མགོན་གཡག་ལ་བསྔགས་པ།
༄༅། །མགོན་གཡག་ལ་བསྔགས་པ་བཞུགས།
གང་ལུས་ཆར་སྤྲིན་ཕུང་པོ་ནི། །
མཁའ་ལ་དྲག་ཏུ་གཡོ་ལྟར་སྣང༌། །
དེ་ཡི་སྣ་དང་ཁ་སྒོ་ནས། །
རླངས་པ་སྤྲིན་ནག་མཆེད་ལྟར་འཕྱུར། །
ལྕེ་ནི་གློག་ལྟར་འགྱུ་བ་སྟེ། །
ངུར་སྒྲ་འབྲུག་གི་སྒྲ་ལྟར་སྒྲོགས། །
ཨིནྡྲ་ནཱི་ལའི་བྲག་ལྟ་བུའི། །
རྨིག་པ་བརྡབས་པས་ས་གཞི་གཡོ། །
ཤིན་ཏུ་བསྐྱོད་པའི་རྭ་ཙེ་ཡིས། །
རི་བོའི་ལྷུན་ཡང་བསྙིལ་བར་ནུས། །
མིག་གཉིས་ཉི་མ་ཟླ་བ་ནི། །
སྤྲིན་མཐོང་མཁའ་ལ་གཡོ་བ་བཞིན། །
རྔ་མ་ལྗོན་པ་རྒྱས་པ་འདྲ། །
དེ་བསྐྱོད་པ་ཡིས་ནམ་མཁའི་སྤྲིན། །
རྣམ་པར་འཐོར་བ་བཞིན་དུ་སྣང༌། །
དེ་ཡི་སྒྲ་ཡིས་གླུ་སྒྲ་ཡང༌། །
ཀུན་ནས་རབ་ཏུ་ཟིལ་གྱིས་གནོན། །
འདི་འདྲ་གངས་ཅན་གནས་པ་ཡི། །
རྐང་བཞི་པ་ཡི་ངོ་མཚར་ཏོ། །
འདི་ཡིད་བསྒྲིན་པར་གནས་པ་ཡི། །
རྐང་གཉིས་པ་ལའང་རབ་ཏུ་དཀོན། །
དེ་འདྲ་བརྩེ་མེད་སྐྱེས་བུ་ཡི། །
མཚོན་ལས་རབ་ཏུ་རྒྱལ་གྱུར་ཅིག། །།
