ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེའི་སྙིང་པོ་ལས། ལུས་སྦྱོང་སྐོར་གྱི་དཔེ་རིས།
༄༅། །ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེའི་སྙིང་པོ་ལས། ལུས་སྦྱོང་སྐོར་གྱི་དཔེ་རིས།།
རྣམ་པ་ཉི་ཤུར་འདུས་པའི་དང་པོ་སྐྱིལ་ཀྲུང་བཅས་ཏེ་ལག་པ་འཁྱུད། གཡོན་དང་གཡས་ལའོ། །དེས་ཡན་ལག་གི་ནད་སེལ། ཅེས་སོ།།
མཆན་རྡེབ།
གཉིས་པ་བསྐུ་མཉེའི་ཚུལ་དུ་འཕུར་རོ། དེས་ལུས་ལ་དྲོད་སྐྱེའོ། ཅེས།
ལག་པ་གཡས་གཡོན་དུ་འཕུར་བྱུག་ལན་གསུམ། ཐལ་མོ་བསྣོལ་ཏེ་ལག་མཐིལ་མཉེ་ཞིང་གདོང་པ་དང་། མདུན་རྒྱབ་གཉིས་སུ་ཤད་ཀྱིས་བྱུག རྐང་ལག་གི་རྒྱ་བཤིག འཕར་སྟངས་ཕྱེད་བཅས་རྐང་པ་གཉིས་འཕུར་བྱུག་ལན་གསུམ། དེ་མཐར་ཁུ་ཚུར་བརླ་སྟེང་དུ་བཞག་ལ་ཕུང་གི་བརྡབ་ཆུང་གསུམ།
གསུམ་པ་ནི། སོར་མོ་བསྣོལ་ལ་བྲང་ལ་གཏད་དེ་ཕྱིར་འཐེན་པས་བྲང་གི་ནད་སེལ། ཅེས།
བྲང་ནས་ཕྱི་ནང་ངམ། ཡང་ན་ཐད་ཀར་འཕུར་བྱུག་བྱེད།།
བཞི་པ། དཔུང་གཅུས་ལག་པ་གཡས་དང་གཡོན་དུ་སྤྲུགས་པས་དཔུང་པའི་ནད་སེལ། ཅེས།
ལུས་ཕྲག་གཡས་དང་གཡོན་དུ་གཅུ། ལག་ངོ་གྱེན་བསྟན་སྟ་ཟུར་གཡས་གཡོན་དུ་སྤྲུགས། རྒྱ་བཤིག་ཞེས་སྐྱིལ་ཀྲུང་དོར། སྐྱིལ་ཀྲུང་བཅའ།།
ལྔ་པ་ནི། ལག་པ་གཉིས་བྲང་ནས་ཁུ་ཚུར་བཅས་པ་ཕྱིར་འཕངས་པས་ཤ་ལྤགས་ཆུ་སེར་གྱི་ནད་སེལ། ཅེས།
ཁུ་ཚུར་བྲང་ངོས་ནས་ཚིགས་རྒྱབ་སྤྲོད་པ་ཕྱིར་སྟ་ཟུར་གཡས་གཡོན་དུ་ཐད་ཀར་འཕངས།།
དྲུག་པ་ནི། ལག་པ་གཉིས་དཔུང་པ་གཉིས་ལ་བསྣོལ་ནས་བསྡམས་ཏེ་ལུས་ཀུན་གཅུད་པས་རྐེད་པའི་ནད་སེལ་ལོ། ཅེས།
ལུས་ཕྲག་གཡས་དང་གཡོན་དུ་ཤད་ཀྱུ།།
བདུན་པ་ནི། རྐང་པ་གཉིས་བརྐྱངས་པའི་བྲང་གཉིས་ནས་ལག་པ་གཉིས་ཀྱིས་འཐེན་པས་ཆུ་རྒྱུས་ཀྱི་ནད་སེལ་ལོ། ཅེས།
རྐང་གཉིས་ཀྱི་སྔ་རྟིང་ནས་གྱེན་དུ་ལག་གཉིས་ཀྱིས་འཐེན། ཡང་སྐྱིལ་ཀྲུང་བཅའ།།
