གེ་སར་གཏེར་བདག་ཝེར་མའི་བསྐང་བ་ནོར་བུ་རྒྱས་པའི་སྤྲིན་ཆེན།
༄༅། །གེ་སར་གཏེར་བདག་ཝེར་མའི་བསྐང་བ་ནོར་བུ་རྒྱས་པའི་སྤྲིན་ཆེན།
བསྐང་རྫས་ཅི་འབྱོར་བ་འདུ་བྱས་བྱིན་གྱིས་བརླབས་ནས་འདི་སྐད་དོ།།
ཧཱུྃ་ཧྲཱིཿ རང་བྱུང་ཀ་ནས་དག་པའི་ཐིག་ལེ་ནི། །
གདོད་ནས་སྣང་སྟོང་མཉམ་པའི་ཡེ་ཤེས་ཉིད། །
རང་ཤར་ལྷུན་གྱིས་གྲུབ་པའི་རྩལ་སྣང་ལས། །
སྣང་སྲིད་རྣམ་དག་ནོར་བུའི་གཞལ་མེད་ཁང༌། །
རྒྱ་ཁྱོན་ཆོས་ཀྱི་དབྱིངས་དང་མཉམ་པའི་དབུས། །
བུམ་བཟང་དཔག་བསམ་ཤིང་དང་འདོད་འཇོའི་བ། །
ལྷ་དང་བྱང་ཆུབ་སེམས་དཔའི་ནོར་བུའི་རིགས། །
རིན་ཆེན་རི་བོ་བདུད་རྩིའི་ཆུ་མཚོ་དང༌། །
མ་རྨོས་ལོ་ཏོག་གྲུབ་པའི་དམ་རྫས་ཚོགས། །
སྣ་ཚོགས་ནོར་གྱི་ཁྱུ་དང་རཏྣའི་གཏེར། །
བཀྲ་ཤིས་རྫས་རྟགས་རྒྱལ་སྲིད་རིན་ཆེན་སོགས། །
ལྷ་ཀླུ་མི་ཡི་འབྱོར་པ་རྨད་བྱུང་བས། །
ཕྱོགས་རྣམས་ཀུན་དུ་ཕྱུར་བུར་གང་བྱས་ཤིང༌། །
མཁའ་ལ་གསེར་གྱི་སྙིང་པོའི་སྤྲིན་ཆེན་ལས། །
བསྟོད་བསྔགས་སྙན་པའི་འབྲུག་སྒྲ་འབུམ་འཁྲོལ་ཞིང༌། །
ཡིད་འོང་གསེར་འབར་གློག་གི་ཟློས་གར་རྩེ། །
དགོས་འདོད་ནོར་བུའི་ཆར་པ་སི་ལི་ལི། །
དཔའ་མཛངས་མཛེས་པའི་སྐྱེས་བུ་བྱེ་བ་སྙེད། །
དགྱེས་པའི་བྲོ་གར་འདུ་འཕྲོ་ཡིད་དུ་འོང༌། །
རྨད་བྱུང་ལྟ་ན་སྡུག་པའི་སྨིན་ལེགས་འབུམ། །
ཡིད་འཕྲོག་འཇོ་སྒེག་རོལ་པའི་རྒྱང་གླུ་རྩེ། །
དམ་རྫས་སྨན་རག་གཏོར་མ་རི་མཚོར་བསྐྱིལ། །
འདོད་ཡོན་དྲུག་ལྡན་མཆོད་པའི་སྤྲིན་ཕུང་འཐིབ། །
རྡོ་རྗེའི་རིག་མ་འབུམ་གྱིས་དགྱེས་འཛུམ་འཁྱུད། །
མདོར་ན་ཕྱི་དང་ནང་དང་གསང་བ་ཡི། །
འཇིག་རྟེན་འཇིག་རྟེན་འདས་པའི་མཆོད་པའི་སྤྲིན། །
མ་ལུས་ལུས་པ་མེད་པར་ལྷུན་གྲུབ་པ། །
དགོས་འབྱུང་འཛད་མེད་སྒྱུ་འཕྲུལ་དྲྭ་བའི་གར། །
སྣང་སྲིད་བདེ་བ་ཆེན་པོར་རང་ཤར་བ། །
རྨད་བྱུང་རྡོ་རྗེ་བཀོད་པའི་མཆོད་སྤྲིན་འདི། །
ཡེ་ཤེས་འདོད་རྒུའི་རོལ་མོར་འཆར་བའི་འཕྲུལ། །
ཀུན་བཟང་མཆོད་སྤྲིན་རྟག་ཁྱབ་ལྷུན་གྲུབ་གཏེར། །
དཔལ་ལྡན་འབྱོར་པ་མཆོག་གི་མཆོད་ཆེན་འདིས། །
སྐྱབས་གནས་དཀོན་མཆོག་རྒྱ་མཚོའི་ཐུགས་དམ་བསྐང༌། །
རབ་འབྱམས་རྩ་བ་གསུམ་གྱི་ཐུགས་དམ་བསྐང༌། །
ཆོས་སྐྱོང་ནོར་ལྷ་གཏེར་བདག་ཐུགས་དམ་བསྐང༌།
ཁྱད་པར་དོན་གྲུབ་ཝེར་མ་དཀར་པོ་ནི། །
སྐུ་རྗེ་སེང་ཆེན་ནོར་བུ་དགྲ་འདུལ་རྩལ། །
རྡོ་རྗེ་ཚེ་གཡང་ལོངས་སྤྱོད་རྒྱལ་པོ་ཆེ། །
སྣང་སྲིད་དགྲ་བླའི་རྒྱལ་པོའི་ཐུགས་དམ་བསྐང༌། །
དགྱེས་ཡུམ་མཁའ་འགྲོ་བཞི་ཡི་ཐུགས་དམ་བསྐང༌། །
དམག་དཔོན་མིག་དམར་ཆེན་པོའི་ཐུགས་དམ་བསྐང༌།
དམ་ཅན་རྡོ་རྗེ་ལེགས་པའི་ཐུགས་དམ་བསྐང༌།
སྨན་བཙུན་རྡོ་རྗེ་གཡུ་སྒྲོན་ཐུགས་དམ་བསྐང༌།
རྨ་རྒྱལ་རྡོ་རྗེ་དྲག་རྩལ་ཐུགས་དམ་བསྐང༌། །
ཕུ་བོ་དུང་ཁྱུང་དཀར་པོའི་ཐུགས་དམ་བསྐང༌།
སྟེང་ཕྱོགས་ལྷ་ཡི་གཏེར་བདག་ཐུགས་དམ་བསྐང༌།
ཕ་ཡབ་གེར་མཛོ་གཉན་པོའི་ཐུགས་དམ་བསྐང༌།
བར་ཕྱོགས་གཉན་གྱི་གཏེར་བདག་ཐུགས་དམ་བསྐང༌། །
ནུ་བོ་ཀླུ་སྦྲུལ་འོད་འབྱུང་ཐུགས་དམ་བསྐང༌། །
འོག་ཕྱོགས་ཀླུ་ཡི་གཏེར་བདག་ཐུགས་དམ་བསྐང༌།
ཨ་ནེ་གུང་སྨན་རྒྱལ་མོའི་ཐུགས་དམ་བསྐང༌།
སྣང་སྲིད་མ་མོའི་ཚོགས་ཀྱི་ཐུགས་དམ་བསྐང༌།
སྲིད་ལྕམ་ཐ་ལེ་འོད་དཀར་ཐུགས་དམ་བསྐང༌།
འབྱུང་བ་ལྔ་ཡི་ལྷ་མོའི་ཐུགས་དམ་བསྐང༌། །
རྫུ་འཕྲུལ་རླུང་རྟ་ལྷ་བཞིའི་ཐུགས་དམ་བསྐང༌། །
མགྲོན་ཡག་དར་མ་བཅུ་གསུམ་ཐུགས་དམ་བསྐང༌།
གནམ་ས་བར་གྱི་ཝེར་མའི་ཐུགས་དམ་བསྐང༌།
སྐུ་འཁོར་དགྲ་བླ་ཝེར་མའི་ཐུགས་དམ་བསྐང༌།
ཌཱ་ཀི་དྭངས་སྨན་ཚོགས་ཀྱི་ཐུགས་དམ་བསྐང༌། །
དཔའ་བརྟུལ་དཔའ་བོའི་ཚོགས་ཀྱི་ཐུགས་དམ་བསྐང༌།
བཀའ་འབངས་སྤྲུལ་པའི་ལྷ་དམག་ཐུགས་དམ་བསྐང༌།
བཀའ་སྡོད་སྣང་སྲིད་དྲེགས་པའི་ཐུགས་དམ་བསྐང༌།
སྣང་སྲིད་དགྲ་བླ་ཝེར་མའི་ཐུགས་དམ་བསྐང༌།
མདོར་ན་སེང་ཆེན་ནོར་བུའི་དཀྱིལ་འཁོར་དུ། །
དགྱེས་བཞིན་བཞུགས་པ་རབ་འབྱམས་ནོར་ལྷའི་ཚོགས། །
ཡེ་ཤེས་ལས་དང་འཇིག་རྟེན་ཚུལ་འཛིན་པ། །
མ་ལུས་ལུས་པ་མེད་པའི་ཐུགས་དམ་བསྐང༌། །
དག་མཉམ་བདེ་བ་ཆེན་པོར་རྟག་དགྱེས་ནས། །
བདག་ཅག་སྒྲུབ་པ་པོ་ལ་ཚེ་དང་གཡང༌། །
བསོད་ནམས་དཔལ་འབྱོར་བདེ་སྐྱིད་ཆོས་དང་དབང༌། །
