Explanation of the White Feast—Tibetan

༄༅། །དཀར་འགྱེད་ཀྱི་འགྲེལ་པ་ལེགས་བཤད་ལྟ་བའི་གདེང་གླུ་བཞུགས། །

ན་མོ་གུ་རུ་ཀྲོ་ཏི་ཀ་ལི་ཡེ། ཨཱཿ སྣང་བ་ཐམས་ཅད་ཡུམ་གྱི་མཁའ། །སྲིད་པ་ཇི་སྙེད་ཐུགས་རྗེའི་འཕྲུལ། །འཁོར་འདས་གསང་ཆེན་གཅིག་ཏུ་རོལ། །རྣམ་ཀུན་མཆོག་སྟེར་ཁྲོས་མར་འདུད། །ད་ལམ་འདིར་ལུས་ཀྱི་གཅེས་འཛིན་བཏང་ནས་ཕུང་པོ་གཟན་དུ་བསྒྱུར་ཏེ་དཀར་འགྱེད་བྱེད་པའི་དམིགས་གནད་བཀྲལ་བའི་རིམ་པ་ལ། །སྦྱོར་དངོས་རྗེས་གསུམ་ལས། དང་པོ་ནི། རང་གི་མདུན་གྱི་ནམ་མཁའ་འཇའ་དང་འོད་ཕུང་ཐིག་ལེ་དང་ཐིག་ཕྲན་བསམ་གྱིས་མི་ཁྱབ་པ་འཁྲིགས་པའི་ཀློང་དུ། པདྨ་དང་ཉི་ཟླ་བྃ་རོའི་གདན་ལ་དུས་གསུམ་སངས་རྒྱས་ཀུན་འདུས་ཀྱི་ངོ་བོ་མཚུངས་མེད་ཐུགས་རྗེའི་གཏེར་མཛོད་དཔལ་མགོན་བླ་མ་རིན་པོ་ཆེ་ཡིན་པ་ལ། རྣམ་པ་མ་ཅིག་ཁྲོས་མ་ནག་མོ་སྐུ་མདོག་མཐིང་ནག་ཞལ་གཅིག་ཕྱག་གཉིས་གཡས་གྲི་གུག་དང་གཡོན་ཐོད་ཁྲག་ཐོགས་པ། ཞལ་གདེངས་ཤིང་ལྗགས་འདྲིལ་བ་མཆེ་བ་བཞི་རྣོ་ངར་དུ་གཙིགས་པ། སྨ་ར་དང་སྨིན་མ་ལས་མེ་འབར་ཞིང་སྤྱན་གསུམ་ནམ་མཁའི་དབྱིངས་ལ་གཟིགས་པ། སྤྱི་བོ་ན་ཕག་ཞལ་ནག་པོ་གྱེན་དུ་ངུར་བའི་སྒྲས་སྟོང་གསུམ་གཡོ་བར་བྱེད་པ། རལ་པ་དམར་སེར་སྲིད་པའི་རྩེ་རུ་འཁྱིལ་ཞིང་ལྷག་མས་སྐུ་རྒྱབ་ཁེབས་པ། ཞབས་གཉིས་གར་སྟབས་བསྒྱུར་ཞིང་ཁ་ཊྭཱྃ་དཀུ་ལ་བསྟེན་པ། ནུ་མ་འབུར་ཞིང་པདྨོ་རྒྱས་པ། སྐུ་ལ་རུས་པའི་རྒྱན་དྲུག་དང་དུར་ཁྲོད་ཀྱི་ཆས་བརྒྱད་རྫོགས་པ། ཡེ་ཤེས་ཀྱི་མེ་དཔུང་འབར་བའི་ཀློང་དུ་བསྐྱེད་དོ། །དེའི་དབུ་གཙུག་ཏུ་རྡོ་རྗེ་རྣལ་འབྱོར་མ་དམར་མོ་དང་ཀུན་ཏུ་བཟང་མོ་མཐིང་ནག་སོགས་གྲུབ་ཐོབ་གཅོད་ཡུལ་བརྒྱུད་པའི་བརྒྱུད་གསུམ་རིག་འཛིན་བླ་མའི་ཚོགས་ཐམས་ཅད་གསལ་བཏབས་ཏེ། འཁོར་དུ་རིགས་བཞིའི་མཁའ་འགྲོ་དང་ལས་བྱེད་མ་བཞི་དང་ཁྲག་འཐུང་མ་བཞི་སོགས་འབུམ་ཕྲག་ཡངས་པའི་མཁའ་འགྲོ་མའི་ཚོགས་དཔག་ཏུ་མེད་པས་བསྐོར་བ། དེའི་ཕྱི་རོལ་དུ་ཡེ་ཤེས་དང་ལས་ལ་གྲུབ་པའི་བཀའ་སྲུང་དང་ཆོས་སྐྱོང་སྲུང་མའི་ཚོགས་ཀྱིས་བསྐོར་བའོ། །དེ་བཞིན་དུ་ཕྱོགས་བཅུའི་ཞིང་མུ་མཐའ་མེད་པའི་ནམ་མཁས་གར་ཁྱབ་ཏུ་སྐྱབས་ཡུལ་ཚོགས་ཞིང་གི་ལྷ་ཚོགས་ཀྱི་རྣམ་རོལ་དུ་བཞེངས་ནས་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་སམ་དཀྱིལ་འཁོར་སྤྲུལ་པའི་ལྷ་ཚོགས་ཀྱི་ཚོམ་བུ་བརྗོད་ལས་འདས་པ་བཞུགས་ཡོད་པར་མོས་ལ། དེའི་མདུན་དུ་རང་གཞན་སེམས་ཅན་ཐམས་ཅད་ཀྱིས་ཡིད་ཁྱེད་ཤེས་ཀྱི་དད་པ་དང་མོས་གུས་ཀྱིས་བསླུ་མེད་མཆོག་གསུམ་རིན་པོ་ཆེ་ལ་བློ་ལིང་གིས་བཀལ་ནས་ཐུགས་རྒྱུད་བསྐུལ་ཞིང་སྐྱབས་སུ་འགྲོ་བ་ལ། ཕཊཿ ཡེ་གཞི་ཀ་དག་སོགས་བརྗོད་ཅིང་། ལྷ་འདྲེའི་གཙོར་བཅས་མ་ནམ་མཁའི་མཐའ་ཁྱབ་ཀྱི་སེམས་ཅན་ཚད་མེད་པ་རྣམས་ལ། འཁོར་བའི་སྡུག་བསྔལ་ཚད་མེད་པ་ལ་ཐར་དུས་མེད་པར་མཐའ་མེད་ད་འཁྱམས་དགོས་པ་ལ་བསམས་ནས། སྙིང་རྗེ་བྱང་སེམས་ཚད་མེད་པ་བསྒོམས་ཏེ། ཚོགས་ཀྱི་ཞིང་སྐྱབས་ཡུལ་དཀོན་མཆོག་གི་ཐུགས་རྒྱུད་ཀྱི་ཡེ་ཤེས་དང་ཡོན་ཏན་ཚད་མེད་པ་རྣམས་ཤེས་པའི་སྒོ་ནས་སེམས་བསྐྱེད་ཅིང་རིམ་པར་འདོན་ནོ། །སླར་ཡང་གཟུང་འཛིན་གཉིས་སྣང་གི་རྟོག་ཚོགས་ཐམས་ཅད་བློ་ཡིས་བཏང་ཞིང་། རང་འདོད་ཉོན་མོངས་པའི་དྲི་མས་མ་གོས་པར། དཀའ་བ་དང་ལེན་གྱིས་དམིགས་གནད་ལ་བརྩོན་ཅིང་གཡེངས་པ་མེད་པར་སྒྱུ་མའི་ལམ་དུ་འཁྱེར་བར་ཕ་རོལ་ཏུ་ཕྱིན་པ་དྲུག་དང་ལྡན་པར་བྱའོ། །དེ་ནས་ཚོགས་གསག་པའི་ཐབས་ཁྱད་པར་ཅན་མཎྜལ་འབུལ་བ་ལ་སྟོང་གསུམ་འཇིག་རྟེན་ཇི་སྙེད་དག་ཚོམ་བུར་བཀོད་པ་ནི་སྣང་སྲིད་ཕྱི་ཡི་མཎྜལ། རང་ལུས་ཕུང་ཁམས་ཀྱི་ཚོམ་བུར་བཀོད་པ་ནི་རང་བྱུང་ནང་གི་མཎྜལ། ཀུན་གཞིའི་ཁམས་ལ་རྟོག་ཚོགས་རང་སར་གྲོལ་བས་ཚོམ་བུར་བཀོད་པ་ནི་ཡེ་རྫོགས་གསང་བའི་མཎྜལ་ཡིན་ཏེ། དེ་རྣམས་ཀྱི་ཚིག་འདོན་ཅིང་ཕུལ་ལུགས་ནི་གཅེས་འཛིན་ཉེར་ལེན་གྱི་བློ་བཏང་སྟེ་ཚོགས་ཞིང་བླ་མ་སྐུ་གསུམ་གྱི་ཞིང་དུ་འབུལ་བའོ། །དེ་ནས་བྱིན་རླབས་ཀྱི་འཇུག་སྒོ་མོས་གུས་བླ་མའི་རྣལ་འབྱོར་རྒྱས་བསྡུས་གང་རུང་གསོལ་བ་ཕུར་ཚུགས་སུ་གདབ་ཅིང་མཐར་ཕཊཿཀྱི་སྒྲ་དང་སྦྲགས་ནས་ཐུགས་ཡིད་བསྲེས་ཤིང་དབང་བཞི་ཐོབ་སྒྲིབ་བཞི་དག །སྐུ་བཞི་སྨིན་པར་བསམས་པས་གནས་ལུགས་ཀྱི་དོན་ལ་མཉམ་པར་འཇོག་གོ །དེས་ནི་ནད་དང་གནད་པ་སོགས་བར་ཆད་ཀུན་ལས་རྣམ་པར་རྒྱལ་ཞིང་མྱུར་དུ་ཆོས་ཉིད་ཀྱི་རྟོགས་པ་མངོན་དུ་གྱུར་ཏེ་ཚེ་འདི་ཉིད་ལ་གདོད་མའི་གཞིལ་མངོན་པར་བྱང་ཆུབ་པའི་དགོས་པ་ཡོད་དོ། །སྤྱིར་སྔོན་འགྲོའི་ཚོམས་ཏེ་དང་པོའོ། །དེ་ནས་གཉིས་པ་དངོས་གཞི་ལ་རྩ་བསྐྱེད་དང་། སྦྱང་སྤེལ་དང་། འཕྲུལ་དུ་རོལ་བ་དང་། བསྡུ་རིམ་སྟེ་བཞི་ལས། དང་པོ་རྩ་བསྐྱེད་ལ་བསྡུ་བྱེད་ཐབས་ཀྱི་ཡི་གེ་ཕ་དང་གཏོར་བྱེད་ཤེས་རབ་ཀྱི་ཡི་གེ་ཊཿགཉིས་འབྲེལ་བའི་བརྟུལ་ཞུགས་ཀྱི་སྤྱོད་པ་ལ་ཕཊཿ དང་པོས་གཉིས་སྣང་བག་ཆགས་ཀྱི་སྒྱུ་ལུས་ངོས་བཟུང་། གཉིས་པས་རྩ་བསྐྱེད། གསུམ་པས་རིག་པ་དབྱིངས་ལས་བཞེངས་པས་གནད་དོན་དང་ལྡན་པའི་ངང་དུ་ཕཊཿགསུམ་དང་། ངར་འཛིན་བག་ཆགས་སོགས་བརྗོད་པས་དམིགས་པ་ནི། གང་ཞིག་ཐོག་མ་མེད་པའི་དུས་ཉིད་ནས་གཞི་མ་རིག་བདག་ཏུ་བལྟས་པའི་ངར་འཛིན་གྱི་ཞེས་པ་འདིའི་ཁམས་ལ་གཉིས་སྣང་བག་ཆགས་ཀྱི་ཕུང་པོའི་སྒྱུ་མའི་ལུས་འདི་ཉིད་དུས་ནམ་དུའང་རྒྱུན་ཆད་མེད་པར་སྣང་བ་ཡིན་པས། འོ་ན་ད་ལྟའི་ཕུང་པོ་འདི་ལ་དེ་དག་ཐམས་ཅད་གཅིག་ཆར་དུ་རྫོགས་ཤིང་དབང་བའི་འདུ་ཤེས་ཀྱིས་ཆེ་ཞིང་བརྗིད་པ། ཚོ་ཞིང་སྣུམ་པ་སྲ་ཞིང་འཐས་པ་སྟོང་གསུམ་འཇིག་རྟེན་ནམ་མཁའི་ཁྱོན་ལ་སྙོགས་པ་ཞིག་ཏུ་བསྐྱེད་ནས། དེའི་དབུས་སུ་རྩ་ཨ་བ་དྷུ་ཏི་ཁང་སྟོང་དུ་ཤེལ་གྱི་ཀ་བ་བཙུགས་པ་ལྟ་བུ་མདའ་སྨྱུག་འབྲིང་པོ་ཙམ་ཡར་སྣ་སྤྱི་བོ་རུ་རྒྱ་མཐོངས་ཀྱི་ཁ་ཕྱེ་བ་ལྟར་ཟུག་པ། མར་སྣ་ལྟེ་འོག་གཉེར་པོ་ཆེ་རུ་སྨྱུག་ཚིགས་འགུགས་པ་ལྟར་གནས་པའི་སྙིང་གར་འོད་ཚིགས་ཀྱིས་ཆོད་པའི་སྟེང་དུ་རྣམ་ཤེས་བླ་ཚེ་བསོད་ནམས་ཀྱི་དྭངས་མའི་ཡེ་ཤེས་ཀྱི་རིག་པའི་ངོ་བོ་བྱ་མ་སར་གྱི་སྒོ་ང་ལྟ་བུར་ཐིག་ལེ་ཁ་དོག་ལྔ་དང་ལྡན་པ་ཞིག་ཏུ་གསལ་ཏེ། སྐད་ཅིག་གིས་དཔག་ཆེན་གྱིས་མདའ་འཕངས་པ་ལྟར་སྟེང་གི་ནམ་མཁར་ཐོན་ཏེ་ཆོས་ཉིད་གདོད་མའི་དབྱིངས་ཀ་དག་སྤྲོས་པ་དང་བྲལ་བའི་གཞི་རུ་འཕོས་ཤིང་གཉིས་མེད་དུ་བསྲེས་པའི་ཆོས་ཉིད་གཉུག་མའི་གཤིས་ལ་འབྱམས་ཀླས་པར་འཇོག་གོ །གཉིས་པ། སྦྱངས་ཤིང་སྤེལ་བ་ལ། སྐད་ཅིག་གིས་རིག་པའི་ངོ་བོ་མཁའ་ལས་གློག་འཁྱུག་པའམ་ཆུ་ལས་ཆུ་བུར་རྡོལ་བ་ལྟར། ཆོས་ཉིད་མཚན་མ་ཚིག་བྲལ་གྱི་དབྱིངས་ལས་ཡེ་ཤེས་སྒྱུ་འཕྲུལ་གྱི་རྣམ་པར་གཟུགས་སྐུར་ལྡང་ཞིང་ལངས་ཏེ། བདག་བསྐྱེད་རང་ཉིད་ཡེ་ཤེས་དབྱིངས་ཀྱི་རྡོ་རྗེ་རྣལ་འབྱོར་མ་སྐུ་མདོག་དཀར་མོ་གངས་རི་ལ་ཉི་འོད་ཕོག་པ་ལྟ་བུ་སྤྱན་གསུམ་དབྱིངས་སུ་གཟིགས་པ། ཞི་འཛུམ་གྱི་ཉམས་དང་ལྡན་པ། རུས་པའི་རྒྱན་དྲུག་གསོལ་བ་ཞིག་བསྐྱེད་དེ། དེ་ཡིས་ཕྱག་གཡས་པའི་གནམ་ལྕགས་ལས་གྲུབ་པའི་རལ་གྲིས་གཉིས་སྣང་བག་ཆགས་འཁྲུལ་གཟུགས་སྒྱུ་ལུས་ཀྱི་ཕུང་པོ་རོ་ལྟར་འགྱེལ་ཡོད་པ་དེ་ལ་ཚད་པ་ཙམ་གྱིས་སིལ་བུར་གཏབས་ཤིང་འཐོར་བ་ལས། དེ་ཡང་རྡུལ་དང་རྡུལ་ཕྲན་དུ་ཕབ་པའི་ཕྱག་གཡོན་པས་ཡེ་ཤེས་ཀྱི་རླུང་གི་བ་དན་དཀར་པོ་གཡོ་ཞིང་གཡབ་པས། ལུས་དང་ཕུང་པོའི་རང་བཞིན་ལས་གྲུབ་པའི་ཤ་ཁྲག་རྐང་ཚིལ་རུས་པ་ཆུ་རྒྱུས་ནང་རོལ་དང་བཅས་པ་ཐམས་ཅད་འཇིག་རྟེན་ནམ་མཁས་གར་ཁྱབ་ཀྱི་ཕྱོགས་མཚམས་སྟེང་འོག་ཀུན་ཏུ་གཏོར་བས། ཕྱི་འབྱུང་བ་ས་ཆུ་མེ་རླུང་ནམ་མཁའི་རང་བཞིན་ནི་སྲིད་པ་དངོས་སྣང་གི་སྒྱུ་ལུས་དང་། བར་འདོད་ཡོན་ལྔ་ཡི་སྣང་བའི་ཡུལ་ནི་སྣ་ཚོགས་འཕྲུལ་སྣང་གི་སྒྱུ་ལུས་དང་། ནང་གོང་དུ་བཤད་པའི་ཤ་ཁྲག་རུས་པའི་ཕུང་པོ་ནི་ཟག་བཅས་ཉེར་ལེན་གྱི་སྒྱུ་ལུས་ཡིན་པས་དེ་གསུམ་དབྱེར་མེད་གཅིག་ཏུ་མཉམ་པར་བརྡལ་བ་ལས། སླར་ཡང་རང་བཞིན་སྒྱུ་འཕྲུལ་རྣམ་པར་དག་པའི་ཆོས་ཉིད་ཀྱི་དབྱིངས་ནས། རྒྱལ་བ་ཐམས་ཅད་ཀྱི་སྐུ་གསུང་ཐུགས་ཀྱི་ས་བོན་ལས་འོད་ཟེར་དཀར་དམར་མཐིང་གསུམ་གྱི་ཆར་བབས་པ་ལས་ཟག་མེད་ཡེ་ཤེས་ཀྱི་ནུས་བཅུད་ཀྱིས་དེ་ལ་སྤག་པས། མ་དག་གཉིས་སྣང་གི་དྲི་མ་ཐམས་ཅད་སྟོང་པར་སྦྱངས་ཏེ། ཆོས་ཉིད་མི་ཟད་པའི་གཏེར་ཆེན་པོ་ནམ་མཁའ་མཛོད་དུ་སྤེལ་ནས། ཁ་དོག་དང་དྲི་རོ་ནུས་བཅུད་ཕུན་སུམ་ཚོགས་པའི་བདག་ཉིད་ཅན་དུ་བསྒྱུར་རོ། །དེ་ཡང་རྒྱ་ཁྱོན་ནི་མངོན་མཐོ་གཞན་འཕྲུལ་དབང་བྱེད་དམ་ལྷ་ཡི་འདོད་རྒུའི་དཔལ་ཡོན་གྱི་བཀོད་པ་ཐམས་ཅད་མ་འདྲེས་སོ་སོ་རུ་འཕྲུལ་བ་བཞིན་དུ་གསལ་ཏེ། ཕྱི་སྣང་བ་སྣོད་ཀྱི་འཇིག་རྟེན་ཐམས་ཅད་དག་པ་ལྷ་ཡི་ཞིང་དབྱིངས་དང་། ནང་སྲིད་པ་བཅུད་ཀྱི་སེམས་ཅན་ཐམས་ཅད་དགའ་བདེའི་རོ་འཕྲུལ་པས་ལྷན་སྐྱེས་ཉམས་ཀྱི་རང་བཞིན་དང་། བར་འདོད་ཡོན་ལྔ་ཡི་ཡུལ་སྣང་ལས་གྲུབ་པའི་ཆོས་ཐམས་ཅད་དབྱིངས་ལས་ཆུ་འཛིན་དཀར་པོ་འཁྲིགས་པའི་ཟེགས་མས་ཁྱོན་ཀུན་ཁེངས་ཞིང་ཁེབས་པ་ལྟར་དཀར་འགྱེད་ཀྱི་རང་བཞིན་མཆོད་པའི་སྤྲིན་ཚོགས་རྒྱ་མཚོ་བསམ་གྱིས་མི་ཁྱབ་ཅིང་བརྗོད་ཀྱིས་མི་ལངས་པ། རི་རྒྱལ་ལས་དཔངས་མཐོ་བ། རྒྱ་མཚོ་ལས་གཏིང་ཟབ་པ། ཞིང་རྡུལ་ལས་གྲངས་མང་བ། ལྷོ་སྤྲིན་ལས་ལྷུན་སྟུག་པ། ཉི་ཟླ་བས་འོད་གསལ་བ། ནམ་མཁའ་བས་ཁྱོན་ཡངས་པ། འཁོར་ཡུག་པས་རྒྱ་ཆེ་བའི་བདག་ཉིད་དུ་འཕྲུལ་ཞིང་བསྒྱུར་ལ། ངོ་བོ་ནི་བདེ་སྟོང་ཟག་པ་མེད་པའི་རང་བཞིན་གང་གིས་མཐོང་བ་ཙམ་གྱིས་ངོམས་པ་དང་། རེག་པ་ཙམ་གྱིས་ཚིམ་པ་དང་། མྱོང་བ་ཙམ་གྱིས་གྲོལ་བར་བྱེད་པའི་བདུད་རྩི་ལ། རྣམ་པ་ནི་འབྲུ་དཀར་ཟས་དཀར་དང་སྙིང་ཁུ་སོགས་དཀར་གསུམ་གྱི་རིགས་ཐམས་ཅད་མ་ཚང་བ་མེད་པའི་ཆུ་མིག་དང་། མཚོ་དང་རྫིང་བུ་ལྟེང་ག་ཆུ་ངོགས་སོགས་རི་བོ་དང་ལུང་པ་དང་ཐང་ཆེན་རྣམས་དང་ནེའུ་ཐང་སོགས་བསམ་གྱིས་མི་ཁྱབ་པའི་ཡུལ་སྣང་གི་དགའ་སྟོན་འཕྲུལ་བ་དང་། གཞན་ཡང་ཀ་ར་དང་བུ་རམ་དང་སྦྲང་རྩི་སོགས་མངར་གསུམ་གྱི་རིགས་ཐམས་ཅད་ལས་གྲུབ་པའི་བྲག་རི་དང་། བ་གམ་ནང་། གཡའ་མ་དང་། གད་གཤམ་དང་། འོབས་དང་། ཞག་རྩི་སོགས་དུ་མ་བསམ་གྱིས་མི་ཁྱབ་པའི་དགོས་འདོད་ཀུན་ཏུ་འབྱུང་བའི་དགའ་ཚལ་སྤེལ་བ་དང་། དེ་བཞིན་དུ་ཨ་རུ་དང་བཱ་རུ་དང་སྐྱུ་རུ་སོགས་སྨན་རིགས་ཐམས་ཅད་ཀྱི་རང་བཞིན་ནགས་ཚལ་དང་ལྗོན་ཤིང་དང་། སྐྱེད་ཚལ་དང་། སྤང་ལྗོངས་སོགས་འདོད་རྒུའི་དཔལ་ཡོན་དཔག་ཏུ་མེད་པའི་མཆོད་སྤྲིན་གྱི་ཕུང་པོ་མི་མཇེད་འཇིག་རྟེན་གྱི་ཁམས་ཀུན་ཏུ་གཡོ་ཞིང་འགྱེད་པ་ལས། ཕྱོགས་མཚམས་ཀུན་ནས་འོད་ཟེར་གྱི་ངད་རླངས་དཔག་ཏུ་མེད་པ་མཚོ་ཆེན་པོ་ལ་སྨུག་པ་ལྡང་བའམ་རྒྱ་མཚོ་ལ་རླངས་པ་མཆེད་པའམ་ནམ་མཁའི་ཀློང་དུ་སྤྲིན་ཕུང་འཐིབས་པ་བཞིན་དུ་ཆོས་ཉིད་ནམ་མཁའ་མཛོད་ཀྱི་དཔལ་དང་ཡེ་ཤེས་ཡོན་ཏན་ཕུན་སུམ་ཚོགས་པའི་དགའ་སྟོན་བླ་ན་མེད་པ་ཕྱོགས་བཅུའི་སངས་རྒྱས་ཀྱི་ཞིང་དབྱིངས་རྒྱ་མཚོ་ཀུན་ཏུ་འཁྲིགས་ཤིང་འཕྲོ་བ་ལས། དེ་ལྟར་སྣོད་བཅུད་འདོད་ཡོན་ཐམས་ཅད་གདུལ་བྱའི་སེམས་ཅན་རྣམས་ཀྱི་དབང་པོ་དྲུག་གི་ཡུལ་དབྱིངས་སུ་མ་ཞིག་གི་བར་དུ་འམ་ཇི་སྲིད་འཁོར་བ་མ་སྟོངས་ཀྱི་བར་དུ་ཏིང་ངེ་འཛིན་གྱི་མཆོད་པའི་སྤྲིན་རྒྱ་མཚོ་རུ་བསྒྱུར་ཏེ། དེ་སྲིད་དུ་རྒྱུན་མི་ཆད་པའི་ཆོས་ཉིད་ཀྱི་མཆོད་པ་མི་ཟད་པ་རྒྱན་གྱི་འཁོར་ལོའི་བདག་ཉིད་དུ་སྤེལ་ཞིང་འགྱེད་པའོ། །དེ་ནས་གོང་གི་དམིགས་པའི་ཚིག་ཨོཾ་ཨཱཿཧཱུྃ༔ ལན་གསུམ་བརྗོད་མཐར་ཌཱ་དྲིལ་འུར་ཆེམ་རྐང་གླིང་བཅས་ཕཊ༔ དང་པོས་དཀོན་མཆོག་སྲི་ཞུའི་མགྲོན། མགོན་པོ་ཡོན་ཏན་གྱི་མགྲོན། རིགས་དྲུག་སྙིང་རྗེའི་མགྲོན། བགེགས་རིགས་ལན་ཆགས་ཀྱི་མགྲོན་རྣམས་བསྐུལ་ཞིང་ཐོས། གཉིས་པས་དབྱིངས་སུ་ཆས། གསུམ་པས་འུབ་དིར་གྱིས་འདུས་ཤིང་འཁོད་ནས་ནམ་མཁའ་བར་སྣང་ས་གཞི་ཐམས་ཅད་སྒྱུ་མའི་འཕྲུལ་འགྱེད་པ་ལྟར་བྱིན་ཐིབས་ཀྱིས་གང་སྟེ། ཕན་ཚུན་ཕམ་རྒྱལ་དང་རྩོད་པ་མེད་པར་ཞི་བ་བྱང་ཆུབ་ཀྱི་སེམས་ཐོབ་ནས་དགའ་ཡལ་ལེ་འཛུམ་མུལ་ལེ་མགྲོན་ཐམས་ཅད་ལྷགས་པར་བསམ་མོ། །གསུམ་པ་འཕྲུལ་སྣང་འགྱེད་པ་དེ་རྣམས་ཆོས་ཉིད་དུ་རོལ་པ་ལ། གཞི་དང་། ལམ་དང་། འབྲས་བུ་གསུམ་ལས། དང་པོ་ལ། ཨེ་མ༔ སངས་རྒྱས་སོགས་བརྗོད་ཅིང་ཞེས་པའི་དོན་ནི། ཨེ་མ་ལྟ་བའི་གནས་ལུགས་ཀྱི་ཞལ་མཇལ་བས་ན་ངོ་མཚར་བའི་གཏན་ཚིགས་ཡིན་ནོ། །དེ་ལྟར་སེམས་ཉིད་བདེ་གཤེགས་སྙིང་པོ་ཀ་དག་རྫོགས་པ་ཆེན་པོའི་རྟོགས་པ་མངོན་དུ་གྱུར་ཚེ་ཆོས་ཉིད་བྱང་ཆུབ་ཆེན་པོ་ལ་སངས་རྒྱས་དང་རྒྱལ་བའི་དཀྱིལ་འཁོར་ཐམས་ཅད་ང་ཉིད་རྡོ་རྗེ་ཕུང་པོའི་གྲོང་ཁྱེར་དུ་སྐུ་དང་ཡེ་ཤེས་ཀྱི་རོལ་པར་ལྷུན་གྱིས་གྲུབ་པ་ནི་ཉི་མ་དང་ཉི་མའི་ཟེར་བཞིན་དུ་སྒྱུ་དང་འཕྲུལ་གྱི་ཚུལ་དུ་རྫོགས་པ་ཡིན་ལ། མ་དག་འཁོར་བའི་གནས་རིས་ཇི་སྙེད་དུ་སེམས་ཅན་རིགས་མི་འདྲ་བའི་རྣམ་གྲངས་དུ་མ་བསམ་གྱིས་མི་ཁྱབ་པ་མང་པོས་རྣམ་འགྱུར་དང་བྱ་སྤྱོད་མ་ངེས་པ་མཐའ་ལས་འདས་པར་ཐ་དད་དང་སོ་སོ་རང་རྒྱུད་པའི་ཚུལ་དུ་སྟོན་ཅིང་སྣང་ཡང་། སེམས་མ་རིག་བདག་ཏུ་བལྟས་པའི་འཛིན་ཤེས་གཅིག་གིས་གཅུན་པས་འཁྲུལ་ཉམས་ལས་རྨི་ལམ་ལྟ་བུར་བྱུང་བ་མ་གཏོགས་དོན་དུ་གཅིག་ཀྱང་མ་གྲུབ་པར་རང་ཉིད་རྫོགས་པ་ཆེན་པོའི་དབྱིངས་སུ་གཅིག་ཆར་དུ་འགག་པ་མེད་པར་རྫོགས་པ་དང་། དེ་བཞིན་དུ་སྣོད་བཅུད་དང་འདོད་ཡོན་ལྔ་ཡི་ཡུལ་སྣང་སོགས་ནང་བདག་ལུས་ཕུང་ཁམས་སྐྱེ་མཆེད་དང་བཅས་པའི་སྣ་ཚོགས་སྣང་བའི་ཆོས་ཐམས་ཅད་ང་ཉིད་རྫོགས་པ་ཆེན་པོའི་རོལ་བ་ལས་མེད་པས། འོ་ན་འཁོར་འདས་ཀྱི་ཆོས་ཐམས་ཅད་ཀྱི་འཕྲུལ་གཞི་ནི་ང་ཉིད་ཆོས་སྐུ་ཀུན་ཏུ་བཟང་པོ་ཡིན་པས། ཆོས་སྐུ་ཀུན་ཏུ་བཟང་པོ་གཞི་རྒྱུད་བདེ་གཤེགས་སྙིང་པོས་འཁོར་འདས་ཀུན་ལ་བཟང་ངན་མེད་པར་ཁྱབ་ཅིང་མཉམ་པར་བརྡལ་བ་སྟེ། དེའི་རང་ཞལ་མངོན་དུ་གྱུར་པ་ན་སངས་རྒྱས་ཐམས་ཅད་ཀྱི་ཞལ་དུས་གཅིག་ཏུ་མཇལ་བས་སངས་རྒྱས་གཞན་དུ་མི་ཚོལ་བར་ཆོས་སྐུའི་ཞལ་རིས་མཇལ་བ་ལ་བརྩོན་པ་དྲག་པོས་སྟོབས་བསྐྱེད་ན་རང་ཐོག་ཏུ་རང་སངས་རྒྱས་ཏེ་ཁམས་གསུམ་འཁོར་བ་ཡང་དོང་ནས་སྤྲུགས་པའོ། །དེ་ལྟར་ཆོས་ཐམས་ཅད་ང་ཡིས་བྱས་ཞིང་བསྐྱེད་པའི་ཆོ་འཕྲུལ་ལས་གཞན་འགའ་མེད་ངེས་པ་ཡིན་པས་དེས་ན་ཆོས་རྣམས་ཐམས་ཅད་རྐྱེན་གྱིས་ལྟོས་གྲུབ་ལ་རག་ལུས་པའི་ཕྱིར། རྐྱེན་དང་ཐབས་ཀྱིས་བསྐྱེད་པའི་འཁོར་འདས་ཀྱི་ཆོས་ཐམས་ཅད་ང་ཡི་དབྱིངས་ཉིད་སྤྲོས་པ་ཐམས་ཅད་དང་བྲལ་བའི་གཞི་ལ་རྒྱུ་བྱས་ཤིང་རྟེན་དེ་ལ་བརྟེན་ནས། རྐྱེན་ཡེ་ཤེས་རླུང་འགྱུས་གྲོལ་འཁྲུལ་བསྐྱེད་པ་དང་འབྲེལ་བའི་སྒྱུ་འཕྲུལ་གར་གྱི་རྣམ་རོལ་དུ་ཆོས་ཐམས་ཅད་བཏགས་པ་ཙམ་དུ་མ་འགག་ཐབས་ཀྱི་ཆ་རུ་སྣང་བ་ཡིན་ནོ། །གོང་དུ་བཤད་པའི་མགྲོན་བཞི་སོགས་མཆོད་སྦྱིན་གྱི་དགའ་སྟོན་སྤལ་འགྱེད་བྱེད་པ་དེ་དག་ཐམས་ཅད་ཀྱང་ཆོས་ཀུན་སྒྱུ་མར་རྟོགས་པའི་རྣལ་འབྱོར་པའི་ཟབ་མོ་ལྟ་བའི་ཏིང་ངེ་འཛིན་གྱིས་འདུན་མ་བསྒྱུར་བས་རྩེ་ལ་རབ་ཏུ་མི་གནས་པ་ནི་གཅིག་ཀྱང་མེད་པས། དེས་ན་སྒྱུ་མ་ལྟ་བུའི་རྣལ་འབྱོར་གྱིས། སྒྱུ་མའི་ཁྲོམ་ཚོགས་ལྟ་བུའི་འཁོར་འདས་ཀྱི་མགྲོན་བཞི་པོ་བཀོད་ནས། སྒྱུ་འཕྲུལ་ལྟ་བུའི་ཕྱི་ནང་སྣོད་བཅུད་ཀྱི་ཆོས་ཀུན་མཆོད་སྦྱིན་གྱི་དགའ་སྟོན་དུ་འཕྲུལ་ཞིང་འགྱེད་པ་དེ་ཡང་རྒྱུ་ང་ཉིད་རྡོ་རྗེ་ཆོས་དབྱིངས་ལས། རྐྱེན་ཏིང་ངེ་འཛིན་ལ་མངའ་དབང་འབྱོར་བའི་སྟོབས་ཀྱིས་འཕྲུལ་ཡང་མ་འགག་ཅིར་ཡང་སྣང་བ་ཙམ་དུ་དེ་ལས་