བརྒྱད་པ་ནི། ལག་པ་གཡས་གཡོན་གཞུ་འགེངས་པ་ལྟར་བྱས་པས་ལག་པའི་ཚིགས་དང་སོག་ཕྲག་གི་ནད་སེལ་ལོ། ཅེས།
ལག་གཉིས་ཁུ་ཚུར་ཐད་ཀར་རྐྱང་ཞིང་གྲུ་མོ་བགྲད་དེ་གཡོན་དང་གཡས་སུ་ཚུར་འཐེན།།
དགུ་པ་ནི། ལག་པའི་ཁུ་ཚུར་གཉིས་མདུན་རི་འཕུལ་བའི་ཚུལ་དུ་བྱས་པས་རོ་སྟོད་ཀྱི་ཤ་རྒྱས་པ་དང་ལག་པའི་སྤེ་ཤའི་ནད་སེལ་ལོ། ཅེས།
ལག་གཉིས་ཁུ་ཚུར་ཁ་ནང་བསྟན་དུ་བསྣོལ་ཏེ་བྲང་ངོས་ནས་དིང་ཁུང་བར་དུ་འཕུར་བྱུག་ལན་གསུམ།།
བཅུ་པ་ནི། ལུས་རྒྱབ་དང་མདུན་དུ་དགུག་པས་མཁལ་ནད་མཚེར་ནད་སེལ་ལོ། ཅེས།
རྒྱ་བཤིག་སྟེ་ཡར་ལངས་མཆན་རྡེབ་བཅས་ཁུར་མགོ་རྒྱང་བཞིན་ལུས་དགྱེ་དགུ་བྱེད།།
བཅུ་གཅིག་པ་ནི། ལག་པའི་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ་ཏེ་མཛུབ་མོ་གཉིས་སྤྱི་གཙུག་དྲང་པོར་བཞག་པས་རྩིབ་ལོགས་ཀྱི་ནད་སེལ་ལོ། ཅེས།
མཐེའུ་ཆུང་གཉིས་ཕན་ཚུན་འཁྱུད། མཐེ་བོང་བསྐུམ། མཛུབ་མོ་གཉིས་ཀྱི་རྩེ་སྤྱི་བོར་བཙུགས།
བཅུ་གཉིས་པ་ནི། ལྟེ་བ་ནང་དུ་འཐེན་པས་མ་ཞུ་བ་དང་ཕོ་བའི་ནད་སེལ་ལོ། ཅེས།
ལག་གཉིས་ཁུར་མགོ་པུས་སྟེང་དུ་བཞག་བཞིན། ལྟེ་བ་ནང་དུ་འཐེན་ལ་སྒལ་ཚིགས་ཀྱང་ཕྱིར་འཕེན་པ་ལན་གྲངས་གསུམ་མོ།།
བཅུ་གསུམ་པ་ནི། རྐང་ལག་བཞི་ས་ལ་བཙུགས་ལ་མགོ་ཅོག་ཅོག་བྱས་པས་ཡན་ལག་དང་ཉིང་ལག་གི་ནད་སེལ་ལོ། ཅེས།
ཐལ་མོ་ཁུ་ཚུར་བཅའ་ཞིང་མཐིལ་བཞི་སར་བཙུགས་ཤིང་མགོ་བོ་ཐུར་དུ་ཕབ་སྟེ་གྱེན་དུ་འཕེན། མཆན་རྡེབ་མེད་རྒྱ་བཤིག།
བཅུ་བཞི་པ་ནི། རྐང་ལག་བཞི་ས་ལ་བཙུགས་ལ་གཡས་དང་གཡོན་དུ་བལྟས་པས་རྩེའུ་ཆུང་གི་ནད་སེལ་ལོ། ཅེས།
རྐང་མཐིལ་གཉིས་སར་ཕབ་པའི་དབུས་སུ་ཁུར་མགོ་བཙུག་ཤིང་ལུས་རྒྱུད་གཡས་དང་གཡོན་དུ་བལྟ། མཆན་རྡེབ་མེད་རྒྱ་བཤིག །
