Achi Chökyi Drolma—Tibetan
༄༅། །འབྲི་གུང་ཨ་ཕྱི་ཆོས་སྒྲོན་གྱི་གསེར་སྐྱེམས།
རྃ་ཡྃ་ཁྃ།
གསེར་སྐྱེམས་ཟག་མེད་བདུད་རྩིར་གྱུར། །
ཨོཾ་ཨཱཿཧཱུྃ།
དཀོན་མཆོག་རྩ་གསུམ་ཆོས་སྲུང་རྒྱ་མཚོ་དང་། །
ནོར་ལྷ་གཏེར་བདག་མགུལ་ལྷ་ཟོ་དོར་ཚོགས། །
བོད་སྐྱོང་བརྟན་མ་བཅུ་གཉིས་འཁོར་བཅས་ལ། །
གསེར་སྐྱེམས་མཆོད་པ་འབུལ་ལོ་ཕྲིན་ལས་མཛོད། །
ཁྱད་པར་ཡུམ་ཆེན་ཌཱ་ཀི་ཡོངས་ཀྱི་གཙོ། །
དབྱིངས་ཕྱུག་བདེ་ཆེན་ཆོས་སྒྲོན་འཁོར་བཅས་ལ། །
གཙང་མ་ཕུད་ཀྱི་མཆོད་པ་འདི་འབུལ་ལོ། །
བཞེས་ནས་བཅོལ་པའི་ཕྲིན་ལས་འགྲུབ་པར་མཛོད། །
མཁའ་ཀློང་པདྨོ་འཁྱིལ་པའི་ཟེའུ་འབྲུ་ལས། །
དངོས་གྲུབ་རྡོ་རྗེ་ཉི་མའི་ཟིལ་པ་ཡིས། །
རྣལ་འབྱོར་བདག་གི་ཁམས་ལྔ་ཉམས་པ་གསོས། །
གྲུབ་གཉིས་པདྨོ་བཞད་པའི་ཕྲིན་ལས་མཛོད། །
ཅེས་པའང་ལྕགས་ར་བླ་མ་འཇམ་དབྱངས་དགེ་ལེགས་ནས་བསྐུལ་ངོར་ཆོས་ཀྱི་བློ་གྲོས་པས་སོ། །སརྦ་དཱ་མངྒ་ལཾ།། །།
