Daily Kagyé Practice—Tibetan

Kagyé | Sādhanas | Tibetan Mastersའཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

Kagyé

Further Information:

༄༅། །བཀའ་བརྒྱད་རྒྱུན་ཁྱེར་བཞུགས་སོ། །

བླ་མ་དཔལ་ཆེན་ཞི་ཁྲོའི་ལྷར། །

གུས་པས་སྐྱབས་མཆི་སེམས་མཆོག་བསྐྱེད། །

སྟོང་པའི་ངང་ལས་སྐད་ཅིག་གིས། །

རྡོ་རྗེ་བྲག་ཆེན་པད་ཟླ་ཉི། །

བྱོལ་སོང་གཙོ་བརྒྱད་ཕྱོགས་སྐྱོང་དང་། །

ལྷ་ཆེན་རྣམས་ཀྱི་གདན་སྟེང་དུ། །

རང་རིག་ཧཱུྃ་སྔོན་འབར་བ་ལས། །

དཔལ་ཆེན་ཆེ་མཆོག་ཧེ་རུ་ཀཿ །

དབུས་མཐིང་གཡས་དཀར་གཡོན་དམར་ཞལ། །

གཡས་གསུམ་རྡོ་རྗེ་གཡོན་གསུམ་བྷན། །

དཔལ་དང་དུར་ཁྲོད་ཆས་ཀྱིས་བརྒྱན། །

ཡུམ་ཆེན་གནམ་ཞལ་དབྱིངས་ཕྱུག་འཁྱུད། །

དབུ་རྒྱན་ཀུན་བཟང་རིགས་ལྔ་དང་། །

སྐུ་ལ་དཔལ་དགུའི་ལྷ་རྣམས་རྫོགས། །

ཐུགས་ཀར་རང་འདྲའི་ཡེ་ཤེས་སེམས། །

དེ་ཡི་ཐུགས་ཀར་ཀུན་ཏུ་བཟང་། །

ཐུགས་དབུས་རྡོ་རྗེའི་ལྟེ་བ་རུ། །

ཉི་ཟླའི་གའུ་ཧཱུྃ་སྔོན་པོ། །

གསལ་ཞིང་དྭངས་པ་རྟག་འཆར་ལས། །

སྔགས་ཕྲེང་འཕྲོས་ཤིང་ཞི་ཁྲོའི་ལྷའི། །

ཐུགས་རྒྱུད་བསྐུལ་བས་དོན་གཉིས་བྱས། །

སྣོད་བཅུད་དཔལ་ཆེན་དཀྱིལ་འཁོར་ཤར། །

ཨོཾ་བོ་དྷི་ཅིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ

ཞེས་དང་།

ཨོཾ་བཛྲ་ཀྲོ་དྷཱ་མ་ཧཱ་ཤྲཱིཿཧེ་རུ་ཀ་ཧཱུྃ་ཕཊཿ མ་ཧཱ་ཀྲོ་དྷཱི་ཤྭ་རཱི་སྟྭཾ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ།

ཞེས་དང་།

ཨོཾ་བཛྲ་ཙཎྜ་སརྦ་དུཥྚན་ཏཱ་ཀ་ཧ་ན་ད་ཧཱ་པ་ཙ་ཧཱུྃ་ཕཊཿ

ཅེས་པ་རྣམས་བཟླས་མཐར།

སྣང་ཆའི་ལྷ་སྐུ་འོད་གསལ་ངང་། །

སླར་ཡང་གཉུག་མའི་ཕྱག་རྒྱར་ལྡང་། །

ཨོཾ་ཨཱཿཧཱུྃ༔

ཞེས་བྱིན་བརླབ་དགེ་བསྔོ་ཤིས་བརྗོད་རྣམས་བྱའོ། །

ཞེས་པའང་ལྭ་དཀར་བུ་བསོད་ནམས་རྒྱལ་མཚན་གྱི་བཞེད་ངོར། ཆོས་ཀྱི་བློ་གྲོས་པས་སོ།། །།

 

• Download this text: EPUB MOBI PDF