Torma Offering to Mahākāla—Tibetan

DeitiesDharma Protectors | Tibetan MastersPaksam Wangpo

English | བོད་ཡིག

Paksam Wangpo

Four-Armed Mahākāla with Consort

Further Information:
Download this text:

༄༅། །མགོན་པོའི་གཏོར་ཆོག་དངོས་གྲུབ་མཆོག་སྩོལ་བཞུགས་སོ།།

 

སངས་རྒྱས་ཆོས་དང་ཚོགས་ཀྱི་མཆོག་སོགས།

རང་གི་སྤྱི་བོར་མགོན་པོའི་དབང་རྒྱུད་ཀྱི། །

བླ་མ་ཀུན་བཞུགས་མཆོད་པ་སྣ་ཚོགས་འབུལ། །

རང་ཉིད་འཁོར་ལོ་སྡོམ་པ་ཡབ་ཡུམ་དུ། །

གསལ་བའི་མོད་ལ་བགེགས་ཚོགས་རིང་དུ་བསྐྲད། །

སྟེང་འོག་ཕྱོགས་མཚམས་མེ་རི་ཁ་དོག་ལྔ། །

མཚོན་ཆ་སྣ་ཚོགས་འབར་བའི་གུར་ཁང་གྱུར། །

མངོན་རྟོགས་ནི།

ཨོཾ་ཤུ་ནྱ་ཏཱ་སོགས།

སྟོང་པའི་ངང་ལས་སྐུ་གསུང་ཐུགས་གསུམ་གྱི། །

དཀྱིལ་འཁོར་ཆེན་པོར་གྲུབ་པ་ཨེ་ཡི་ནང་། །

ཧཱུྃ་ལས་མ་ཧཱ་ཀཱ་ལ་ཆར་སྤྲིན་མདོག །

ཕྱག་བཞི་གཡས་གཉིས་བཻ་ཏ་རལ་གྲི་དང་། །

གཡོན་གཉིས་ཐོད་པ་རྩེ་གསུམ་རབ་ཏུ་བཟུང་། །

སྦོམ་ཐུང་གསུས་པ་འཕྱང་ཞིང་ལྷུ་ལག་རགས། །

རུས་པའི་ཕྱག་རྒྱ་དྲུག་དང་སྦྲུལ་གྱིས་སྤྲས། །

ཐོད་སྐམ་ཅོད་པན་མགོ་རློན་ཕྲེང་བ་འཕྱང་། །

གླང་ཆེན་སྟག་དང་ཞིང་གི་ལྤགས་པ་བགོས། །

ཞབས་གཉིས་རོལ་པའི་སྟབས་ཀྱིས་བཾ་ཆེན་སྟེང་། །

བརྗིད་ཅིང་འགྱིང་བག་ཆེན་པོས་ཡུམ་ཆེན་དང་། །

སྙོམས་པར་ཞུགས་པས་པད་ཉིའི་གདན་ལ་བཞུགས། །

གཞན་ཡང་དབྱིངས་སྒྲོལ་རེ་ཏི་མཆེད་བཞི་དང་། །

རིགས་གསུམ་ལས་མགོན་སྡེ་བཞི་བཀའ་བརྒྱད་བཅས། །

སྒོ་མཚམས་རྡོ་རྗེ་ཕོ་ཉ་དྲུག་ཅུ་བཞི། །

སྒོ་སྐྱོང་ལྕམ་དྲལ་སྡེ་བརྒྱད་ཕྱོགས་སྐྱོང་བཅུ། །

རྒྱལ་ཆེན་བཞི་སོགས་རང་རིགས་སྡེར་བཅས་པ། །

སྐད་ཅིག་ཙམ་ལ་མདུན་དུ་གསལ་བར་གྱུར། །

སྤྱན་འདྲེན་པ་ནི།

ཧཱུྃ། མ་ཧཱ་ཀཱ་ལ་ཡོངས་ཀྱི་དབང་ཕྱུག་ཆེ། །

ཡེ་ཤེས་མགོན་པོ་བཀའ་ཉན་འཁོར་དང་བཅས། །

དད་དང་གདུང་བས་གནས་འདིར་སྤྱན་འདྲེན་ན། །

མ་ཐོགས་མྱུར་བ་ཉིད་དུ་གཤེགས་སུ་གསོལ། །

ཛཿཧཱུྃ་བཾ་ཧོཿ

དམ་ཚིག་ཡེ་ཤེས་གཉིས་སུ་མེད་པར་གྱུར། །

དབང་ལྷས་དབང་བསྐུར་རིགས་ཀྱི་ཅོད་པན་གྱུར། །

མཆོད་པ་ནི།

ཧཱུྃ། ཀུན་ཏུ་བཟང་པོའི་མཆོད་པའི་སྤྲིན་ཕུང་པོ། །

མི་ཟད་ནམ་མཁའི་མཛོད་དུ་རྣམ་སྤེལ་བ། །

ཁམས་གསུམ་དབང་དུ་སྡུད་པའི་ལྕགས་ཀྱུའི་འཕྲུལ། །

གཤིན་རྗེའི་ཁབ་ཀྱི་འབྱོར་པ་ལྡན་དེས་མཆོད། །

གཏོར་མ་འབུལ་བ་ནི།

ཨོཾ་གྱིས་རབ་སྦྱངས་ཨཱཿཡིས་མང་པོར་སྤེལ། །

ཧཱུྃ་གིས་སྦར་ཧོཿས་བདུད་རྩིར་ཞུ་བ་ཡིས། །

ཉམས་པའི་ཤ་ཁྲག་རུས་ཚོགས་བ་ལིང་ཏ། །

དམ་ཅན་རྒྱ་མཚོར་འབུལ་ལོ་ཁ་རཾ་ཁཱ་ཧི། །

ཨོཾ་མ་ཧཱ་ཀཱ་ལ་ཧཱུྃ་ཕཊ྄ཿསོགས་ལན་གསུམ།

ཨ་ཀཱ་རོ་ལན་གསུམ།

འདོད་གསོལ་ནི།

བདག་ཅག་འཁོར་དང་བཅས་པས་བསམ་པའི་དོན། །

གེགས་མེད་ཡིད་བཞིན་མྱུར་དུ་འགྲུབ་པ་དང་། །

གནོད་བྱེད་གདུག་པའི་ཚོགས་ཀུན་མིང་མེད་དུ། །

འཇོམས་པའི་མཐུ་རྩལ་ནུས་པ་ཅི་མཆིས་སྟོན། །

བསྟོད་པ་ནི།

ཧཱུྃ། ཆོས་ཀྱི་དབྱིངས་ལས་ཁྲོས་པའི་བསྟན་སྲུང་ཆེ། །

བྱ་རོག་མིང་ཅན་མ་ཧཱ་ཀཱ་ལའི་སྡེ། །

མོ་རྒྱུད་དང་བཅས་བཀའ་སྡོད་དྲེགས་པའི་ཚོགས། །

དཀྱིལ་འཁོར་ཆེན་པོའི་ལྷ་ཚོགས་རྣམས་ལ་བསྟོད། །

བསྐང་བཤགས་ནི།

རྩ་ལྟུང་ཡན་ལག་བཅས་པ་ཉེས་པའི་ཚོགས། །

འགྱོད་པས་རབ་བཤགས་ཕྱི་ནང་གསང་བ་ཡི། །

རྟེན་མཆོད་མཐུན་རྫས་མ་ཚང་མེད་པ་འདིས། །

འཁོར་བཅས་ཐུགས་དམ་གཉེན་པོ་བསྐང་གྱུར་ཅིག །

རྗེས་ཆོག་ནི།

ཇི་ལྟར་མཆོད་པའི་ལྷག་ཆད་བྱུང་བ་ཀུན། །

བཟོད་པར་བཞེས་ཤིག་འཁོར་བཅས་བདག་ཉིད་ལ། །

གཉིས་མེད་ཐིམ་ནས་དགེ་ཚོགས་ཅི་མཆིས་པ། །

གོང་དུ་སྤེལ་ནུས་མགོན་པོ་འགྲུབ་གྱུར་ཅིག །

 

ཅེས་པ་འདི་ཉིད་བྱ་རིགས་མི་ཡི་དབང་པོས་གསུང་བསྐུལ་བཞིན་དཔལ་ལྡན་འབྲུག་པའི་རིང་ལུགས་འཛིན་པ་དཔག་བསམ་དབང་པོའི་སྡེས་སྡེ་བརྒྱད་འདུལ་བའི་བི་ཧོ་ར་ཐང་དུ་བྲིས་པ་མངྒ་ལཾ།། །།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK