Disheartened by Circumstances—Tibetan
Literary Genres › Songs and Poems | Literary Genres › Acrostic | བོད་ཀྱི་བླ་མ། › ཀློང་ཆེན་རབ་འབྱམས།
ཀློང་ཆེན་རབ་འབྱམས།
Courtesy of Himalayan Art Resources
Further information:
༄༅། །རྐྱེན་ལ་ཁམས་འདུས་པ་ཀ་ཁ་སུམ་ཅུ་ཞེས་བྱ་བ་བཞུགས།
ཨོཾ་སྭསྟི་སིདྡྷཾ།
གང་གིས་བསྟེན་པས་རྣམ་གྲོལ་མཛོད་བརྙེས་ཤིང་། །
རིག་དང་གྲོལ་བའི་ཕུན་ཚོགས་འབྱུང་བའི་གཞི། །
འགྲོ་ཀུན་དགེ་ལེགས་བསྐྲུན་པའི་གཉེན་གཅིག་པུ། །
ཚོགས་མཆོག་དགེ་འདུན་སྙན་དུ་ཚིག་འགའ་གསོལ། །
ཀ་ལིང་ཡུལ་དུ་སྲིན་པོ་རྒྱུ་བ་བཞིན། །
ཁ་བ་ཅན་དུ་ཆོམ་རྐུན་ཁམས་པའི་རིགས། །
ག་རུ་གནས་ཀྱང་གྲོང་རྡལ་འཇོམས་བྱེད་པའི། །
ང་རྒྱལ་ཆགས་སྡང་རྒྱུ་བ་གཟིགས་ལགས་སམ། །
ཅ་ཅོའི་རང་བཞིན་ཉོན་མོངས་ཁམས་པའི་ཚོགས། །
ཆ་འོ་བཞིན་དུ་ཕྱོགས་བཅུར་རྒྱུ་བྱེད་ཅིང་། །
ཇ་ཆང་འཐུང་ཞིང་སྲོག་ཆགས་གསོད་བྱེད་པ། །
ཉ་པ་བཞིན་དུ་གནས་པ་གཟིགས་ལགས་སམ། །
ཏ་ལའི་ཚལ་དུ་སྟག་གཟིག་རྒྱུ་བ་བཞིན། །
ཐ་ཆད་ཆང་འཚོང་རྐུན་པོའི་གནས་རྣམས་སུ། །
ད་བྱིད་ཟོས་བཞིན་འདོད་ཆགས་མེས་གདུངས་པས། །
ན་ཆུང་ཚོལ་ཕྱིར་རྒྱུག་པ་གཟིགས་ལགས་སམ། །
པ་ནས་གང་བའི་ལྡུམ་ར་ངན་པ་འམ། །
ཕ་རོལ་ཆང་དང་སྒོག་བཙོང་དྲིས་སུན་འབྱིན། །
བ་ལང་བཞིན་དུ་གཙང་བཙོག་མི་ཤེས་པས། །
མ་རབས་དུད་འགྲོའི་ཁམས་པ་གཟིགས་ལགས་སམ། །
ཙ་ནས་རང་ལ་རྒོལ་བ་བྱུང་བའི་ཚེ། །
ཚ་ཟེར་བྱེད་ལ་མུན་པའི་སྐྱེས་བུའམ། །
ཛ་ར་སྡང་རའི་རྒྱལ་ཕྲན་ཇི་བཞིན་དུ། །
ཝ་སྐྱེས་བཞིན་དུ་འབྲོས་པ་གཟིགས་ལགས་སམ། །
ཞྭ་རྨོག་གྱོན་ཅིང་ཉེས་མེད་ཡུལ་རྣམས་སུ། །
ཟ་མའི་ཆེད་དུ་མི་རྣམས་རྡུང་བྱེད་ཅིང༌། །
འ་ཅག་ཁྲེལ་མེད་ཡིན་ཞེས་སྨྲ་བ་ཡི། །
ཡ་རབས་ཚུལ་ཆད་ཁམས་པ་གཟིགས་ལགས་སམ། །
ར་ལུག་བ་ལང་ལ་སོགས་གསོད་པའི་ཕྱིར། །
ལ་ཆུ་འཕྲང་གསུམ་བརྒལ་ནས་གྲོང་རྡལ་འཇོམས། །
ཤ་ཟ་ཆང་འཐུང་བུད་མེད་བསྟེན་པ་ཡི། །
ས་སྟེང་བསྟན་པའི་ཆོམ་རྐུན་གཟིགས་ལགས་སམ། །
ཧ་ཅང་ཐལ་བའི་བྱེད་ཚུལ་ངན་པ་འདི། །
ཨ་ཁུ་ཁམས་པའི་ཐོས་བསམ་སྒོམ་གསུམ་ཡིན། །
ཡི་གེ་སུམ་ཅུའི་ཚིགས་སུ་བཅད་པ་འདི། །
གནས་ནས་ཕུད་ཚེ་ལམ་ཀའི་བཞི་མདོར་སྦྱར། །
ཅེས་པ་འདི་ཡང་བསམ་ཡས་པ་ངག་གི་དབང་པོས་གསང་ཕུ་ནེའུ་ཐོག་ཏུ་སྦྱར་བ་འདིས་དགེ་ལེགས་འཕེལ་བའི་རྒྱུར་གྱུར་ཅིག། །།
