ཐུན་མིན་རྫོགས་ཆེན་སྐོར་གྱི་གདམས་པ་ལས་སྤར་བྱང་སྨོན་ཚིག
༄༅། །ཐུན་མིན་རྫོགས་ཆེན་སྐོར་གྱི་གདམས་པ་ལས་སྤར་བྱང་སྨོན་ཚིག
ཨོཾ་སྭ་སྟི།
དུས་གསུམ་རྒྱལ་བ་རྒྱ་མཚོ་གཤེགས་པའི་ལམ། །
བརྒྱད་གསུམ་རིག་འཛིན་རྒྱ་མཚོའི་ཐུགས་ཀྱི་བཅུད། །
རབ་འབྱམས་རྒྱུད་སྡེ་རྒྱ་མཚོའི་སྦས་པའི་དོན། །
འོད་གསལ་ཡེ་ཤེས་རྒྱ་མཚོའི་སྙིང་པོ་ནི། ༡ །
བཅུ་བདུན་རྒྱུད་ཞེས་རྒྱལ་མཚན་ཏོག་ལྟར་མཐོ། །
གསང་བའི་བདག་པོ་དགའ་རབ་དཔའ་བོ་ལ། །
སྟོན་པ་རྡོ་རྗེ་སེམས་དཔས་ཐུགས་མཛོད་བྱིན། །
དེ་ལས་རིམ་བརྒྱུད་རྫོགས་ཆེན་སྡེ་གསུམ་ལས། ༢ །
སྙིང་ཁྲག་དྭངས་མ་ལྟ་བུའི་མན་ངག་སྡེ། །
ཐེག་ཀུན་མཐར་ཐུག་ལྷུན་པོའི་རྩེ་མོ་བཞིན། །
གང་དེར་ཤིང་རྟའི་བཀའ་སྲོལ་རྣམ་གཉིས་ཀྱི། །
མན་ངག་སྙན་ནས་སྙན་དང་ཐུགས་བརྒྱུད་ནས། ༣ །
དེང་དུས་ཀུན་མཁྱེན་བླ་མར་བཀའ་བབས་པ། །
རྗེས་འཇུག་རྣམས་ལ་ཐུགས་བརྩེས་གདམས་པའི་གཏེར། །
ཚེ་འདི་ཉིད་ལ་མངོན་སུམ་གྲོལ་བའི་ཆོས། །
ཀུན་ཏུ་བཟང་པོའི་གསང་མཛོད་འདི་རྨད་བྱུང་། ༤ །
ཐེག་མཆོག་རྒྱལ་པོའི་རིགས་ཅན་སྣོད་ལྡན་ལ། །
ཕན་པར་འགྱུར་སྙམས་སྤར་གྱི་འཕྲུལ་ཆེན་འདི། །
འོད་གསལ་སྙིང་པོའི་བསྟན་པའི་བཙས་སུ་བསྐྲུན། །
དགེ་འདིས་བདག་གཞན་སྐུ་གསུམ་རང་གྲོལ་ཤོག ༥ །
ཅེས་པའང་རྣམ་དཀར་སྒྲུབ་པ་པོ་འཇམ་དབྱངས་ཆོས་ཀྱི་བློ་གྲོས་པས་བྲིས་པ་དགེ་ལེགས་འཕེལ། སརྦ་དཱ་ཀ་ལྱཱ་ཎཾ་བྷ་ཝ་ཏུ།། །།
