རྒྱ་གར་རྡོ་རྗེ་གདན་གྱི་གསོལ་འདེབས།
༄༅། །རྒྱ་གར་རྡོ་རྗེ་གདན་གྱི་གསོལ་འདེབས་བཞུགས།
བསྐལ་བཟང་རྣམ་འདྲེན་སྟོང་གིས་མི་སློབ་པའི། །
གོ་འཕང་མཛད་གནས་འཛམ་གླིང་སའི་ལྟེ་བར། །
ཐུབ་ཆེན་ཤཱཀྱའི་རྒྱལ་པོའི་རྣམ་ཐར་གྱི། །
རེ་ཁཱ་བཀྲ་བའི་ཞིང་ལ་གསོལ་བ་འདེབས། །
དབུས་འགྱུར་འཆང་གི་ཆོས་སྐུའི་མཆོད་སྡོང་ཆེ། །
བྱང་ཆུབ་ཤིང་དང་ཞབས་ཀྱི་པདྨོའི་རྗེས། །
མཚན་དཔེའི་སྣང་བརྙན་ལ་སོགས་ངོ་མཚར་གྱི། །
རྟེན་མཆོག་དུ་མ་བཞུགས་ལ་གསོལ་བ་འདེབས། །
ནམ་ཞིག་བྱམས་ཆེན་ཆོས་ཀྱི་ཉི་མ་ཡིས། །
བདུད་རྩིའི་སྒོ་འཕར་དང་པོར་ཕྱེ་བའི་ཚེ། །
འཁོར་གྱི་ཐོག་མར་སྐྱེས་ནས་འབྲེལ་ཚད་ཀུན། །
རྒྱལ་བ་དགྱེས་པའི་ལམ་ལ་ཞུགས་པར་ཤོག །
རྡོ་རྗེ་ཕུང་པོའི་ཡེ་ཤེས་རྩ་རླུང་ཐིག །
མི་ཤིགས་དྭངས་མའི་ཐིག་ལེར་སིམ་པ་ལས། །
རྣམ་པ་ཉི་ཤུས་མངོན་བྱང་ཆུབ་པའི་གནས། །
ནང་གི་རྡོ་རྗེ་གདན་ལ་གསོལ་བ་འདེབས། །
སངས་རྒྱས་རིན་ཆེན་ཟ་མ་ཏོག་ཆེན་པོ། །
ངེས་གསང་ཆོས་རྣམས་མ་ལུས་འབྱུང་བའི་གནས། །
རྒྱལ་ཀུན་ཡེ་ཤེས་སྙིང་པོ་འདུས་པའི་དོན། །
མངོན་སུམ་རྟོགས་པས་ལམ་ལྔ་ཡོངས་རྫོགས་ཤོག །
རྒྱལ་ཀུན་ཡེ་ཤེས་ཆོས་སྐུའི་མཆོད་སྡོང་དུ། །
དབྱེར་མེད་འཇུག་པའི་སྐལ་བཟང་མངོན་གྱུར་ནས། །
རྫོགས་སྨིན་སྦྱངས་པ་རྒྱ་མཚོའི་མཐར་ཕྱིན་ཏེ། །
ངོ་མཚར་མཛད་པས་མཁའ་ཁྱབ་འགྲོ་སྒྲོལ་ཤོག །
ཟབ་ཞི་སྤྲོས་བྲལ་འོད་གསལ་འདུས་མ་བྱས། །
རྣམ་ཀུན་མཆོག་ལྡན་གཞོན་ནུ་བུམ་པ་སྐུར། །
ཁྱད་པར་དྲུག་གིས་ངལ་འཚོ་ཐོབ་པའི་གནས། །
མཐར་ཐུག་རྡོ་རྗེ་གདན་ལ་གསོལ་བ་འདེབས། །
ཀུན་འབྱུང་འཁྲུལ་པའི་བདུད་ཚོགས་སྡེ་དང་བཅས། །
རྡོ་རྗེ་ལྟ་བུའི་ཏིང་འཛིན་གྱིས་བཅོམ་ནས། །
མཐའ་ཡས་ཡོན་ཏན་རྫོགས་པའི་སྟོབས་བཅུའི་བདག །
དང་པོའི་སངས་རྒྱས་མཆོག་གི་གནས་སོན་ཤོག །
ཀུན་བརྟགས་འཁྲུལ་པའི་མུན་པ་དབྱིངས་སུ་སངས། །
ཡེ་ཤེས་རིག་པའི་སྣང་བ་མཁའ་ཁྱབ་བརྡལ། །
ཟག་མེད་ཡོན་ཏན་རྫོགས་པའི་དཔལ་ཐོབ་ནས། །
གྲོལ་བ་དྲུག་གི་ཕྲིན་ལས་མངོན་གྱུར་ཤོག །
ཅེས་པའང་སྔོན་སྨོན་སྐལ་བ་བཟང་པོས་གནས་ཆེན་རྡོ་རྗེ་གདན་དུ་བསགས་སྦྱོང་གི་འབྲེལ་བ་ཡང་ཡང་བགྱིས་པའི་ཚེ་དད་མོས་ཀྱིས་རྒྱལ་ཁམས་པ་མངྒ་ལས་གསོལ་བ་བཏབ་པ་བཞིན་འགྲུབ་པར་གྱུར་ཅིག །