འཕྲུལ་བ་དང་། ཐམས་ཅད་བསྡུ་ཡང་སྐྱེ་བ་མེད་པ་ང་ཉིད་ཀ་དག་མཚན་མ་ཚིག་བྲལ་གྱི་གཉུག་མའི་སོན་ལ་མི་འདུ་བ་དང་མཆུབ་པ་མེད་པས། འདིས་ནི་རྒྱུ་བསོད་ནམས་ཀྱི་ཚོགས་དང་འབྲས་བུ་ཡེ་ཤེས་ཀྱི་ཚོགས་གཉིས་རླབས་པོ་ཆེ་བསམ་གྱིས་མི་ཁྱབ་པ་རྫོགས་པ་ཡིན་ཏེ། དོན་ལ་སྤྲོ་བསྡུ་དང་བྲལ་བར་ཟབ་ཅིང་ཞི་བའི་གནས་ཆོས་ཉིད་བརྗོད་དུ་མི་ཐུབ་པ་དབྱིངས་བྱ་རྩོལ་ལས་འདས་པ་རང་བཞིན་འོད་གསལ་བའི་བདག་ཉིད་ཅི་ཡང་མ་ཡིན་པས་རང་ཁར་དུ་འདུག་པ་ནི་གཞི་བདེ་བར་གཤེགས་པའི་བདག་ཉིད་ཅན་ནོ། །གཉིས་པ་ལམ་གྱི་དུས་ན་ལྟ་བ་དང་། སྒོམ་པ་དང་། སྤྱོད་པ་གསུམ་ལས། དང་པོ་ལ་ཕཊཿཀྱིས་སྣང་བ་ཐམས་ཅད་བསྡུ་གཏོར་བྱས་ཏེ། ང་ནི་མི་གནས་པའི་སྟོང་པ་ཉིད་དོ། །ཅི་ཡི་ཕྱིར་ཞེ་ན་གཟུང་འཛིན་གཉིས་བསྡུས་ཀྱི་སྣ་ཚོགས་སྣང་བའི་ཆོས་སོ་ཅོག་ཐམས་ཅད་སྟོང་ཉིད་དབུ་མ་ཆེན་པོའི་རོལ་པར་རྟོགས་པའི་དོན་རྣལ་མ་རང་རྒྱུད་ལ་འབྱོར་པས་ན། འཁོར་འདས་ཀྱི་ཆོས་ཐམས་ཅད་སྟོང་ཉིད་ཆེན་པོ་གཅིག་གི་རང་བཞིན། སྟོང་ཉིད་ཆེན་པོ་གཅིག་གི་ཡོ་ལང་། སྟོང་ཉིད་ཆེན་པོ་གཅིག་གི་འཁོར་ཡུག་ཏུ་ཐག་ཆོད་པའི་རྟོགས་པ་མངོན་དུ་གྱུར་བའི་གཉིས་སྣང་སྲིད་པ་བག་ཆགས་ཀྱི་ཆ་རུ་གཏོགས་ཚད་ཐམས་ཅད་རྒྱུ་རྐྱེན་ཚོགས་པ་ལས་སྒྱུ་མ་ལྟ་བུ། མེད་ལ་ཡོད་པར་སྣང་བ་མིག་ཡོར་ལྟ་བུ། གློ་བུར་གྱི་རྫུན་རིས་རྨི་ལམ་ལྟ་བུ། ཕྱི་ནང་གང་ནའང་མི་གནས་པར་བྲག་ཅ་ལྟ་བུ། རང་བཞིན་གྲུབ་པ་མེད་པས་སྨིག་རྒྱུ་ལྟ་བུ། གནས་ཡུལ་བདག་པོ་མེད་པས་དྲི་ཟའི་གྲོང་ཁྱེར་ལྟ་བུ། སྣང་ལ་དེར་འཛིན་མེད་པས་གཟུགས་བརྙན་ལྟ་བུ། རྟེན་ཅིང་འབྲེལ་བར་འབྱུང་བས་ཆུ་ཟླ་ལྟ་བུ། སྣང་ཡང་གྲུབ་པ་མེད་པས་ཆ་བུར་ལྟ་བུ། མ་ངེས་ཅིར་ཡང་འཆར་བས་སྤྲུལ་པ་ལྟ་བུ་སྟེ། ཆོས་ཐམས་ཅད་བདེན་མེད་ཉམས་ཀྱི་རྫུན་རིས་ངེས་པ་རུ་རྟོགས་ཏེ་སྟོང་གཟུགས་སྒྱུ་མའི་དཔེ་བཅུའི་ལམ་དུ་འཁྱེར་བ་། ཡུལ་སྣང་གི་ཆོས་གང་ལའང་གཙང་དམེ་དང་བཟང་ངན་མེད་པར་ཆོས་ཉིད་ནམ་མཁའ་མཛོད་ཀྱི་ཏིང་ངེ་འཛིན་གྱི་མཆོད་པ་དང་སྦྱིན་ཚོགས་སུ་སྤེལ་ཞིང་དགའ་སྟོན་འགྱེད་པ་སྟེ། སྔོན་ཆད་མི་ཤེས་པའི་རྨོངས་པའི་དབང་གིས་གང་ཟག་ཆོས་བདག་གཉིས་པོ་ལ་བདེན་པར་ཞེན་ནས་འཁྲུལ་ཡང་། ད་ནི་ཐམས་ཅད་བདེན་མེད་དུ་རྟོགས་པའི་གནད་ཀྱིས་ཕྱི་ནང་གི་ཆོས་གང་ལའང་བདག་ཏུ་མི་འཛིན་པར་བདག་མེད་མཉམ་པ་ཉིད་ཀྱི་དབྱིངས་སུ་གཅོད་པའི་ཟབ་མོ་སྟོང་པ་ཉིད་ཀྱི་གདམས་པ་འདིས་བདག་རྟོག་གི་རཱུ་ཏྲ་བདག་མེད་དུ་བརྟུལ་ནས་ཆོས་ཉིད་ཀྱི་དབྱིངས་སུ་བཞུགས་ཤིང་ཡང་དག་པའི་ཟབ་རྒྱས་གནས་ལུགས་ཀྱི་དོན་སྐྱོང་བའོ། །དེས་ནི་གཞི་ལྟ་བའི་གནས་ལུགས་ངོ་འཕྲོད་དེ་འཁོར་འདས་འུབ་ཆུབ་ཏུ་རོལ་པའི་དགོས་པ་ཡོད་དོ། །གཉིས་པ་སྒོམ་པའི་ལམ་ལ། ང་ནི་ཐུགས་རྗེ་འགག་པ་མེད་པའི་བདག་ཉིད་དོ། །འཁོར་འདས་ཀྱི་ཆོས་ཐམས་ཅད་སྣང་བའི་ཆ་ནས་སངས་རྒྱས་དང་ཡི་དམ་རྒྱལ་བའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་ཕྱག་མཚན་རྒྱན་ཆ་ལུགས་ཀྱི་རྣམ་པར་བཞེངས་ཤིང་སྐུར་སྟོན་པའི་ཚུལ་ངོམས་པ་ལ། དོན་དུ་དེ་དག་ཐམས་ཅད་ཤེས་རབ་སྟོང་པ་ཉིད་ཀྱི་གནས་ལུགས་གཅིག་གི་རྒྱས་མ་འདེབས་པ་མེད་པས་རིག་པ་བདེ་གཤེགས་སྙིང་པོ་ཀ་དག་མཚན་མ་ཚིག་བྲལ་བརྗོད་མེད་བློ་འདས་གཏད་མེད་རྒྱ་ཡན་ཆེན་པོའི་དོན་རྣམ་མ་རང་རྒྱུད་ལ་འབྱོར་བས་ན། ཆོས་ཐམས་ཅད་དངོས་མཚན་མ་གྲུབ་པར་སྒྱུ་མ་མཁན་གྱིས་སྒྱུ་འཕྲུལ་འགྱེད་པ་ལྟ་བུའི་ཆོས་ཉིད་ནམ་མཁའ་མཛོད་ཀྱི་ཏིང་ངེ་འཛིན་གྱིས། སྣང་སྲིད་ལྷ་ཡི་དཀྱིལ་འཁོར་གྱི་རྣམ་རོལ་དུ་ཤར་བས་མགྲོན་བཞི་བཀོད་པ་ལ། དེང་འདིར་མཆོད་པ་དང་སྦྱིན་པའི་དངོས་ཡུལ་གྱི་ཆོས་ཐམས་ཅད་འདོད་ཡོན་མི་ཟད་པའི་གཏེར་ཆེན་པོའི་དགའ་སྟོན་དུ་འཕྲུལ་ཏེ་འདོད་རྒུའི་དཔལ་གྱིས་འཇོ་བའི་རྡོ་རྗེའི་མཆོད་པ་ཆེན་པོ། ཆོས་ཅན་ཆོས་ཉིད་དུ་རོལ་པའི་མཆོད་སྤྲིན་མི་ཟད་པ་རྒྱན་གྱི་འཁོར་ལོ། མ་ངེས་གར་གྱི་རྣམ་འགྱུར་དུ་མར་བསྒྱུར་བས་རང་བྱུང་ལྷུན་གྲུབ་ཆེན་པོའི་མཆོད་པའང་ཡིན་ཏེ། ཨེ་མ། མཆོད་པ་འདི་ནི་རྡོ་རྗེ་ཆེ། །ཚོགས་གཉིས་དེ་ཡང་དེ་བཞིན་དུ། །ནམ་མཁའི་ཁྱོན་ལ་རབ་ཏུ་སྙོགས། །དེ་ལ་མཐའ་ནི་མ་མཆིས་སོ། །ཞེས་ཤླཽ་ཀ་གཅིག་གིས་ཀྱང་ཐེབ་པར་གདབ་བོ། །དེ་ལྟར་གཟུང་ཡུལ་གྱི་ཆོས་ཐམས་ཅད་ལ་དངོས་པོར་བལྟས་ཞིང་མཚན་མ་འགྲུབ་པ་རུ་བདེན་པར་ཞེན་ནས་འཛིན་འཁྲིས་ཀྱི་དྲྭ་བ་ཐམས་ཅད་ཉག་གཅིག་བདེ་བ་ཆེན་པོའི་དབྱིངས་སུ་གཅོད་པའི་གདམས་པ་ཟབ་ཁྱད་ཅན་འདི་ཡིས་གཉིས་སྣང་སྲིད་པའི་རཱུ་ཏྲ་མ་རྟོགས་ལོག་རྟོག་གི་བགེགས་རིགས་ཐམས་ཅད་གཉིས་མེད་མཉམ་པ་ཉིད་དུ་བརྟུལ་ནས་རིག་སྟོང་ཕྱག་རྒྱ་ཆེན་པོའི་དབྱིངས་སུ་ཞུགས་ཤིང་མཆོད་སྤྲིན་མི་ཟད་པ་རྒྱན་གྱི་འཁོར་ལོས་དགའ་སྟོན་འགྱེད་པའི་ཆོས་ཉིད་གཉུག་མའི་ཟབ་ལམ་ལ་ལོངས་སྤྱོད་པའོ། །འོ་ན་འདི་ཀ་དག་མཚན་མ་ཚིག་བྲལ་བདེ་སྟོང་ཕྱག་རྒྱ་ཆེན་པོའི་རང་བཞིན་བསྐྱེད་རྫོགས་ཟུང་འཇུག་གི་ལམ་ཡིན་པས། སྤྱིར་ཐེག་པའི་ཆོས་སྒོ་མཐའ་དག་གི་སྒོམ་པའི་ལམ་གྱི་འཇུག་སྒོ་ནི་དམིགས་བཅས་དང་དམིགས་མེད་གཉིས་ལས་གཞན་མེད་དེ། དེ་གཉིས་ཀྱི་རྩ་བ་དམིགས་བཅས་བསྐྱེད་རིམ་ཐབས་ཀྱི་ཆ་རུ་གཏོགས་པ་དང་། དམིགས་མེད་རྫོགས་རིམ་དུ་གཏོགས་དགོས་པས་དེ་གཉིས་གང་ལ་ཡང་བསྐྱེད་རྫོགས་ཟུང་འཇུག་ཏུ་དྲང་ངེས་གང་ཡིན་ཡང་རེ་རེ་བཞིན་ལྡན་དགོས། དེ་མེད་ན་ཆོས་གང་ཡིན་ཡང་ལམ་གྱི་གནད་མ་ཤེས་པ་ཡིན་པར་རྒྱལ་བ་གོང་མའི་གསུང་གིས་གྲུབ་བོ། །དེས་ན་ཐེག་པའི་ཆོས་སྒོའི་ལམ་ཐམས་ཅད་འདི་ཡི་ཁོངས་སུ་མ་ཆུབ་ཤིང་མ་འདུས་པ་ནི་གཅིག་ཀྱང་མེད་དོ། །འདི་ལ་བསྐྱེད་རྫོགས་ཟུང་དུ་འཇུག་ལུགས་ནི་ཐབས་དང་ཤེས་རབ་གཉིས་ལས། ཐབས་དམིགས་བཅས་ཀྱི་ཆ་ལ་གཉིས་སྣང་གི་ཕུང་པོའི་ཆོས་ཐམས་ཅད་ མཆོད་སྤྲིན་གྱི་ཚོགས་སུ་སྤེལ་ཏེ་མགྲོན་བཞིའི་སྣང་བ་བཀོད་པ་ནི་བསྐྱེད་རིམ་དང་། དེ་དག་ཐམས་ཅད་ཆོས་ཉིད་གཅིག་གི་རྒྱས་ཐེབས་པ་ནི་རྫོགས་རིམ་ཡིན་པས་བསྐྱེད་རྫོགས་ཟུང་འཇུག་སྟེ། དམིགས་མེད་ཤེས་རབ་ཀྱི་དོན་ལ་གཞི་སེམས་ཉིད་མ་བཅོས་བདེ་བ་ཆེན་པོ་འོད་གསལ་བརྗོད་མེད་དག་པ་རུ་འདུག་པའི་ཀ་དག་སྤྲོས་པ་ཐམས་ཅད་དང་བྲལ་བའི་རང་བཞིན་གཉུག་མའི་གཤིས་ལ། སྣང་བ་ཐམས་ཅད་སྐུ་དང་ཡེ་ཤེས་ཀྱི་རོལ་པ་དང་མ་བཤམས་རང་བྱུང་གི་མཆོད་པའི་སྤྲིན་རྒྱ་མཚོ་རོལ་པར་འབྱམས་ཀླས་ཤིང་ལྷུན་གྱིས་གྲུབ་པས་བསྐྱེད་རྫོགས་ཟུང་དུ་འཇུག་པའོ། །དེས་ནི་སྒོམ་པ་བསྐྱེད་རྫོགས་ཟུང་འཇུག་གི་དོན་ལ་མངའ་བརྙེས་པའི་དགོས་པ་ཡོད་དོ། །གསུམ་པ་སྤྱོད་པ་ཆོས་ཉིད་ཀྱི་ལམ་དུ་འཁྱེར་བ་ལ། ང་ཉིད་ལྷུན་གྲུབ་གཞོན་ནུ་བུམ་སྐུའི་རོལ་པ་ལས། འཁོར་འདས་ལམ་གསུམ་ཐམས་ཅད་ཆོས་ཉིད་ཀྱི་དབྱིངས་ལ་སྐུ་དང་ཡེ་ཤེས་ཀྱི་རོལ་པར་རྫོགས་པའི་ཐེག་པ་ཐམས་ཅད་ཀྱི་སྤྱི་གཞིའི་རྒྱལ་པོ་ལྟར་གྱུར་བའི་ཆེན་པོ། དེ་ཡང་རྫོགས་ཆེན་གྱི་གདམས་པས་ཉམས་ལེན་གྱི་དོན་ཅུང་ཟད་སྤྲོ་བ་བླ་མའི་ཞལ་ནས་བྱུང་བའི་གདམས་ངག་ལྟར། དང་པོ་གང་ཟག་ཆོས་བདག་གཉིས་པོའམ་གཟུང་འཛིན་གཉིས་བསྡུས་ཀྱི་ཆོས་ཐམས་ཅད་གོང་དུ་བཤད་པ་ལྟར་རྒྱུ་མའི་དཔེ་བཅུའི་རང་བཞིན་སྟོང་པ་ཉིད་དུ་སོ་སོར་རྟོག་པའི་ཤེས་རབ་ཀྱིས་གཏན་ལ་ཕབ་སྟེ། སྟོང་ཉིད་དེའི་གནས་ལུགས་ཀྱི་ངོ་བོ་རིག་སྟོང་ཀ་དག་ཟང་ཐལ་རྗེན་པ། སྨྲ་མི་ཤེས་པ། བརྗོད་མི་ནུས་པ། མཚན་མ་མེད་པ། སྤྲོས་པ་ཐམས་ཅད་དང་བྲལ་བའི་ཟབ་ཅིང་ཞི་བའི་གནས་དེ་ལ་བཅས་བཅོས་དང་ཡིན་མིན་གྱི་བློས་མ་བསླད་པ། འདས་མ་འོངས་ད་ལྟའི་རྟོག་ཚོགས་ཀྱིས་འཕྲོ་མ་མཐུད་པ། ད་ལྟའི་གཤིས་སོ་མ་རང་ཀ་མའམ་ཤེས་པ་སལ་ལེ་སང་ངེ་ཧྲིག་གེ་བ་འདི་ཀ་ངོ་སྤྲོད་པ་ནི་གཞི་ཡིན་ཏེ། དེ་ལ་དངོས་མཚན་བདེན་གྲུབ་སོགས་ཆེ་ཆུང་དང་སྟེང་འོག་ཕྱོགས་མཚམས་ཏེ་ཆོས་དབྱིངས་ཀུན་ནས་ཟླུམ་པའི་ཐིག་ལེ་ཉག་གཅིག་ཏུ་འཁོར་འདས་ཀྱི་ཆོས་ཐམས་ཅད་སྐུ་དང་ཡེ་ཤེས་ཀྱི་རོལ་པར་རང་ཆས་སུ་རྫོགས་པར་ཤེས་ཏེ་རྟོགས་པ་མངོན་དུ་གྱུར་པ་ནི་བདག་མེད་རྟོགས་པའི་ཤེས་རབ་ཞེས་བྱའོ། །དེ་ཚེ་ཉིན་མཚན་ཁ་སྦྱོར་ཏེ་བརྩོན་འགྲུས་དྲག་པོས་རིམ་པར་གོམས་ན་ལྟ་སྒོམ་ལ་གདེང་ཐོབ་པ་ཡིན་པས། དེ་ལྟ་བུའི་གདམས་ངག་གིས་དོན་རྣལ་མ་རྒྱུད་ལ་འབྱོར་བའི་གང་ཟག་དེ་ནི་ངེས་པར་རྫོགས་པ་ཆེན་པོའི་རྣལ་འབྱོར་པ་ཞེས་སུ་གྲགས་ཤིང་འབོད་དུ་ཡང་རུང་བ་ཡིན་ནོ། །ཡང་ས་བཅད་ལྟར་ན་ལྟ་བའི་དུས་ན་གཟུང་འཛིན་གཏན་དབབ། སྒོམ་པའི་དུས་ན་རྟོགས་པ་མངོན་གྱུར། སྤྱོད་པའི་དུས་ན་གདེང་གིས་གྲོལ་ཚད་རྣམས་རིམ་པར་དབྱེ་ཡོད་ན་ཡང་གོ་བདེ་བའི་ཕྱིར་དུ་སོ་སོར་མ་དབྱེ་བར་རྫོགས་ཆེན་དང་བསྟུན་ནས་ངོ་སྤྲོད་ཀྱི་གདམས་པ་ཅུང་ཟད་ཙམ་བསྟན་པ་འདི་སྤྱོད་པའི་སྐབས་འདིར་བཞག་པའོ། །དེ་ལྟར་དང་ལྡན་པའི་རྣལ་འབྱོར་པས་འཁོར་འདས་ཀྱི་ཆོས་ཐམས་ཅད་རིག་པ་བདེ་གཤེགས་སྙིང་པོ་སྐུ་བཞི་ཡེ་ཤེས་ལྔ་ཡི་བདག་ཉིད་ཀྱི་རང་བཞིན་ཀ་དག་ཟང་ཐལ་རྗེན་པར་གཅིག་ཏུ་རྟོགས་པ་ཡིན་ཞེས་པས་ལྟ་བའི་གདེང་སྐད་བཤད་པ་སྟེ། ད་ནི་མཆོད་སྦྱིན་གྱི་ཡུལ་ལས་འདས་ཏེ་མཆོད་བྱ་དང་མཆོད་བྱེད་མཆོད་ཡུལ་གྱི་འཁོར་གསུམ་པོ་ཡེ་ནས་ཆོས་ཉིད་གདོད་མའི་གཞི་རུ་རྣམ་པར་དག་ཅིང་དོན་གཉིས་ཀྱི་མཛད་པ་མཐར་ཕྱིན་པས་ཕྱོགས་ལས་རྣམ་པར་རྒྱལ་བའམ་ཚད་མེད་པའི་སྤྱོད་པའི་ལམ་དུ་བརྟུལ་ཞིང་ལྷུན་གྲུབ་དང་ཡེ་ཤེས་ཀྱི་རོལ་པ་ཀ་དག་ལྷུམས་ཞུགས་ཀྱིས་གཞི་ལ་ཕྱིན་ཏེ། གདོད་མའི་གནས་ལུགས་འོད་གསལ་སྦུབས་འཇུག་གི་ནང་དབྱིངས་སུ་སྒྲིབ་གཉིས་ཀྱི་དྲི་མ་དག་ཅིང་། །སྐུ་དང་ཡེ་ཤེས་ཀྱི་སྣང་བ་མཁའ་དང་མཉམ་པར་བརྡལ་བའི་རྒྱལ་བའི་གསང་ལམ་ཆེན་པོའི་དགོངས་པ་མངོན་དུ་བྱའོ། །དེས་ནི་ཕྱོགས་ལས་རྣམ་པར་རྒྱལ་བའི་བརྟུལ་ཞུགས་ཀྱི་སྤྱོད་པའི་ལམ་ཟབ་མོ་མཐར་ཕྱིན་པའི་དགོས་པ་ཡོད་དོ། །མ་ཟད་ལམ་དུས་ཀྱི་ལྟ་སྒོམ་སྤྱོད་གསུམ་ཐམས་ཅད་དོན་ལ་རང་བཞིན་རྣམ་པར་དག་ཅིང་སྐྱོན་དང་དྲི་མས་མ་གོས་པར་ཆོས་ཉིད་ཀྱི་དབྱིངས་གཅིག་ཏུ་ཡོན་ཏན་གྱི་བཀོད་པ་ཐམས་ཅད་མ་བརྩལ་ལྷུན་གྱིས་གྲུབ་པ་རྒྱལ་བའི་ཐུགས་གསང་ཆོས་ཉིད་ཡངས་པའི་ལམ་ཆེན་མངོན་དུ་བྱེད་པའི་ལམ་བདེ་བར་གཤེགས་པའི་བདག་ཉིད་ཅན་ནོ། །གསུམ་པ་འབྲས་བུ་ལ་སྤྱི་དང་བྱེ་བྲག་གཉིས་ལས། དང་པོ་འཁོར་འདས་ཀྱི་མགྲོན་བཞི་པོ་ཆོས་ཉིད་གཉུག་