བླ་མ་རྒྱང་འབོད་བྱིན་རླབས་ཆར་འབེབས།
༄༅། །བླ་མ་རྒྱང་འབོད་བྱིན་རླབས་ཆར་འབེབས་བཞུགས་སོ།།
བླ་མ་མཁྱེན་ནོ། །
བླ་མ་མཁྱེན་ནོ། །
བླ་མ་མཁྱེན་ནོ། །
སྤྱི་བོ་བདེ་ཆེན་གྱི་འཁོར་ལོ། །
པདྨ་ཉི་ཟླ་ཡི་ཁྲི་ཁར། །
དུས་གསུམ་རྒྱལ་བ་ཡི་རྣམ་རོལ། །
རང་བྱུང་མཚོ་སྐྱེས་ཀྱི་རྡོ་རྗེ། །
ད་ལྟའི་རིགས་བདག་ཏུ་བཞུགས་པ། །
འདྲེན་མཆོག་བླ་མ་ཁྱེད་མཁྱེན་ནོ། །
དལ་རྟེན་ཆུད་ཟོས་སུ་མ་བཏང་། །
མི་རྟག་སྙིང་ཁུང་དུ་འཆར་ཞིང་། །
ལས་འབྲས་མིག་སྤུ་ལྟར་བསྲུངས་ནས། །
འཁོར་བ་དོང་སྤྲུགས་ཤིག་ནུས་པའི། །
རྒྱལ་སྲས་སྤྱོད་པ་ལ་འགྲོགས་པར། །
དཔལ་ལྡན་བླ་མ་ཁྱེད་མཁྱེན་ནོ། །
གང་བསྟེན་བསླུ་བ་ནི་མེད་པ། །
སྐྱབས་མཆོག་རྣམ་གསུམ་གྱི་ཐུགས་རྗེས། །
ཆོས་བརྒྱད་ལོག་ལམ་དུ་མ་ཤོར། །
རང་རྒྱུད་ཆོས་ཕྱོགས་སུ་སོང་ཞིང་། །
གྲུབ་ཐོབ་ཤུལ་ལམ་ཞིག་ཆོད་པ། །
མཚུངས་མེད་བླ་མ་ཁྱེད་མཁྱེན་ནོ། །
རིན་ཆེན་བྱང་ཆུབ་ཀྱི་སེམས་མཆོག །
མ་གྱུར་འགྲོ་བ་ལ་དམིགས་ནས། །
ཕྱིན་དྲུག་ཤིང་རྟ་ལ་ཞོན་ཏེ། །
རྫོགས་པའི་སངས་རྒྱས་ཀྱི་གོ་འཕང་། །
མི་རིང་མྱུར་བ་རུ་འགྲུབ་པར། །
བླ་མ་སངས་རྒྱས་ཁྱེད་མཁྱེན་ནོ། །
འཁོར་འདས་ཀུན་ཁྱབ་ཀྱི་རིག་པ། །
ཡུལ་མེད་ཟང་ཐལ་དུ་ཤར་ཞིང་། །
སྐྱེ་འགག་འཛིན་མེད་ཀྱི་ཆོས་སྐུ། །
རང་བབས་ཐད་ཀར་དུ་བཞག་པས། །
རིག་འཛིན་རྒྱལ་ས་རུ་བགྲོད་པར། །
དཔལ་ལྡན་བླ་མ་ཁྱེད་མཁྱེན་ནོ། །
ཅིར་སྣང་གཞི་མེད་ནི་རྩ་བྲལ། །
འཛིན་མེད་ཆུ་ནང་གི་རི་མོ། །
གང་ཤར་གཏད་མེད་དུ་རང་གྲོལ། །
རང་གདེང་མངོན་སུམ་དུ་འགྱུར་བ། །
གཅོད་ཡུལ་བརྒྱུད་པ་ཡི་བྱིན་རླབས། །
བཀའ་དྲིན་འཁོར་མེད་ཁྱེད་མཁྱེན་ནོ། །
ངོ་བོ་རང་བཞིན་དང་ཐུགས་རྗེ། །
དབྱེར་མེད་གཞི་ཐོག་ཏུ་གྲུབ་པ། །
ཁྱབ་བརྡལ་ནམ་མཁའ་ཡི་འཁོར་ཡུག །
རྩོལ་མེད་ལྷུན་གྲུབ་ཀྱི་འབྲས་བུ། །
དགོངས་བརྡ་སྙན་བརྒྱུད་ཀྱི་ཁྱད་ཆོས། །
བརྒྱུད་གསུམ་བླ་མ་ཁྱེད་མཁྱེན་ནོ། །
དབང་བཞི་ཆུ་རྒྱུན་གྱི་བྱིན་རླབས། །
སྒོ་གསུམ་ཆ་སྙོམས་ལ་ཕབ་པས། །
ཁུ་རྡུལ་རླུང་གསུམ་གྱི་སྒྲིབ་པ། །
གཞི་དབྱིངས་ཀ་དག་ཏུ་སངས་ནས། །
ཚེ་གཅིག་སངས་རྒྱས་སུ་མཛད་པའི། །
ཆོས་རྗེ་བླ་མ་ཁྱེད་མཁྱེན་ནོ། །
བདག་སོགས་སྐལ་ལྡན་གྱི་སློབ་བུ། །
ཆོས་གཟུགས་ལྟ་ལོག་ལས་བསྐྱབ་ཏེ། །
རྡོ་རྗེ་ར་གུར་དུ་བཙུད་ནས། །
ཇི་སྲིད་བྱང་ཆུབ་ཀྱི་བར་དུ། །
འདྲེན་པའི་དེད་དཔོན་དུ་བཞུགས་པར། །
གསོལ་བ་སྙིང་ནས་རང་འདེབས་སོ། །
ཞེས་པའང་མུ་གུམ་མདོ་ཆོས་དགོན་པའི་བླ་མའམ་སློབ་དཔོན་ཚེ་དབང་གིས་བླ་མ་རྒྱང་འབོད་ཅིག་དགོས་ཞེས་དར་དཀར་ཉིན་མོ་བདེ་ལེགས་དང་ནེ་སྒོར་༣༠༠༠ བཅས་ནན་ཏན་ཆེན་པོས་བསྐུལ་ངོར་སྤྲུལ་མིང་པདྨ་རིག་རྩལ་རྡོ་རྗེས་ཕུར་བ་ཅན་རང་མལ་ནས་བོད་ཆུ་སྟག་ལོ་༢༡༤༩ ཟླ་བ་༣ ཚེས་༡༥ ཕྱི་ལོ་༢༠༢༢ ཟླ་བ་༥ ཚེས་༡༧ ལ་བྲིས་པ་དགེའོ།། །།
