ངེས་དོན་སྙིང་པོ།

༄༅། །ངེས་དོན་སྙིང་པོ་བཞུགས་སོ། །

ངེས་དོན་སྙིང་པོ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་རྣམ་དག་རིག་པ་བྱང་ཆུབ་སེམས། །འགྲོ་དང་འོང་མེད་ཀུན་ཏུ་ཁྱབ་པར་གདལ། །ཕྱོགས་དང་རིས་མེད་གཞི་རྩ་བྲལ་བ་ལ། །གཏང་གཞག་འགྲོ་འོང་མེད་པས་ཕྱག་འཚལ་ལོ། །གང་གིས་མ་བསླད་རྟོག་མེད་ཟང་ཀ་མ། །ཡེ་བབས་རང་སྟོང་རྫོགས་པ་ཆེན་པོའི་གནད། །རིག་པའི་རང་གྲོལ་གཤིས་ཀྱི་འདུག་ཚུལ་ཡིན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཡེ་ནས་རྣམ་དག་རང་བྱུང་ཡེ་ཤེས་ནི། །ཡོད་མེད་འདས་པས་འདི་ཞེས་མཚོན་དུ་མེད། །ཕྱོགས་རིས་འདས་པས་སྤྲོས་བརྗོད་བསམ་དུ་མེད། །དམིགས་ལས་འདས་པས་སྒོམ་དང་མི་སྒོམ་མེད། །བླང་དོར་འདས་པས་བཟང་ངན་བྱ་རྩོལ་མེད། །ཡེ་སངས་ཡེ་རྒྱས་རྫོགས་པ་ཆེན་པོའི་ངང༌། །གང་ཡང་མ་སྤངས་ཀུན་ལས་འདས་པ་ཡིན། །ཇི་ལྟར་ནམ་མཁའ་ཡངས་པའི་དཀྱིལ་རུམ་ན། །སྣང་སྲིད་སྣོད་བཅུད་རོལ་པ་ཅི་སྣང་ཡང༌། །མཁའ་ལས་མ་གཡོས་ངང་ནས་གསལ་བ་བཞིན། །རིག་པའི་ངང་ནས་འཁོར་འདས་ཆོས་ཀུན་གསལ། །གཞི་བཞག་ཡེ་གཞག་ཅོག་བཞག་རྒྱས་ཐེབས་ན། །བྱར་མེད་ལྷུན་རྫོགས་ཆོས་སྐུའི་རང་སར་གནས། །གར་ཡང་མི་བསམ་ཅི་ཡང་མི་འཛིན་ན། །ངང་ཡིན་ཡེ་ཡིན་རྫོགས་པ་ཆེན་པོ་ཡིན། །ཆོས་ཟད་ཀ་དག་ཐོག་མའི་དགོངས་པ་ཡིན། །སྟོང་གསལ་ངང་དེར་གཡོ་མེད་ལྷུན་གྱིས་ཞོག །རང་ལས་རང་ཤར་ཐུགས་རྗེའི་རིག་རྩལ་ནི། །ཤར་བ་རང་གྲོལ་ཆོས་སྐུ་ཟང་ཀ་ཉིད། །རྗེས་མེད་རང་ཡལ་ཆོས་ཟད་རྗེན་པར་སངས། །གདོད་མའི་གཞི་ལ་རང་ཤར་རང་གྲོལ་ཡིན། །དེ་ལྟར་མཐོང་ནས་ཆེད་དུ་སྒོམ་མི་དགོས། །མ་བསྒོམས་ལྷུན་གྲུབ་སྒོམ་པའི་རྒྱལ་པོ་ལ། །འདུ་འབྲལ་མེད་པས་ཆོས་སྐུ་རང་མལ་རྙེད། །རྟོག་དང་མི་རྟོག་མཉམ་པའི་དགོངས་པར་ཕྱིན། །གང་ཡིན་ཡིན་གྱིས་བཅོས་བསླད་མ་བྱེད་ཅིག །འདི་ཡིན་མེད་ཀྱིས་ཕྱོགས་རིས་མ་འཛིན་ཅིག །གཟའ་གཏད་མེད་ཀྱིས་དགག་སྒྲུབ་མ་བྱེད་ཅིག །གང་ཡང་དམིགས་གཏད་མེད་པའི་རིག་པ་ལ། །ཕྱི་ནང་རྐྱེན་གྱིས་རྣམ་པ་ཅི་ཤར་ཡང༌། །མ་སྤངས་མ་བསྒྱུར་མ་འཛིན་གང་བདེར་ཞོག །གཞི་ལ་རང་སངས་ཆོས་སྐུའི་དགོངས་པར་འཆར། །འདི་ཉིད་གསང་ཆེན་ངེས་པའི་མན་ངག་ཡིན། །དགེ་བས་འགྲོ་ཀུན་མ་སྤངས་ཡོངས་གྲོལ་ཤོག །ངེས་དོན་སྙིང་པོ་ཞེས་བྱ་བ། རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ། །དགེའོ། །དགེའོ། །དགེའོ།། །།