ལྡན་མ་ཚེ་རྒྱལ་སྐྱབས་ཀྱི་དྲིས་ལན།

༄༅། །ལྡན་མ་ཚེ་རྒྱལ་སྐྱབས་ཀྱི་དྲིས་ལན།

ཐུགས་རྗེས་འགྲོ་ཀུན་རྗེས་འཛིན་པ། །སྤྱན་རས་གཟིགས་མགོན་ལ་བཏུད་ནས། །དད་དང་ལྡན་པས་དྲིས་པའི་དོན། །མདོར་བསྡུས་ཙམ་ཞིག་བརྗོད་པར་བྱ། །ཕ་རོལ་ཕྱིན་པའི་གཞུང་ལུགས་ཀྱི། །ཡང་དག་ལྟ་བ་བསྒྲུབ་ཚུལ་ནི། །གཞན་གྱི་སྡེ་པས་བརྟགས་པ་ཡི། །ཕུང་པོ་ལས་གཞན་གང་ཟག་དང་། །རང་སྡེས་བརྟགས་པའི་རྡུལ་ཕྲན་དང་། །ཤེས་པ་སྐད་ཅིག་རྫས་གྲུབ་དང་། །གཉིས་མེད་ཡེ་ཤེས་བདེན་གྲུབ་རྣམས། །དབུ་མའི་གཞུང་ལས་གསུངས་པ་ཡི། །གཅིག་དང་དུ་བྲལ་ལ་སོགས་པའི། །རིགས་པས་དཔྱད་ཚེ་མ་རྙེད་པ། །མཐའ་བཞིའི་དང་པོ་དགག་པ་སྟེ། །སྤྲོས་བྲལ་ཀུན་གྱི་གཞི་མ་ཡིན། །དགག་བྱ་བདེན་པ་མ་གྲུབ་པས། །དེ་བཀག་སྟོང་ཉིད་ག་ལ་རྙེད། །གཉིས་དང་གཉིས་མིན་མ་རྙེད་པས། །གང་དུའང་མི་འཛིན་ལྟ་བ་ཡིན། །འདི་ལ་ཁ་ཅིག་ཧཱ་ཤང་གི །ལྟ་བ་ཡིན་ཞེས་སྨྲ་བ་ནི། །དཔྱད་ནས་མཐའ་བཞི་མ་རྙེད་དང་། །རང་དགར་རྟོག་པ་བཀག་ཙམ་ལ། །སྒོམ་གྱི་མཆོག་ཏུ་སྨྲ་བ་གཉིས། །ཁྱད་པར་མ་ཕྱེད་བཞིན་དུ་ཡང་། །ལྟ་བ་སྤྲོས་བྲལ་བསྣུབ་པའི་ཕྱིར། །རང་དགར་སྨྲ་བའི་བདུད་ཚིག་ཡིན། །དཔྱད་ཚེ་མཐའ་བཞི་མ་རྙེད་ཀྱང་། །ཤེས་པ་གསལ་ཙམ་མ་འགགས་པ། །བྱིང་རྒོད་ལ་སོགས་སྐྱོན་སྤོང་ནས། །རང་དགར་བཞག་པ་བསྒོམ་པ་ཡིན། །རྡོ་རྗེ་ཐེག་པའི་ལྟ་བ་ནི། །རིགས་པས་དཔྱད་ནས་གཏན་ཕབ་ཚེ། །འདི་ལས་ལྷག་པའི་རིགས་པ་མེད། །དེ་ཕྱིར་ཐོས་བསམ་ལྟ་བ་གཅིག །མན་ངག་སྒོ་ནས་བསྡུ་བའི་ཚེ། །སེམས་དང་སྒྱུ་མ་རང་བཞིན་མེད། །གསུམ་དུ་བསྡུས་ནས་བསྒོམ་པ་ཡང་། །གཉིས་ཀ་ལ་ཡང་ཁྱད་པར་མེད། །སྨིན་བྱེད་དབང་དང་རིམ་གཉིས་དང་། །བྱིན་རླབས་ཟབ་མོ་འགའ་ཞིག་ལས། །རང་བྱུང་ཡེ་ཤེས་སྐྱེ་ཚུལ་གྱིས། །རྡོ་རྗེ་ཐེག་པ་ཁྱད་པར་འཕགས། །འདི་ལ་བརྗོད་པ་མང་ཡོད་ཀྱང་། །གནས་སྐབས་མིན་པས་རེ་ཞིག་བཞག །འདི་ཙམ་གྱིས་ཀྱང་དད་ལྡན་གྱི། །རེ་བ་མ་ལུས་སྐོངས་གྱུར་ཅིག །ལྡན་མའི་སྐྱེ་བོ་ཚེ་རྒྱལ་སྐྱབས་ཀྱིས་རྒྱང་རིང་པོ་ནས་བསྐུལ་ནས་མང་དུ་ཐོས་པའི་དགེ་སློང་བསོད་ནམས་སེང་གེས་ཐུབ་བསྟན་རྣམ་པར་རྒྱལ་བའི་དགོན་པར་བྲིས་པའོ།། །།