འོད་གསལ་སྤྱོད་པའི་གནད་ཡིག་བདུད་རྩི་རྒྱལ་པོ།

༄༅། །འོད་གསལ་སྤྱོད་པའི་གནད་ཡིག་བདུད་རྩི་རྒྱལ་པོ་བཞུགས་སོ། །

ཆོས་མཆོག་རྒྱ་མཚོ་ཟབ་མོ་ཡི། །མཛོད་བརྙེས་གང་ལ་ཕྱག་འཚལ་ཏེ། །བླ་མ་རྡོ་རྗེ་སྙིང་པོ་ཡི། །སྤྱོད་མཆོག་བདུད་རྩི་རྒྱལ་པོ་བྲི། །ནགས་ཚལ་མཚོ་གླིང་དུར་ཁྲོད་དང༌། །ལྷ་ཁང་ཕྱུགས་ལྷས་གྲོང་ཁྱེར་དང༌། །ཁང་སྟོང་ཤིང་གཅིག་ཆུ་ངོགས་འགྲམ། །འཇིགས་དང་དགའ་དང་མྱ་ངན་གནས། །སེམས་གཡེང་བྱེད་དེར་རབ་སོང་ལ། །བདེ་བའི་སྟན་ལ་རབ་འདུག་སྟེ། །སྐྱབས་སུ་འགྲོ་དང་སེམས་བསྐྱེད་ནས། །མདུན་གྱི་ནམ་མཁར་བླ་མ་དང༌། །ཡི་དམ་མཁའ་འགྲོ་ཆོས་སྐྱོང་དང༌། །འགྲོ་དྲུག་ལན་ཆགས་གནོད་བྱེད་འདྲེ། །ཐམས་ཅད་བསམ་ལ་རང་གི་ལུས། །ཤ་ཁྲག་འདོད་ཡོན་ལོངས་སྤྱོད་དུ། །གང་ལ་གང་འདོད་ཆགས་མེད་སྦྱིན། །དེ་རྗེས་གང་ཡང་མི་བསམ་པར། །ཆོས་ཉིད་མཉམ་པའི་ངང་དུ་ཉལ། །དེ་ཚེ་རང་གི་རྣམ་རྟོག་དང༌། །འཁྲུལ་སྣང་ལྷ་འདྲེའི་ཆོ་འཕྲུལ་ནི། །དངོས་དང་ཉམས་སྣང་རྨི་ལམ་དུ། །རྣམ་པ་སྣ་ཚོགས་འབྱུང་བར་འགྱུར། །དེ་ཚེ་གནད་ཀྱི་གདམས་ངག་ལ། །རྒྱུ་མཚན་བརྟགས་པས་ཤེས་པ་དང༌། །རང་བཞིན་སྙེམས་བྲལ་གློད་པའོ། །དང་པོ་རྒྱུ་མཚན་བརྟག་པ་ནི། །ཆོ་འཕྲུལ་གང་སྣང་དཔེ་མཚོན་པ། །སྣང་སྲིད་སྣོད་བཅུད་ཐམས་ཅད་ཀྱི། །གཟུགས་སུ་སྣང་བ་ངོ་བོས་སྟོང༌། །ཆ་ཤས་མེད་ཅིང་རང་བཞིན་བྲལ། །སྒྱུ་མ་རྨི་ལམ་ཆུ་ཟླ་བཞིན། །མ་སྐྱེས་པས་ན་གནས་པ་མེད། །འགགས་མེད་འགྲོ་འོང་ཀུན་ལས་འདས། །དེ་ལ་འཇིགས་པ་ཅི་ཞིག་ཡིན། །སྒྲ་ནི་གྲགས་པ་ཉིད་ནས་སྟོང༌། །དྲི་རོ་རེག་དང་ཆོས་ཀུན་ཡང༌། །ངོ་བོས་སྟོང་སྟེ་གཟུགས་བརྙན་བཞིན། །མེད་སྣང་སྟོང་པའི་རང་བཞིན་ལ། །འཇིགས་དང་དགའ་བ་ཅི་ཞིག་བྱ། །འཇིགས་པའི་ཡུལ་ལ་བརྟགས་དཔྱད་པས། །རང་བཞིན་མེད་པ་ཇི་ལྟ་བར། །འཇིགས་མཁན་སེམས་ལ་ཚུར་བལྟས་པས། །སེམས་ནི་དུས་གསུམ་གཞི་རྩ་བྲལ། །བརྟག་པས་མ་རྙེད་རྒྱུ་མཚན་བྲལ། ཁ་དོག་དབྱིབས་མེད་ངོས་གཟུང་བྲལ། །གང་ཞིག་གང་གིས་དགའ་འཇིགས་སྐྱེད། །དེ་ལྟར་ཡུལ་སེམས་གཟུང་འཛིན་དུ། །མེད་པ་དེ་ཚེ་ཆོས་རྣམས་ཀུན། །ནམ་མཁའ་ལྟ་བུར་བདག་མེད་པས། །གཞན་དུ་འཛིན་པ་ངང་གིས་སྟོང༌། །དེ་ཉིད་རང་བྱུང་ཡེ་ཤེས་ཏེ། །རང་གསལ་སྤྲོས་དང་བྲལ་བར་གཞག །གཉིས་པ་རང་ཞིར་གློད་པ་ནི། བརྟགས་དང་མ་བརྟགས་གང་ཚེ་ཡང༌། །རང་བཞིན་མེད་དེ་གཟུགས་བརྙན་བཞིན། །དེ་ལ་དྲན་བསམ་དགོས་པ་མེད། །གང་སྣང་སྟེང་དུ་གང་ཤར་གློད། །སྣང་སྲིད་འཁོར་འདས་ཐམས་ཅད་ཀུན། །སྣང་ན་ཆོས་ཉིད་སྟོང་པར་སྣང༌། །སྟོང་ན་སྲིད་གསུམ་འཁོར་བ་སྟོང༌། །རྟག་ན་ཆོས་སྐུ་འགྱུར་བ་མེད། །ཆད་ན་ལས་དང་ཉོན་མོངས་ཆད། །དེས་ན་གང་སྣང་མི་སྣང་མེད། །ལེགས་ཉེས་ཤོར་གོད་འགའ་མེད་པས། །གཞི་བྲལ་མཉམ་པའི་ངང་དུ་ཉལ། །ལྷ་འདྲེར་སྣང་ཡང་ངོས་གཟུང་མེད། །དེ་ལ་གཟུགས་མེད་འཇིགས་མེད་དགོས། །འཇིགས་མཁན་སེམས་ཡིན་ངོས་གཟུང་མེད། །དེ་ལ་བདེན་མེད་སྤང་མི་དགོས། །དེ་ལྟར་ཡུལ་སེམས་དགའ་འཇིགས་དང༌། །དུག་ལྔའི་རྣམ་རྟོག་ཐམས་ཅད་ལ། །ཅེར་མཐོང་རང་སངས་ངོས་གཟུང་ལ། །སྙེམས་མེད་ངང་དུ་གློད་པར་བྱ། །དེ་ནས་གཉན་སར་གཉིས་འཛིན་ཞིག །རེ་དོགས་བྲལ་བའི་ཚར་ཚད་ཐོག །ཞར་ལ་ཐུན་མོངས་དངོས་གྲུབ་ནི། །ལྷ་འདྲེ་དམ་ཐོགས་སྟོང་གྲོགས་བྱེད། །རྐྱེན་རྣམས་ཐུགས་ཕྲད་རང་གྲོལ་ཡིན། །དེ་ཕྱིར་གནད་འདི་ཉམས་སུ་ལོངས། །དགེ་བ་དེ་ཡིས་འགྲོ་བ་ཀུན། །སྐྱེ་མེད་ཀློང་དུ་གྲོལ་བར་ཤོག །འོད་གསལ་སྤྱོད་པའི་གནད་ཡིག །བདུད་རྩི་རྒྱལ་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ། །དགེའོ། ། དགེའོ། །དགེའོ།། །།