མའི་གཤིས་ལ་ཅིག་ཆར་དུ་རྫོགས་པར་རིགས་པས་ཕཊཿགསུམ་གྱིས་མངོན་དུ་བྱེད་པ་ལ། རང་གི་གཞི་ཀུན་ཏུ་བཟང་པོ་དུས་གསུམ་དུ་བདེ་བར་གཤེགས་པའི་སྙིང་པོ་ཅན་འདི་ཉིད་ལ་མཆོག་གསུམ་དང་རྩ་གསུམ་ཐམས་ཅད་ཀྱི་གཟུགས་སྐུའི་ལྷ་ཚོགས་ཀྱི་རྣམ་པ་མ་འདྲེས་སོ་སོ་རུ་ཉི་མ་དང་ཟེར་གྱི་ཚུལ་དུ་ཅིར་ཡང་འཆར་བ་ཡིན་པས་དེའི་དབྱིངས་ལ་དཀོན་མཆོག་སྲི་ཞུའི་མགྲོན་རྣམས་གསལ་ཏེ། ལམ་གྱི་དུས་འདིར་སྣང་བ་བཞི་པོའི་ཉམས་དང་རྟོགས་པས་བསྐྱེད་པའི་རིག་པའི་ཡེ་ཤེས་དང་ཡོན་ཏན་གྱི་ཐུགས་རྗེའི་རྩལ་ལས་སར་གནས་བྱང་སེམས་མགོན་པོ་ཆོས་སྐྱོང་གི་ཚོགས་རྣམས་ཟླ་བས་ཆུ་ཟླ་རོལ་པ་བཞིན་དུ་སྣང་བ་ཡིན་པས། གཞི་དེ་ལས་མགོན་པོ་ཡོན་ཏན་གྱི་མགྲོན་ཐམས་ཅད་བསྔོས་ཏེ། ཟབ་མོ་སྟོང་པ་ཉིད་ཀྱི་གནས་ལུགས་ཀྱི་དོན་ཆོས་ཉིད་ཟག་པ་མེད་པ་ལྷན་སྐྱེས་བདེ་བ་ཆེན་པོའི་མཆོད་པ་འབུལ་ཚུལ་ནི་ཆོས་ཉིད་བསམ་མི་ཁྱབ་པ་དགའ་བདེ་ཚད་མེད་པའི་རོས་སྣང་བ་ལྷུན་གྲུབ་ཀྱི་མགྲོན་རྣམས་གཉིས་མེད་དུ་རོལ་པས་མཉེས་ཤིང་ཆོས་ཉིད་དུ་ཞི་བས་ཚིམས་པ་སྟེ། གདོད་མའི་རང་གདངས་ཀ་དག་ཟང་ཐལ་ཆེན་པོའི་དབྱིངས་སུ་སྒྲིབ་གཉིས་བག་ཆགས་དང་བཅས་པ་བྱང་ནས་སྐུ་དང་ཡེ་ཤེས་ཡོན་ཏན་ཞིང་དང་བཀོད་པ་མི་ཟད་པ་རྒྱན་གྱི་འཁོར་ལོ་ཐམས་ཅད་རང་ཆས་སུ་ལྷུན་གྱིས་གྲུབ་པར་ཆུབ་བོ། ཕཊཿ གསུམ་གྱིས་དེ་ལྟར་དུ་རྒྱས་གདབ་བོ། །ད་སྔོན་མ་རིག་པའི་དབང་གིས་སེམས་ཉོན་མོངས་པ་དུག་གསུམ་གྱི་གདངས་སུ་ཆུ་ལས་ཆུ་བུར་རྡོལ་བ་ལྟར་གྲུབ་པས་ཁམས་གསུམ་འཁོར་བའི་གནས་རིགས་དྲུག་སོ་སོའི་ཡུལ་དང་བཅས་པའི་སྣང་བ་དེ་རྣམས་རིགས་དྲུག་སྙིང་རྗེའི་མགྲོན་ཐམས་ཅད་སེམས་ལ་རང་ཆས་སུ་རྫོགས་པར་ཤེས་པས་ངང་དུ་གསལ། སེམས་བྱུང་གི་རྩལ་རྣམ་པར་རྟོག་པ་རགས་ཕྲ་དུ་མས་བསྐྱེད་པའི་རྡ་རྡུ་རའི་བཅུད་ཟོས་པ་ལྟ་བུར་སྲིད་པའི་ལྷ་འདྲེ་ཆེ་འབྲིང་ཆུང་གསུམ་གྱི་བགེགས་རིགས་ལན་ཆགས་ཀྱི་ཚོགས་མང་པོ་རྟེན་ཅིང་འབྲེལ་འབྱུང་ཙམ་དུ་སྣང་བར་འགྱུར་ཡང་། དེ་དག་ཐམས་ཅད་དོན་ཆོས་ཉིད་གཉུག་མའི་སོན་ལ་ཡེ་ནས་མི་གནས་ཤིང་མ་གྲུབ་པར་གཉིས་སྣང་གི་ཆ་ཐམས་ཅད་གཉིས་མེད་མཉམ་པ་ཉིད་དུ་རོལ་པའི་གདམས་ངག་ཟབ་མོའི་ཆོས་ཀྱིས་མ་བཅོས་རང་ཆས་སུ་ཆོས་ཏེ། ཆོས་ཉིད་ཀྱི་དབྱིངས་རང་བཞིན་མི་འཛད་ཟད་མི་ཤེས་པའི་འདོད་ཡོན་རྒྱན་གྱི་འཁོར་ལོ་ནམ་མཁའ་མཛོད་ཀྱི་གཏེར་ཆེན་པོའི་དགའ་སྟོན་གྱི་དཔལ་ལ་རང་དབང་དུ་ལོངས་སྤྱོད་པའི་ཕྱིར་སྦྱིན་ཅིང་སྟེར་བའོ། །དེས་ནི་འབྲས་བུ་ལ་སྨོན་པ་མེད་པ་ཐོབ་ཤོར་དང་བྲལ་བའོ། །དེ་ལྟར་ཉམས་ལེན་གྱི་གནད་དོན་མ་རྟོགས་པ་རྣམས་ཀྱི་ཡས་མགྲོན་རྣམས་ལ་མཆོད་སྤྲིན་འོད་ཟེར་གྱི་ཚུལ་དུ་འཕྲོས་པས། དེ་ལ་རྒྱལ་བའི་ལྷ་ཚོགས་རྣམས་ཀྱི་ལྗགས་རང་རྟགས་ཀྱིས་ཕྱག་རྒྱས་མཚན་པའི་འོད་ཟེར་གྱིས་སྦུབས་སུ་རྒྱ་མཚོ་ལ་ཉི་ཟེར་ཕོག་པ་ལྟར་བདུད་རྩིའི་བཅུད་དྲངས་ཤིང་བཞེས་པས་སྐུ་གསུང་ཐུགས་ཀྱི་དགྱེས་པ་བསྐངས་སྟེ་མཆོག་ཐུན་མོང་གི་དངོས་གྲུབ་མ་ལུས་པ་བདག་རྒྱུད་ལ་ཐོབ་པར་བསམ་པ་དང་། མས་མགྲོན་རྣམས་ལ་གང་ལ་གང་འདོད་ཅི་ལ་ཅི་དགྱེས་འདོད་རྫས་མི་ཟད་པ་རྒྱན་གྱི་འཁོར་ལོའི་རང་བཞིན་མཁོ་རྒུ་ལེགས་པའི་དཔལ་ཡོན་ཐམས་ཅད་རཏྣའི་སྙིང་པོའི་སྤྲིན་ཆར་འབབས་པ་ལྟར་ཐམས་ཅད་ལ་ཐོབ་སྟེ་ངོམས་ཤིང་ཚིམས་པས་རྒྱུད་སྨིན་ཅིང་གྲོལ་བར་བསམས་ཏེ་ཕཊཿགསུམ་གྱིས་འགྱེད་དམིགས་བྱའོ། །གཉིས་པ་བྱེ་བྲག་པ་ལ་མགྲོན་ཐམས་ཅད་ཕྱི་ནང་བར་གསུམ་གྱིས་ཕྱེ་བས་རེ་དོགས་ཀྱི་ཡུལ་ལྷ་འདྲེ་གཉིས་གཉིས་ཀྱི་རང་བཞིན་དུ་དབྱེ་ལ་ཕྱི་ཡུལ་སྣང་གི་ཆོས་འདི་དག་ཐམས་ཅད་སེམས་ཅན་འདུལ་ངོས་ནས་བཟང་ངན་དང་ཕན་གནོད་དུ་གྱུར་བའི་རང་བཞིན་ལས་གཅིག་ཀྱང་མེད་པ་ཡིན་ན། དེ་དག་ཐམས་ཅད་གཟུང་བ་ཡུལ་གྱི་དངོས་མཚན་དང་བདེན་གྲུབ་ཏུ་ལྟ་བས་རེ་དོགས་ཀྱི་འཁྲུལ་པའི་ལམ་དུ་ཁ་དྲང་བས་ལྷ་འདྲེ་ཁོ་ན་ཡིན་ངེས་པས་དེ་དག་ཐམས་ཅད་ལ། གཉིས་སྣང་གི་ཕུང་པོའི་ཆོས་ཐམས་ཅད་གོང་གི་དུས་ནས་གཉིས་མེད་སྟོང་པའི་རང་བཞིན་མཆོད་སྦྱིན་མི་ཟད་པའི་གཏེར་ཆེན་པོའི་འཕྲུལ་དུ་འགྱེད་ཡོད་པས་སྣ་ཚོགས་སྣང་བའི་སྒྱུ་མའི་དགའ་སྟོན་གྱིས་འདོད་རྒུའི་དཔལ་ཡོན་དེ་རྣམས་འབུལ་བས་ན་ཆོས་ཉིད་དུ་བཤིག་ནས་གཉིས་མེད་མཉམ་པ་ཉིད་དུ་བཞག་པས་འབུལ་བ་བླ་ན་མེད་པའོ། །གང་ལགས་ན་ཡུལ་གྱི་འཛིན་རྟོག་དངོས་ཞེན་དུ་འཐས་པའི་འཁྲུལ་པ་བག་ཆགས་ཀྱི་སྣང་བ་ཐམས་ཅད་ཆོས་ཉིད་ཀྱི་གཞི་ལ་རྣམ་པར་དག་ནས། ངོ་བོ་སྤྲོས་པ་ཐམས་ཅད་དང་བྲལ་བའི་བདག་ཉིད་དོན་དམ་མི་ཤིགས་པའི་གནས་ལུགས་ཆོས་ཉིད་ཡུལ་མེད་བརྗོད་བྲལ་ཟང་ཐལ་རྒྱ་ཡན་ཆེན་པོར་འཁོར་འདས་ཐིག་ལེ་ཉག་གཅིག་ཏུ་རོལ་པའི་ཚད་མེད་པའི་མཆོད་པ་ཆེན་པོ་བཞེས་ཏེ་བདེ་གཤེགས་རྒྱལ་བའི་དགོངས་པ་མངའ་བརྙེས་སོ། །ཕཊཿ གསུམ་གྱིས་མངོན་དུ་བྱེད་དོ། ། ནང་བདག་ཏུ་ལྟ་ཞིང་འཛིན་པའི་རེ་དོགས་ཉེར་ལེན་གྱི་ཤེས་པའི་རྟོག་ཚོགས་ཕྲ་རགས་དུ་མའི་ཚོགས་རྣམས་ཚེ་རབས་ཐམས་ཅད་དུ་ལོག་ལམ་ལ་ཁ་དྲང་བས་སེམས་ཀྱི་ཁམས་སུ་རྒྱུ་བའི་ལྷ་འདྲེ་ཡིན་པས་དེ་ལ། ཉེ་བར་ལེན་བྱའི་ཉིན་མཚན་སོགས་དུས་ཀུན་ཏུ་ཚོགས་དྲུག་གི་སྣང་བ་རྒྱུན་མི་འཆད་པའི་འཕྲུལ་དགའ་སྟོན་གྱི་བཀོད་པ་མེད་བཞིན་དུ་སྣང་བའི་འདོད་རྒུ་མི་ཟད་པའི་གཏེར་ཆེན་པོ་ནམ་མཁའ་མཛོད་ཀྱི་དཔལ་ཡོན་སྟེར་བས་ན་འཛིན་འཁྲིས་དབྱིངས་སུ་བཤིག་ནས་བདེ་སྟོང་ལྷན་སྐྱེས་ངང་དུ་བཞག་པས་ཡེ་ཤེས་སུ་འཆར་བ་ནི། ང་དང་བདག་ཏུ་འཛིན་ཡུལ་གྱི་གནས་ལ་མངོན་པར་ཞེན་པས་ཨ་ནས་ཡང་འཐས་སུ་འཕྱོངས་པའི་ཀུན་གཞི་མཐུག་པོ་གནས་སུ་དག་ཅིང་རྣམ་པར་གྲོལ་ནས། དོན་གྱི་ངོ་བོ་གཞི་མ་གྲུབ་པ་སྨྲ་བསམ་བརྗོད་མེད་རྩ་བ་མ་གྲུབ་པ་སྤྲོས་པའི་མཐའ་བྲལ་བདེ་སྟོང་རྣམ་ཀུན་མཆོག་ལྡན་ཆོས་ཉིད་ཟག་པ་མེད་ཞིའི་དབྱིངས་བརྗོད་ལས་འདས་པའི་མཆོད་པ་ཆེན་པོ་བཞེས་ཏེ་ཀ་དག་གདོད་མའི་ནང་དབྱིངས་ལ་མངའ་བརྙེས་སོ། །ཕཊཿ གསུམ་གྱིས་ལམ་དུ་འཁྱེར་རོ། །བར་གྱི་འདི་ལྟར་གཟུང་བ་དང་འཛིན་པའི་ཁམས་སུ་འབྲེལ་བའི་སྲིད་པ་ཧྲིལ་པོར་འཐས་པའི་གཤིས་ལ་རེ་དོགས་ཀྱི་ཡུལ་དཀར་ནག་གི་ལྷ་འདྲེ་མང་པོ་རྟེན་ཅིང་འབྲེལ་འབྱུང་དུ་རྒྱུ་བས་དེ་རྣམས་ལ། སྲིད་པའི་སེམས་སྣང་གི་བག་ཆགས་དགའ་སྟོན་དུ་འཕྲུལ་པའི་འཁོར་བ་རྟེན་འབྲེལ་བཅུ་གཉིས་ཀྱི་ཚུལ་དུ་ལུགས་སུ་འབྱུང་བའི་ཆོས་རྣམས་ཐམས་ཅད་སྦྱིན་ཅིང་སྟེར་བའི་མོད་ལ་སེམས་སྣང་གཉིས་མེད་དུ་བཞག་པས་ཀ་དག་ཁྱབ་བརྡལ་ཆེན་པོ་མངོན་དུ་བྱེད་པ་ནི། འདི་ལྟ་སྟེ་གཟུང་འཛིན་གཉིས་བསྡུས་ཀྱི་ཡུལ་ཆོས་འཁྲུལ་སྣང་མ་ལུས་པ་སྤང་བྱ་དང་ལེན་བྱ་མེད་པར་ཆོས་ཉིད་གདོད་མའི་གཞི་ལ་རང་ཞིག་རང་དག་ཏུ་སོང་ནས། གཞི་ལྷུན་གྲུབ་རྫོགས་པ་ཆེན་པོ་ཀ་དག་གཞོན་ནུ་བུམ་སྐུ་རུ་སྐུ་དང་ཡེ་ཤེས་ཀྱི་རོལ་པར་བརྡལ་ཁྱབ་དུ་བྱམས་ཀླས་པས་མཆོད་པ་ཆེན་པོ་བཞེས་སུ་གསོལ་བས་ཕྲ་བའི་ཡེ་ཤེས་ཆེན་པོ་དབྱིངས་སུ་འཁྱིལ་བ་ལ་མངའ་བརྙེས་སོ། །ཕཊཿགསུམ་གྱིས་མཉམ་པར་འཇོག་གོ །དེས་ནི་འབྲས་བུ་ལ་སྤང་བླང་མེད་པར་རེ་དོགས་དང་བྲལ་བའི་གདེང་ཐོབ་བོ། །གཞན་ཡང་རིག་སྟོང་གཞི་ཐོག་ཏུ་གྲོལ་ནས་གདོད་མའི་གཞི་ལ་སངས་ཐད་ཀར་དུ་རྒྱ་བའི་འབྲས་བུ་བདེ་བར་གཤེགས་པའི་བདག་ཉིད་ཅན་ཞིག་ཡིན་ནོ། །བཞི་པ་མཐར་ཐུག་གི་བསྡུ་རིམ་ལ། དོན་ལ་བསྡུ་བྱ་དང་བསྡུ་བྱེད་ཀྱི་ཡུལ་ལས་འདས་ཀྱང་རྩ་བའི་ཚིག་ཟིན་ཙམ་བསྟན་པ་ལ། ཡུལ་ཁམས་གསུམ་སོགས་ཞེས་པས་ཚོགས་གཉིས་རྫོགས་པའི་བྱ་བ་རླབས་ཆེན་འདི་ཉིད་ཀྱི་མཐའ་བསྡུ་ཚུལ་ལ་མཆོད་སྤྲིན་གྱི་ཡུལ་ཁམས་གསུམ་སྲིད་པ་གཉིས་སྣང་གི་འཁོར་བའི་ཀུན་གཞི་ཚོགས་བརྒྱད་དང་བཅས་པའི་སེམས་དང་སེམས་བྱུང་གིས་སྣང་བའི་ཆོས་ཐམས་ཅད། དཔེར་ན་སྒྱུ་མ་མཁན་གྱི་སྒྱུ་མའི་འཁྲུལ་འཁོར་བསྒྱུར་བས་སྐད་ཅིག་གི་དབྱིངས་སུ་ཞིག་པ་ཇི་ལྟ་བ་བཞིན་དུ་ཞིག་སྟེ། ཆོས་ཀྱི་དབྱིངས་རང་བཞིན་འོད་གསལ་སྤྲོས་པ་དང་བྲལ་བ་རྣམ་པར་ཐར་པའི་སྒོ་གསུམ་དང་ལྡན་པའི་བདག་ཉིད་ཟང་ཐལ་ནམ་མཁའ་ཡངས་པའི་ཤེས་རབ་ཡུམ་གྱི་གནས་ལུགས་གསང་ཆེན་དོན་གྱི་བཙུན་མོའི་མཁའ་རུ། ད་ནི་ཇི་སྲིད་ནམ་མཁའ་གནས་ཀྱི་བར་ཉིད་དུ་འཁོར་འདས་གཉིས་ཀ་བཟང་ངན་མེད་པར་སྒྲིབ་གཉིས་ཀྱི་དྲི་མ་དག་ཅིང་མཁྱེན་གཟིགས་སྐུ་གསུམ་ལྷུན་གྲུབ་ཀྱི་རོལ་བར་མཉམ་པར་བརྡལ་བ་ཆེན་པོའི་འབྱམས་ཀླས་པས་མཆོག་ཐུན་མོང་གི་དངོས་གྲུབ་ཐོབ་པ་འདི་ཨ་ལ་ལ་ཞེས་པས་ཆོས་ཉིད་གསང་ཆེན་དོན་གྱི་ནམ་མཁའི་དབྱིངས་མངོན་དུ་བྱེད་དོ། །ཕཊཿདང་པོས་སྤྲུལ་སྐུ་ཁྲོས་མ་ནག་མོའི་ཐུགས་དང་བསྟིམས་ཏེ་སྤྲུལ་སྐུའི་དགོངས་དོན་རྫོགས་པར་བསམ། གཉིས་པས་ལོངས་སྐུ་མཁའ་སྤྱོད་དབང་མོའི་ཐུགས་དང་བསྟིམས་ཏེ་ལོངས་སྐུའི་དགོངས་དོན་རྫོགས་པར་བསམ། གསུམ་པས་ཆོས་སྐུ་ཀུན་ཏུ་བཟང་མོའི་ཐུགས་དང་བསྟིམས་པས་ཆོས་སྐུའི་དགོངས་དོན་རྒྱུད་ལ་རྫོགས་པར་མངོན་དུ་བྱེད་ནས་བརྗོད་མེད་དུ་མཉམ་པར་འཇོག་གོ །འདི་ལྟར་རྫོགས་པ་ཆེན་པོའི་གནད་དོན་ཁོང་དུ་ཆུབ་པའི་རྣལ་འབྱོར་པ་རྣམས་ཀྱིས་ཕ་ཡུལ་རྒྱབ་ཏུ་སྤངས་ནས་གནས་ངེས་མེད་ཀྱི་རི་ཁྲོད་མི་གྲགས་ཁྱི་འགུས་མེད་པའི་དབེན་པ་ཁོ་ན་བསྟེན་ཏེ། ཉིན་མཚན་ཁ་སྦྱོར་ནས་ཆོས་ཉིད་རྫོགས་པ་ཆེན་པོའི་དོན་ལ་ཚེ་དང་སྒྲུབ་པ་མཉམ་པ་རུ་མཉམ་པར་བཞག་ན། དེ་ལུས་འདི་ཉིད་ལ་ཟག་མེད་འཇའ་ལུས་སུ་དེངས་ནས་གདོད་མའི་གཞི་ལ་མངོན་པར་བྱང་ཆུབ་བརྙེས་པ་ནི་ཆོས་སྐུ་རྡོ་རྗེ་འཆང་གི་གཏན་ཚིགས་སོ། །རྗེས་ཐོབ་ཏུ་དམ་ལྡན་གྱི་རྣལ་འབྱོར་པས་གདངས་སྙན་འགུག་ཅིང་རིང་བས་དབྱངས་གླུ་ལ། མ་དང་དཔའ་བོ་མཁའ་འགྲོ་ཐམས་ཅད་སྤྲིན་བཞིན་དུ་འདུ་བ་ཡིན་པས། ཆོས་ཉིད་རྫོགས་པ་ཆེན་པོའི་ཚིག་དོན་ཡིད་ལ་བྱས་ནས་དྲི་ཟའི་བུ་མོས་གླུ་དབྱངས་ལེན་པ་ལྟར་མི་འཇིགས་པའི་གདེང་བསྐྱེད་ནས། གདངས་སྙན་དལ་ལ་རིང་ཞིང་འགུག་པའི་དབྱངས་ཀྱི་འགྱུར་ཁུག་མང་པོས་ལྟ་བའི་གདེང་གླུ་རིང་མོ་འདི་ཉིད་ལེན་ནོ། །དེས་ནི་ཞི་བྱེད་བདུད་གཅོད་ཟབ་མོའི་དགོངས་པ་ལ་མངའ་བརྙེས་ནས་རང་གཞན་གྱི་ཚོགས་གཉིས་རླབས་པོ་ཆེ་མྱུར་དུ་རྫོགས་སོ། །དགོས་དངོས་གཞིའི་ཚོམས་ཏེ་གཉིས་པའོ། །གསུམ་པ་རྗེས་ཀྱི་བྱ་བ་ལ། རྟག་ཆད་ཀྱི་མཐའ་བསལ་བའི་ཕྱིར་ཆོས་ཀྱི་སྦྱིན་པ་ལ་འཇུག་པར་བྱ་བ་ནི། གོང་དུ་དམིགས་མེད་དུ་བཞག་པ་དེའི་ངང་ལས་སྐད་ཅིག་གིས་ཆུ་ལས