Cintāmaṇi Instruction—Tibetan

Vajrasattva | Sādhanas | Tibetan Mastersམཁན་ཆེན་འཇིགས་མེད་ཕུན་ཚོགས།

English | བོད་ཡིག

མཁན་ཆེན་འཇིགས་མེད་ཕུན་ཚོགས།

Vajrasattva

Further Information:
Download this text:

༄༅། །དཔལ་ལྡན་རྡོ་རྗེ་སེམས་དཔའ་ལ་བརྟེན་ནས་སྡིག་སྒྲིབ་སྦྱོང་ཞིང་དོན་གཉིས་སྒྲུབ་ཐབས་ཀྱི་མན་ངག་ཙིནྟ་མ་ཎི་ཞེས་བྱ་བ་བཞུགས་སོ། །

 

སྐྱབས་སུ་འགྲོ་བ་ནི།

ན་མོ།

འདི་ནས་བྱང་ཆུབ་སྙིང་པོའི་བར། །

རིགས་དང་དཀྱིལ་འཁོར་རྒྱ་མཚོའི་བདག །

བླ་མ་རྡོ་རྗེ་སེམས་དཔའ་ལ། །

ཡིད་ཆེས་དད་པས་སྐྱབས་སུ་མཆི། །

 

སེམས་བསྐྱེད་ནི།

མཁའ་མཉམ་འགྲོ་བ་མཐའ་དག་ཀུན། །

གཏན་བདེའི་ས་ལ་དབུགས་དབྱུང་ཕྱིར། །

ལུས་ངག་ཡིད་ཀྱི་བརྩོན་པ་ཀུན། །

བྱང་ཆུབ་ལམ་དང་འབྲལ་མི་བྱ། །

 

སྒྲུབ་ཐབས་ནི།

ཨཱཿ རང་མདུན་མཆོད་སྤྲིན་རྒྱ་མཚོའི་དབུས། །

པད་དཀར་ཟླ་བའི་གདན་སྟེང་དུ། །

རིགས་་འདུས་དཔལ་ལྡན་རྡོ་རྗེ་སེམས། །

དཀར་གསལ་ཟླ་བ་རྒྱས་པའི་་མདངས། །

ཞལ་གཅིག་ཕྱག་གཉིས་རྡོ་དྲིལ་བསྣམས། །

ལོངས་སྐུའི་ཆས་རྫོགས་དཀྱིལ་ཀྲུང་བཞུགས། །

ཡེ་ཤེས་འོད་ཟེར་ཕྱོགས་བཅུར་འཕྲོ། །

དྭངས་བའི་ཡིད་ངོར་ལྷམ་མེར་གསལ། །

 

ཀྱེ་མ་བླ་མ་རྡོ་རྗེ་སེམས། །

སྔོན་གྱི་དམ་བཅའ་ཉེར་དགོངས་ནས། །

བདག་སོགས་ཉམ་ཐག་སེམས་ཅན་རྣམས། །

ཐུགས་རྗེས་རྗེས་སུ་འཛིན་པར་མཛོད་། །

ཐོག་མེད་དུས་ནས་ད་བར་དུ། །

ལུས་ངག་ཡིད་ཀྱི་སྡིག་ལྟུང་རྣམས། །

ཇི་ལྟར་ཁོང་དུ་དུག་སོང་ལྟར། །

གནོང་འགྱོད་དྲག་པོས་མཐོལ་ཞིང་བཤགས། །

ཕྱིན་ཆད་སྲོག་ལ་བབས་གྱུར་ཀྱང་། །

མི་འོས་ལས་རྣམས་མི་བགྱིད་ན། །

འཛུམ་པའི་སྤྱན་གྱིས་གཟིགས་མཛོད་ལ། །

འཇམ་མཉེན་ཕྱག་གིས་དབུགས་དབྱུང་སྩོལ། །

བདག་དང་སེམས་ཅན་ཐམས་ཅད་ཀྱི། །

དམ་ཚིག་ཉམས་ཆག་ཀུན་དག་ཅིང་། །

མཆོག་དང་ཐུན་མོང་དངོས་གྲུབ་ཀུན། །

ད་ལྟ་ཉིད་དུ་འགྲུབ་པར་མཛོད། །

ཅེས་གསོལ་འདེབས་ཀྱི་ཚུལ་དུ་སྟོབས་བཞི་ཚང་བའི་སྒོ་ནས།

ཨོཾ་བཛྲ་ས་ཏྭ་ཧཱུྃ།

འབུམ་ཕྲག་བཞི་བཟླས་ན་རྩ་བའི་དམ་ཚིག་ཉམས་པའང་བྱང་བར་འགྱུར་རོ། །ས་མ་ཡ།

 

ཧཱུྃ། འདིས་མཚོན་དུས་གསུམ་དགེ་ཚོགས་ཀུན། །

མཐའ་ཀླས་འགྲོ་བའི་དོན་དུ་བསྔོ། །

ཀུན་ཀྱང་རྡོ་རྗེ་སེམས་དཔའ་ཡི། །

གོ་འཕང་མྱུར་དུ་འཐོབ་པར་ཤོག །

 

ཨོཾ། གང་སྣང་སྐུ་ཡི་རྒྱན་དུ་དག །

སྒྲ་གྲག་སྔགས་ཀྱི་རོལ་བར་རྫོགས། །

དྲན་རྟོག་ཐུགས་ཀྱི་ངང་དུ་སྨིན། །

ཕུན་ཚོགས་དཔལ་འབར་བཀྲ་ཤིས་ཤོག །

 

ཞེས་པ་འདི་མེ་གླང་ཟླ་ ༣ ཚེས་ ༡༡ ལ་ངག་དབང་བློ་གྲོས་མཚུངས་མེད་པའི་རིག་ཁམས་དྭངས་བའི་རྩལ་ལས་ཤར་བ་ལྟར་སློབ་བུ་ཚུལ་ཁྲིམས་དྲི་མེད་ཀྱིས་བྲིས་པ་དགེ་བར་གྱུར་ཅིག །སྤྱི་ལོ་ ༡༩༩༧ ཟླ་ ༤ ཚེས་ ༡༧ ལའོ།། །།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK