེ་ལ་གཞན་སྦྱོར་ནུས། །
བྱམས་པ་ཚད་དུ་ཕྱིན་པ་ལགས། །
གཞན་གྱི་སྡུག་བསྔལ་བདག་ལེན་ནུས། །
སྙིང་རྗེ་ཚད་དུ་ཕྱིན་པ་ལགས། །
གནོད་སྐྱེལ་གྱིས་བློ་མི་སྨད་ན། །
བྱང་སེམས་ཚད་དུ་ཕྱིན་པ་ལགས། །
བདེ་སྡུག་བླང་དོར་མི་འདོད་ན། །
ལྟ་བ་ཚད་དུ་ཕྱིན་པ་ལགས། །
རང་གི་སེམས་ཀྱི་ཆོས་ཉིད་དང༌། །
གཞན་གྱི་སེམས་ཀྱི་ཆོས་ཉིད་ལ། །
གཉིས་སུ་ཡོད་པ་མ་ཡིན་ན། །
བདག་གཞན་འཛིན་པ་ཇི་ལྟར་འཐད། །
འཁོར་བའི་རང་བཞིན་ཤེས་གྱུར་པ། །
དེ་ཉིད་མྱ་ངན་འདས་པར་བརྗོད། །
དེ་སྐད་གསུངས་པས་འཁོར་འདས་ལ། །
བཟང་ངན་འཛིན་པ་ཇི་ལྟར་འཐད། །
སྟོང་དང་རྟེན་འབྱུང་དོན་གཅིག་པ། །
དབུ་མའི་ལམ་དུ་གསུངས་པ་ལ། །
སྟོང་ཉིད་སྟོན་པའི་བླ་མ་ཞིག །
ལོགས་ནས་དགོས་པ་ཇི་ལྟར་འཐད། །
རང་གི་སེམས་ལ་བཟོ་ཤེས་ན། །
ཐམས་ཅད་བདེན་པར་མ་གྲུབ་པས། །
ཇི་ལྟར་སྣང་ཡང་བློ་སྦྱོང་གི །
གྲོགས་དང་མཐུན་པའི་རྒྱུ་རུ་སྦྱར། །
གེགས་སེལ་ལོགས་ནས་ཅི་ཞིག་དགོས། །
དགེ་སློང་འཚོ་བྱེད་ཅེས་བྱང་ཕྱོགས་གངས་རིའི་ལྗོངས་འདིའི་བསྟན་པ་ལ་བྱ་བ་བྱེད་པར་སྟོན་པས་ལུང་བསྟན་པ་དེས་མཛད་པ་རྫོགས་སོ།། །།