བཅོ་ལྔ་པ་ནི་ཁ་སྦུབ། རྐང་པ་བརྐྱང་། ལག་མཐིལ་ས་ལ་གཅུགས་ཏེ་གྲུ་མོ་བྲང་ལ་གཏད་པས་སྟོད་ཀྱི་ཕྱི་ནང་གི་ནད་སེལ་ལོ། ཅེས།
ཐལ་མོ་ཁུ་ཚུར་གྱི་མཐིལ་གཉིས་སར་ཕབ། གྲུ་མོ་གཉིས་ཀྱི་སྟེང་དུ་བྲང་བཞག་སྟེ་དགྱེ་སྒུར་ལན་གསུམ། མཆན་རྡེབ་མེད་རྒྱ་བཤིག
བཅུ་དྲུག་པ་ནི། མགོ་ཅོག་གཡས་དང་གཡོན་དུ་བསྐོར་བས་སྐེ་དང་མཇིང་པའི་ནད་སེལ་ལོ། ཅེས།
ལག་གཉིས་པུས་སྟེང་དུ་བཞག་ལ་མགོ་ཅོག་གཡས་དང་གཡོན་དུ་ལན་གསུམ་རེ་བསྐོར།།
བཅུ་བདུན་པ་ནི། ལག་པ་གཉིས་བསྣོལ་ལ་སྤྱི་བོར་བཞག་པས་རོ་སྟོད་ཀྱི་ནད་སེལ་ལོ། ཅེས།
ལག་གཉིས་ཁུ་ཚུར་སྡིག་བསྣོལ་སྤྱི་བོར་ཕྱི་ནང་རེས་མོས་སུ་འཇོག །
བཅོ་བརྒྱད་པ་ནི། པུས་མོ་གནམ་དུ་རེང་ངེ་གན་རྐྱལ་དུ་ཉལ་བའི་སྤྱི་བོར་ཐལ་མོ་ཐད་དྲང་དུ་སྦྱར་བས་རྐང་པའི་ཚིགས་དང་ལག་པའི་ནད་སེལ་ལོ། ཅེས་སོ།།
མཆན་རྡེབ་མེད་རྒྱ་བཤིག །
བཅུ་དགུ་པ་ནི། རྐང་པ་གཉིས་རེས་མོས་སུ་ལག་པའི་གྲུ་མོའི་ཁུང་དུ་བླངས་ཏེ་བརྐྱང་བསྐུམ་བྱས་པས་རྐང་པའི་ཉྭ་ཤའི་ནད་སེལ་ལོ། ཅེས་སོ།།
མཆན་རྡེབ་མེད་རྒྱ་བཤིག །
ཉི་ཤུ་ཐམ་པ་ནི། རྐང་པ་གཉིས་ཀྱི་མགོ་པུས་མོ་གཉིས་ཀྱི་སྟེང་དུ་རེ་མོས་སུ་བཞག་ཅིང་ཡ་གཅིག་ས་ལ་བཙུགས་ཐལ་མོ་སྦྱར་བས་སྟོད་སྨད་ཐམས་ཅད་ཀྱི་ནད་སེལ་ལོ། ཅེས་སོ།།
རྒྱ་བཤིག་ཡར་ལངས་ཏེ་མཆན་རྡེབ་བཅས་ཐལ་མོ་སྦྱར།
མར་བསྡད་ནས་འབའ་ཧ་ཧ་ཞེས་འཕག་ཐེངས་གསུམ་ནས་གྲུབ་པའོ།།
ལག་སྤྲུགས་དང་ལུས་གཅུད་འཕུར་བྱུག་སོགས་ལན་གསུམ་རེ་འམ་ཅི་ནུས་སུ་བྱས་ཀྱང་ཆོག ། མཆན།
ཅེས་པ་འདི་ནི་ཨ་སྐྱོང་རྟོགས་ལྡན་རིན་པོ་ཆེའི་དངོས་སློབ། མགོ་ལོག་གི་བླ་མ་ཐུབ་བསྟན་ཚུལ་ཁྲིམས་ཚང་གི་སྔོན་ཆད་སྦྱང་གོམས་བྱེད་མྱོང་འདུག་པས་ཁོང་ལ་དྲིས་ཏེ་ཟིན་ཐོ་བཀོད། ཕྱིས་སུ་ལུས་སྦྱོང་དཔེའུ་རིས་ལག་འབྱོར་བྱུང་བས་དེབ་གཟུགས་སུ་འཇིགས་མེད་རྣམ་རྒྱལ་པས་སོ། དགེའོ། །དགེའོ། །བཀྲ་ཤིས་ཤོག། །།
