ཕུར་པ་སྤུ་གྲི་རེག་ཕུང་གི་བརྒྱུད་འདེབས།

༄༅། །ཕུར་པ་སྤུ་གྲི་རེག་ཕུང་གི་བརྒྱུད་འདེབས།

ཁྱབ་བདག་དང་པོའི་སངས་རྒྱས་ཀུན་ཏུ་བཟང་། །

ཟུང་འཇུག་སྒྱུ་འཕྲུལ་ཡེ་ཤེས་རྡོ་རྗེ་སེམས། །

འབར་བའི་སྐུར་སྣང་བཛྲ་ཀུ་མཱ་ར། །

གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །

གསང་བའི་མཛོད་འཛིན་བདེ་བའི་འཁོར་ལོ་ཆེ། །

ཕྲིན་ལས་ཡོངས་གྲུབ་འོད་ཟེར་གླང་པོའི་ཞབས། །

ཧེ་རུ་ཀ་དཔལ་རྡོ་རྗེ་ཐོད་ཕྲེང་རྩལ། །

གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །

བཀའ་བབས་ཐུགས་ཀྱི་གཟུངས་མ་མཁར་ཆེན་བཟའ། །

ཟབ་གསང་རྒྱ་འགྲོལ་གཏེར་འབྱིན་སྤྲུལ་པའི་སྐུ། །

སྐལ་ལྡན་ཆོས་བདག་རྩ་བརྒྱུད་བླ་མ་ལ། །

གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །

སྣང་གྲགས་རིག་པ་དཀྱིལ་འཁོར་གསུམ་དུ་དག །

ཐལ་འབྱིན་རྣམ་བཞིའི་གྲུབ་མཐའ་ཚད་འཁྱོལ། །

རྩོལ་མེད་ཕྲིན་ལས་ཆགས་ཐོགས་མི་མངའ་བས། །

བདུད་ལས་རྣམ་རྒྱལ་གོང་འཕང་མཆོག་ཐོབ་ཤོག །

ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ། །དགེའོ།། །།