གཟུངས་སྤོབས་བློ་དང་གཟི་བརྗིད་བཀྲག་མདངས་བཅུད། །
ཉམས་དང་རྟོགས་པ་མཐུ་སྟོབས་ནུས་པའི་རྩལ། །
ཡར་ངོའི་ཟླ་བ་བཞིན་དུ་འཕེལ་བ་དང༌། །
ཕྱོགས་དང་དུས་ཀྱིས་བསྡུས་པའི་ཕྱྭ་གཡང་དཔལ། །
ཆར་ཕོབ་མཚོ་ལྟར་སྐྱིལ་ལ་སྤྲིན་ལྟར་བསྡུས། །
བདེ་སྟོང་རྡོ་རྗེ་ཐུགས་ཀྱི་ངང་ཉིད་ནས། །
རྟག་ཏུ་མི་འབྲལ་དགྱེས་རྒུར་སྐྱོང་མཛད་དེ། །
བདེ་ནས་བདེ་བ་རྣམ་མཁྱེན་ནོར་བུའི་གླིང༌། །
ཇི་དགར་བགྲོད་པའི་སྐལ་བཟང་མཆོག་སྩོལ་ཞིང༌། །
དཔལ་ལྡན་ནོར་ལྷ་རྒྱ་མཚོའི་དཀྱིལ་འཁོར་གྱི། །
བྱིན་ནུས་ཕྱྭ་གཡང་གནས་འདིར་ཆགས་གྱུར་ནས། །
ཁམས་གསུམ་སྲིད་གསུམ་དབང་དུ་འདུ་བ་དང༌། །
ཕྱོགས་ལས་རྣམ་པར་རྒྱལ་བའི་མཆོག་སྩོལ་ཅིག །
སྙན་དང་གྲགས་པས་རྒྱལ་ཁམས་ཀུན་ཏུ་གང༌། །
བཀྲ་ཤིས་བསྟན་པ་ཕྱོགས་ཀྱི་ཐ་གྲུར་ཁྱབ། །
མངའ་ཐང་དབུ་འཕང་སྲིད་པའི་རྩེ་མོར་བསྟོད། །
ཕུན་ཚོགས་བསམ་རྒུ་འགྲུབ་པར་མཛད་དུ་གསོལ། །
བཀྲ་ཤིས་དགེ་མཚན་བྱེ་བའི་གཟི་བྱིན་གཡང༌། །
རྟག་ཏུ་སྣང་སྟོང་ཐིག་ལེར་འཁྱིལ་མཛད་ཅིང༌། །
མི་ཤིགས་ཀུན་འབྱུང་བུམ་པ་བཟང་པོ་ནས། །
མཆོག་ཏུ་ཚིམ་བྱེད་གྲུབ་པའི་རྒྱལ་ཐབས་སྩོལ། །
མཐའ་ཡས་འགྲོ་བ་ཀུན་ལ་དུས་རྟག་ཏུ། །
ཕན་བདེ་མི་ཟད་མཆོག་གི་གཞིར་གྱུར་པ། །
ཡེ་ཤེས་ནོར་བུ་འབར་བའི་གཟི་བྱིན་འོད། །
ཆོས་ཀྱི་དབྱིངས་དང་མཉམ་པར་རྒྱས་པར་མཛོད། །
འདི་ལྟར་གེ་སར་ཝེར་མའི་རྒྱལ་པོ་ཡི། །
གཡང་སྒྲུབ་བསམ་འཕེལ་ཡིད་བཞིན་ནོར་བུ་ལ། །
གཞུང་དང་ཕྱྭ་གཡང་འགུགས་པའི་ཕྲིན་ལས་ཏེ། །
གཉིས་པོ་ཙམ་ལས་གཞན་དག་མ་མཐོང་བས། །
བསྐང་གསོལ་འདི་འདྲ་སྦྱར་ན་ཆེས་ལེགས་ཤིང༌། །
དེ་གསུམ་ཙམ་གྱིས་དོན་ཀུན་བདེ་བླག་གྲུབ། །
དེ་ལས་རྒྱས་སྤྲོས་གཞན་གྱིས་ཅི་བྱ་ཞེས། །
བསམས་ནས་བསྐང་རིམ་བློ་ལ་གང་ཤར་བ། །
ཤར་མར་རྟེན་འབྲེལ་དགེ་བའི་དུས་སུ་བྲིས། །
འདི་ཡི་དགེ་བས་སྐྱེ་བོ་ཐམས་ཅད་ཀུན། །
ཕྱྭ་གཡང་འཛད་མེད་ནོར་བུའི་ཆུ་གཏེར་ལ། །
འདོད་རྒུར་རོལ་པའི་སྐལ་བཟང་ཐོབ་གྱུར་ཅིག །
ཅེས་པའི་བསྐང་གསོལ་འདི་ཡང་མི་ཕམ་པས་བཀྲ་ཤིས་ལྷ་རྩེར་བྲིས་པ་མངྒ་ལཾ། །
