བོད་བརྒྱུད་ནང་བསྟན་གསུང་རབ་སྒྲ་བསྒྱུར་ཁང་།
ISSN 2753-4812
ISSN 2753-4812

བླ་མ་རྒྱང་འབོད།

English | བོད་ཡིག

༄༅། །བླ་མ་རྒྱང་འབོད།

 

ཨེ་མ་ཧོ།

ཟུང་འཇུག་བདེ་ཆེན་གྱི་ཞིང་ན། །

ཆོས་སྐུ་ཀ་དག་གི་ཡེ་ཤེས། །

འཁོར་འདས་མཉམ་གྲོལ་གྱི་སྤྱི་དཔལ། །

དྲིན་ཆེན་བླ་མ་དེ་མཁྱེན་ནོ། །

 

རང་གསལ་འགག་མེད་ཀྱི་ཞིང་ན། །

ལྷུན་གྲུབ་ཡེ་ཤེས་ཀྱི་འཁོར་ལོ། །

སྣང་སྲིད་རང་གྲོལ་གྱི་རིག་པ། །

རང་བྱུང་པདྨ་དེ་མཁྱེན་ནོ། །

 

ཐུགས་རྗེ་ཕྱོགས་མེད་ཀྱི་ཞིང་ན། །

འགྲོ་ཀུན་སྒྱུ་འཕྲུལ་གྱི་རོལ་གར། །

ཡེ་དག་གཞིར་རྫོགས་ཀྱི་ཀུན་བཟང་། །

བདེ་ཆེན་རྒྱལ་པོ་དེ་མཁྱེན་ནོ། །

 

བླ་མ་ཐག་རིང་ན་བཞུགས་ཀྱང་། །

ཡིད་ལ་ཝ་ལེ་རང་ཤར་བྱུང་། །

ཟླ་བ་རྒྱང་རིང་ན་གནས་ཀྱང་། །

དྭངས་མའི་མཚོ་ནང་དུ་ཤར་འདྲ། །

ཐུགས་རྗེ་ཉེ་རིང་ནི་མེད་པའི། །

བཀའ་དྲིན་འཁོར་མེད་དེ་མཁྱེན་ནོ། །

 

བདག་ཅག་འཁྲུལ་འཁོར་གྱི་སྣང་བའི། །

གཟུང་འཛིན་རང་ས་རུ་ཞིག་ནས། །

གདན་ཐོག་འདི་ཉིད་དུ་གྲོལ་མཛོད། །

དྲིན་ཅན་བླ་མ་དེ་མཁྱེན་ནོ། །

 

ཞེས་པའང་ཁྱུང་པོ་ངག་དབང་ཕྲིན་ལས་ཀྱི་ངོར་གཡུ་སྐྱེམས་པས་སོ། །སརྦ་མངྒ་ལཾ།།

 

མག་ལོག་གསེར་རྟ་རིན་པོ་ཆེ།

མག་ལོག་གསེར་རྟ་རིན་པོ་ཆེ།

གནས་ཚུལ་འཕར་མ།

ཕབ་ལེན།

EPUB  PDF 
This website uses cookies to collect anonymous usage statistics and enhance the user experience.
Decline
Accept