་ཆུ་བུར་རྡོལ་བ་ལྟ་བུའམ་མཁའ་ལས་གློག་འཁྱུག་པ་ལྟ་བུ་ཞིང་ཁམས་ཀྱི་བཀོད་པ་རྒྱ་ཁྱོན་ཆོས་ཀྱི་དབྱིངས་དང་མཉམ་པ་གཞོན་ནུ་མའི་ལག་མཐིལ་ལྟ་བུར་ས་གཞི་ཐམས་ཅད་མནན་ན་ནེམ་ཞིང་བཏེགས་ན་སྤར་བ། སྨན་གྱི་སྤང་རི་ལ་དྲི་བཟང་གི་ན་བུན་འཐུལ་བ། ཁ་དོག་སྣ་ཚོགས་འབར་བའི་མེ་ཏོག་པདྨོ་བཞད་པས་ཡོངས་སུ་ཁེབས་པ། ཕྱོགས་བཞི་རུ་ཡན་ལག་བརྒྱད་ལྡན་གྱི་ཆུ་མཚོ་དང་དག་བྱེད་ཁྲུས་ཀྱི་རྫིང་བུ་དང་བདུད་རྩིའི་ཆུ་མིག་གིས་བརྒྱན་པ་ལས། དཔག་བསམ་གྱི་ལྗོན་ཤིང་རྒྱས་པ། གསེར་གྱི་བྱེ་མ་བརྡལ་བ། རིན་པོ་ཆེའི་གྲམ་ཁྲོད་བཀྲམ་པ། གཡུ་ཡི་ནེའུ་གསེང་བཀྲ་བ། སྤྲུལ་པའི་བྱ་རིགས་སྣ་ཚོགས་པས་རྣམ་འགྱུར་དུ་མར་འབྱིན་པ། རི་དྭགས་ཅང་ཤེས་མང་པོས་དགའ་བའི་ཟློས་གར་སྣ་ཚོགས་བསྒྱུར་བ། ལྷ་ཀླུ་དྲི་ཟའི་བུ་མོ་རྣམས་ཀྱིས་གར་འགྲོས་རོལ་རྩེད་ངོམ་པས་བདེ་ཆེན་ཡེ་ཤེས་བསྐྱེད་པ། ཉིན་མོ་འཇའ་ཚོན་འཁྲིགས་ཤིང་མཚན་མོ་འོད་ཟེར་འབར་བ། གང་གིས་མཐོང་བ་ཙམ་གྱིས་ཉོན་མོངས་རྣམ་པར་གྲོལ་བ། ཕྱིན་པ་ཙམ་གྱིས་རབ་དགའི་ས་རུ་གཤེགས་པ། དེ་བཞིན་དུ་བར་སྣང་ལ་ཡང་མཆོད་སྤྲིན་རྒྱ་མཚོ་བསམ་མི་ཁྱབ་པར་འཁྲིགས་པ། ནམ་མཁའ་ལ་དབྱིངས་དང་ཐིག་ལེའི་རང་བཞིན་དྲྭ་བ་མིག་མངས་རིས་སུ་བྲིས་པའི་གདུགས་དང་རྒྱལ་མཚན་བ་དན་བླ་བྲེ་སོགས་ཀྱིས་བརྒྱན་ཅིང་། ཅོད་པན་དར་དཔྱང་དྲིལ་གཡེར་སིལ་སྙན་མང་པོས་དཔྱངས་པ་ཐུར་དུ་འཕྱང་བ། རིང་བའི་ནམ་མཁའི་ཕྱོགས་མཐའ་ཀུན་ཏུ་ཡེ་ཤེས་སྒྱུ་འཕྲུལ་རོལ་པའི་དཔའ་བོ་མཁའ་འགྲོའི་ཚོགས་ཀྱིས་བྲོ་གར་སྣ་ཚོགས་ངོམ་པ། དེ་ལྟ་བུའི་ཞིང་ཁམས་སྐྱེད་མོས་ཚལ་གྱི་དབུས་སུ་རིན་པོ་ཆེའི་སེང་ཁྲི་རྒྱ་ཆེ་ཞིང་དཔངས་མཐོ་བའི་ཁར་པདྨ་དང་ཉི་ཟླའི་གདན་ལ། རང་རིག་ལས་བཅོམ་ལྡན་འདས་སྐུ་མདོག་གསེར་བཙོ་མའི་མདངས་ལྟ་བུ་དབུ་ལ་གཙུག་ཏོར་དང་ཞབས་ལ་འཁོར་ལོ་སོགས་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ་འོད་ཟེར་དཔག་ཏུ་མེད་པ་འཕྲོ་བའི་བདག་ཉིད་ལ། ཆོས་གོས་གསུམ་གྱིས་བཀླུབས་པ་ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པ། ཕྱག་གཡས་ས་གནོན་དང་གཡོན་ཆོས་འཆད་ཀྱི་ཕྱག་རྒྱ་མཛད་པ་སྐུ་སྣང་ལ་རང་བཞིན་མ་གྲུབ་པ། ནམ་མཁའི་འཇའ་ཚོན་ལྟ་བུའམ། ཆུ་ནང་གི་ཟླ་གཟུགས་ལྟ་བུར་གསལ་ཏེ། དེའི་སྐུའི་གནས་ཐམས་ཅད་དང་མཛོད་སྤུ་ནས་ཕྱུངས་པའི་འོད་ཟེར་གྱི་ཚུལ་དུ་སྤྲུལ་པའི་གཟུགས་སྐུ་སྣ་ཚོགས་བསམ་གྱིས་མི་ཁྱབ་པ་སྟོང་གསུམ་གྱི་འཇིག་རྟེན་ནམ་མཁས་གར་ཁྱབ་ཏུ་འཕྲོས་པས། ལྷ་འདྲེས་ཐོགས་དྲངས་འགྲོ་དྲུག་སེམས་ཅན་རྣམས་ལ་རང་རང་གི་རིགས་དང་བློ་དང་སྐད་དང་བསྟུན་ནས་སྡེ་སྣོད་གསུམ་སོགས་ཐེག་པའི་ཆོས་ཚུལ་མཐའ་དག་རྣམས་སྟོན་ཅིང་འཆད་པར་བསམ་ཏེ། ཆོས་སྐུ་འོད་དཔག་སོགས་དགེ་སྡིག་གཏོང་ལེན་དང་། ན་མོ་ཆོས་རྣམས་སོགས་འདོན་ཚེ་སྒྱུ་མ་ལྟ་བུའི་ངང་ནས་བྱམས་དང་སྙིང་རྗེ་ཚད་མེད་པའི་སྒོ་ནས་སེམས་རྣམ་པར་མི་གཡེང་བར་དམིགས་གནད་དང་ལྡན་པས། གདུལ་བྱའི་སེམས་ཅན་རྣམས་ཀྱི་སྣང་ངོར་མཛད་པ་བཅུ་གཉིས་ཀྱི་ཚུལ་བསྟན་ཏེ། མཐར་ཐམས་ཅད་སྨིན་ཅིང་གྲོལ་ནས་རིགས་དྲུག་སོ་སོའི་ལས་སྣང་གི་སྡུག་བསྔལ་དང་བྲལ་ཏེ་ལྷ་མིའི་ལུས་རྟེན་ལ་བྱང་ཆུབ་སེམས་དཔའ་དང་སེམས་མའི་གོ་འཕང་ཐོབ་ནས། སྤྲོས་པའི་འོད་ཟེར་རྣམས་ཚུར་བསྡུ་བ་དང་མཉམ་དུ་ཁོང་རྣམས་ཀྱང་སྐད་ཅིག་གིས་རང་མདུན་དུ་འུབ་དིར་གྱིས་ལྷགས་པར་བསམ་ལ་དངོས་སུ་ཆོས་ཀྱི་འཁོར་ལོ་བསྐོར་བས་ཀུན་གྱིས་བཅུ་ལམ་ལྔ་ཐམས་ཅད་རྫོགས་ཤིང་སྤང་རྟོགས་ཀྱི་ཡེ་ཤེས་དང་ཡོན་ཏན་རྒྱས་པར་དམིགས་ཏེ། ན་མོ་ཚོགས་ཀྱི་ལམ་སོགས་ཞེས་པས་རྒྱལ་བའི་བཀའ་དང་བསྟུན་ནས་ཆོས་སྦྱིན་དང་། འབྲེལ་ཚད་རྣམ་པར་གྲོལ་བའི་སྨོན་ལམ་གྱི་རྒྱས་གདབ་པས་སྟོན་འཁོར་ཐམས་ཅད་འོད་ལྔའི་ཐིག་ལེ་ཆེན་པོ་གཅིག་ཏུ་གྱུར་ཏེ་ཆོས་ཉིད་ཀྱི་དབྱིངས་སུ་སྐུ་གསུམ་ལྷུན་གྲུབ་ཀྱི་རོལ་པར་བྱམས་ཀླས་པར་འཇོག་གོ །འདི་ཡི་གཞུང་དོན་གྱི་སྐོར་རྣམས་གསང་བའི་སྦས་དོན་བཀའ་རྒྱ་མ་ཡིན་པས་གདམས་པའི་ལས་སྐལ་དང་ལྡན་པ་མ་གཏོགས། དམ་ཉམས་ལ་བསྟན་ན་མ་མཁའ་འགྲོས་བཀའ་ཆད་དྲག་པོ་འབྱུང་ཉེ་བས། དེས་ཕྱིར་གསང་རྒྱ་དམ་པར་གྱིས་ཤིག། མཐར་ཆོས་སྦྱིན་གྱི་ཚོམས་ཏེ་གསུམ་པའི་བདག་ཉིད་ཅན་གྱིས་རྫོགས་སོ། །འདི་བྲིས་དགེ་བས་བདག་དང་འགྲོ་བ་ཀུན། གསང་ཆེན་མྱུར་ལམ་ཤིང་རྟ་འདིར་ཞོན་ནས། སྲིད་པའི་སྡུག་བསྔལ་ཆུ་གཏེར་ལས་བརྒལ་ཏེ། དབྱིངས་ཉིད་ཡངས་པའི་བྱང་ཆུབ་བརྙེས་པར་ཤོག །ཅེས་པ་འདི་ཉིད་སྔོན་ཆད་དགེ་བློ་བཟང་གིས་ནན་བསྐུལ་མང་དུ་བཏང་བས་འབྲི་བར་བརྩམས་ཀྱང་འབྲི་ཐབས་མི་འགྲིགས་པའི་བར་ལ་ཁོང་གཤེགས་སོ། །དེའི་རྗེས་དགེ་པདྨ་མཐའ་བྲལ་དང་། དགེ་བསོད་ནམས་ནོར་བུ་གཉིས་ཀྱིས་བཀྲ་ཤིས་རྫས་རིན་ཆེན་རིན་ཐང་དང་བྲལ་བའི་ལྷ་ཡི་གོས་པཉྩ་ལི་ཀའི་རྟེན་དང་བཅས་ཏེ་ནན་བསྐུལ་ཡང་ཡང་བཏང་བས། གནས་མཆོག་དཔལ་གྱི་བྲག་དམར་ནམ་མཁའ་ཁྱུང་རྫོང་གི་ཡང་དབེན་མཁའ་འགྲོའི་གསང་བའི་ཤེལ་ཕུག་ཏུ་བཙུན་ཆུང་ཨེ་ཏར་ཛས་སྨྲས་སོ། །སརྦ་མངྒ་ལཾ། །བཀྲ་ཤིས། ཤུ་བྷཾ། །ཛ་ཡནྟུ།། །།