ཛཾ་ནང་བཻ་རོའི་སྒྲུབ་གནས་ཀྱི་དཀར་ཆག

༄༅། །ཛཾ་ནང་བཻ་རོའི་སྒྲུབ་གནས་ཀྱི་དཀར་ཆག་བཞུགས་སོ།།

ཨོཾ་སྭསྟི། རྡོ་རྗེའི་བླ་མ་པདྨ་ཡིས། །རྡོ་རྗེའི་གར་གྱི་བྱིན་བརླབས་པ། །རྡོ་རྗེའི་མཚན་པའི་རི་བོའི་ཁོངས། །རྡོ་རྗེ་ཐེག་པའི་འབྱུང་གནས་ཀྱི། །གནས་ཆེན་གནས་ཕྲན་གྲངས་མེད་པ། །ཇི་སྙེད་གྲགས་པ་ཀུན་གྱི་གཙོ། །ཛཾ་གྱི་ལུང་པར་སྒྲུབ་གནས་ཀྱི། །གཙུག་ནོར་པདྨ་ཤེལ་ཕུག་ཡིན། །དེ་ཡི་མདུན་དུ་མཎྜལ་ཚུལ། །མངའ་བདག་ཆོས་རྒྱལ་ཡབ་སྲས་ཀྱིས། །ཨོ་རྒྱན་ཡབ་ཡུམ་གཙོ་འཁོར་ལ། །ཀུན་བཟང་མཆོད་སྤྲིན་སྤྲོ་བའི་གཞི། །དགོངས་པའི་རྩལ་ཆེན་ཡོངས་རྫོགས་པ། །ཡེ་ཤེས་སྤྱན་ལྡན་བཻ་རོ་རྗེའི། །བསྒྲུབ་པ་མཛད་པའི་ཕུག་ཆེན་པོར། །རྩ་གསུམ་ལྷ་ཚོགས་མངོན་སུམ་བཞུགས། །བླ་གཏེར་ཆོས་ནོར་བགྲང་ཡས་པ། །བསྟན་པའི་བཙས་སུ་སྦས་པ་ཉིད། །ཕྱི་མའི་དུས་སུ་རིག་པ་འཛིན། །འགྲོ་འདུལ་སྤྲུལ་པའི་སྒྱུ་མས་གཏོན། །ཕ་ཝང་ངོས་ལ་བརྡ་རིས་དང་། །ཨོ་རྒྱན་རྗེ་འབང་ཕྱག་ཞབས་རྗེས། །སངས་རྒྱས་བྱང་སེམས་སྣང་བརྙེན་སོགས། །ཕྱག་རྒྱའི་གཟུགས་སུ་བཀྲ་བ་དང་། །བཻ་རོའི་ཕྱག་འཁར་འཛུག་པ་ལས། །འཁྲུངས་པའི་ལྗོན་ཤིང་བཟང་པོ་སོགས། །ཁྱད་པར་འཕགས་པའི་བཀོད་པ་ནི། །མངོན་སུམ་མིག་གི་བདུད་རྩིར་གྲུབ། །རྩེ་གཅིག་དད་མོས་དྲག་པོ་ཡིས། །ཕྱག་བསྐོར་མཎྜལ་ཚོགས་སྐོང་དང་། །ལས་གཞིའི་མེ་མཆོད་སྒྲུབ་པ་སོགས། །བྱས་པས་འཕྲལ་རྐྱེན་ནད་གདོན་ཞི། །བསོད་ནམས་ལྷུན་པོ་ལྟར་མཐོ་ཞིང་། །ཡེ་ཤེས་ཉི་ཟླའི་དཀྱིལ་འཁོར་གསལ། །འོད་གསལ་ཁོར་ཡུག་ཀུན་ཏུ་ཁྱབ། །ཕན་བདེའི་པད་ཚལ་རྒྱས་པར་འགྱུར། །ཅེས་པའང་ཛཾ་ནང་གནས་འཛིན་བླ་མ་ནས་ལན་གྲངས་བསྐུལ་བ་དང་། ཉེ་ཆར་མཁྱེན་བརྩེ་སྤྲུལ་པའི་སྐུ་འཇམ་དབྱངས་ཆོས་ཀྱི་དབང་པོས་གསུང་གིས་ནན་ཏན་བསྐུལ་བས་མཚམས་སྦྱར་ཏེ། རིག་འཛིན་གྱི་བཙུན་པ་པདྨ་ཡེ་ཤེས་རྡོ་རྗེས་བདེ་ཆེན་མཚོ་རྒྱལ་གྱི་སྒྲུབ་ཕུག་དབུ་རྩེར་སྨྲས་རིམ་བཞིན། ཡི་གེ་པ་བསྐུལ་བ་པོས་མཛད་པ་འདིས་ཀྱང་བསྟན་འགྲོའི་དོན་མཐའ་ཡས་པའི་རྒྱུར་གྱུར་ཅིག སྐོར་བ་གཅིག་ལ་ཡིག་དྲུག་འབུམ་ཐེར་འགྱུར་ངེས་དང་། །སྐོར་ཚད་ཁྲི་གཅིག་ཆིག་སྟོང་ཆིག་བརྒྱ་བཅུ་ཡིས་རྫོགས་པ་ཡིན་ནོ། འ་ཨ་ཧ་ཤ་ས་མ། སརྦ་མངྒ་ལཾ། དགེའོ།། །།

ཛཾ་ནང་གནས་ཤིང་དཀར་ཆག་འདི་རྡོ་བརྐོས་ཆག་འཐོར་སོང་བ་ལྷུ་བསྒྲིགས་ཏེ་ཞལ་བཤུས་པ་ཡིན།