Praise of Candrakīrti—Tibetan

Praise | Tibetan Mastersའཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། | Indian MastersCandrakīrti

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

Candrakīrti

Further Information:

༄༅། །སློབ་དཔོན་ཟླ་བ་གྲགས་པ་ལ་བསྟོད་པ་ཀུན་དགའི་དབྱངས་སྙན་ཞེས་བྱ་བ་བཞུགས།

བླ་མ་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །

གཉིས་འཛིན་ལྟ་བའི་མུན་པ་དྲུང་ནས་ཕྱུངས། །
གཉིས་མེད་ཡེ་ཤེས་ཇི་བཞིན་གཟིགས་མངའ་བས། །
ཤེས་བྱའི་ཆོས་ཀུན་སྐད་ཅིག་ཉིད་ལ་མཁྱེན། །
མགོན་པོ་བཅོམ་ལྡན་མཁྱེན་གཏེར་དེ་ལ་འདུད། །

ཐུབ་པའི་ཆོས་ཚུལ་མཐའ་ཡས་ཆུ་ཀླུང་དག །
རྒྱ་མཚོ་ཆེན་པོར་རོ་གཅིག་འབབ་པ་ལྟར། །
ངེས་དོན་མཐར་ཐུག་དབུ་མ་ཆེན་པོ་ཞེས། །
དུས་གསུམ་རྒྱལ་བའི་གཤེགས་ཤུལ་དེ་ལ་འདུད། །

གྲུབ་པའི་མཐའ་ཡི་རྣམ་པར་དཔྱད་པའི་བློས། །
དྲངས་པའི་རྣམ་བཞག་ཤིན་ཏུ་རྒྱ་ཆེ་ཡང་། །
ཀུན་གྱི་དབུས་ན་རི་རྒྱལ་ལྷུན་པོ་ལྟར། །
མངོན་པར་མཐོ་བ་དཔལ་ལྡན་ཀླུ་དབང་རྒྱལ། །

དེ་སྲོལ་འཛིན་པ་ཉི་ཟླ་ལྟ་བུ་ནི། །
ཐལ་རང་གཉིས་ཞེས་ཡོངས་སུ་གྲགས་པ་ལས། །
ལྷ་ཡི་བདུད་རྩི་ལྟ་བུ་ཐལ་འགྱུར་ཞེས། །
ཕྱོགས་ལས་རྣམ་པར་རྒྱལ་བ་ཆེན་པོར་བསྔགས། །

སངས་རྒྱས་བསྐྱང་གིས་ལེགས་པར་མཁྱེན་མཐོང་ནས། །
འཕགས་པའི་ས་བརྙེས་འཇམ་དཔལ་སྤྲུལ་པ་ནི། །
ཟླ་བ་གྲགས་པའི་བློ་གྲོས་འོད་དཀར་གྱིས། །
ཟབ་དོན་ཀུ་མུཏ་ཡོངས་སུ་འབྱེད་ལ་འདུད། །

སྒྲོ་དང་སྐུར་བའི་ཕྱོགས་སུ་མ་ལྷུང་ཞིང་། །
རྟག་ཆད་མཐའ་སྤངས་ཟབ་མོ་སྟོང་པ་ཉིད། །
རྒྱ་ཆེར་སྟོན་ལ་ངེས་ཤེས་ཟླ་མེད་པ། །
བློ་གྲོས་སྤོབས་པའི་གཏེར་ཆེན་ཁྱོད་ལ་འདུད། །

སློབ་དཔོན་ཙནྡའི་ཞབས་ཀྱང་ཁེངས་པ་བསྙིལ། །
རང་མཐུ་ཟད་ནས་སྙིང་རྗེའི་དབང་ཕྱུག་ལ། །
བརྡ་སྤྲོད་གྲོགས་སུ་སྦྲན་ཞུས་དེ་ལྟ་བུའི། །
འཛམ་གླིང་མཁས་པའི་གཙུག་རྒྱན་གྱུར་ལ་འདུད། །

སྣང་སྲིད་ཆོས་ཀུན་བདེན་མེད་སྒྱུ་མར་སྟོན། །
རི་མོར་བྲིས་པའི་བ་ལས་འོ་མ་འཇོས། །
སྟོང་དང་རྟེན་འབྱུང་བརྡ་ཡིས་དངོས་ཞེན་བཟློག །
རྣལ་འབྱོར་དབང་ཕྱུག་ཆེན་པོའི་ཞབས་ལ་འདུད། །

བསྟན་ལ་སྡང་བའི་དུ་རུ་ཀའི་དམག་ཚོགས། །
སྟོབས་ལྡན་རྡོ་ཡི་གཉིས་འཐུང་ལ་ཞོན་ནས། །
ཕྱིར་བཟློག་མཛད་ཚེ་རང་གཞན་གནོད་འཚེ་བྲལ། །
ངོ་མཚར་བྱམས་པའི་ཆོ་འཕྲུལ་སྟོན་ལ་འདུད། །

གང་དང་འཇམ་དཔལ་རྡོ་རྗེ་གཉིས་སུ་མེད། །
ཤེས་བྱའི་མཁའ་དབྱིངས་ཡངས་པོར་བགྲོད་པ་ཡི། །
བློ་གྲོས་ཆགས་ཐོགས་སྤངས་པའི་ཐམས་ཅད་མཁྱེན། །
དཔལ་ལྡན་ཟླ་བ་གྲགས་པའི་ཞབས་ལ་འདུད། །

དེང་བཟུང་བྱང་ཆུབ་སྙིང་པོའི་མཐར་ཐུག་བར། །
ཐེག་མཆོག་དབུ་མའི་གཞུང་དང་མི་འབྲལ་ཞིང་། །
ཚུལ་བཞིན་རྒྱུད་ལ་སྐྱེས་ནས་ལྟ་ངན་གྱི། །
མུ་སྟེགས་བྲག་རི་རྩད་ནས་འཇོམས་གྱུར་ཅིག །

འཇམ་དཔལ་དཔའ་བོས་མཁྱེན་པའི་དངོས་གྲུབ་སྦྱིན། །
སྙིང་རྗེའི་བདག་པོས་བྱང་སེམས་བདུད་རྩི་སྟེར། །
གསང་བདག་དཔའ་བོས་རྡོ་རྗེའི་དབང་བསྐུར་ནས། །
རིགས་གསུམ་རྒྱལ་བའི་ཕྲིན་ལས་ཡོངས་རྫོགས་ཤོག །

ཅེས་པའང་སློབ་དཔོན་ཆེན་པོ་འདིའི་ལུགས་སྲོལ་ལ་དང་བའི་སྣང་བ་ཐོབ་པ་གཙུག་ལག་ལུང་རིགས་ཉི་མ་སྨྲ་བའི་སེང་གེས་རྡོ་རྗེ་གླིང་དུ་བྲིས་པའོ།། །།

• Download this text: EPUB MOBI PDF