སྦས་ཡུལ་ཡོལ་མོ་གངས་རིའི་གནས་སྲུང་གསོལ་མཆོད།
༄༅། །སྦས་ཡུལ་ཡོལ་མོ་གངས་རིའི་གནས་སྲུང་གསོལ་མཆོད།
ཧཱུྃ། དུས་གསུམ་ཀུན་མཁྱེན་འཆི་མེད་ཐོད་ཕྲེང་རྩལ། །
མ་རུངས་གདུག་པ་འདུལ་བར་གྲོ་བོ་ལོད། །
གང་གིས་བཀའ་དང་དམ་ལ་གཉེར་བཞག་པའི། །
སྦས་ཡུལ་གནས་སྲུང་ཞིང་སྐྱོང་དབང་མོ་ཆེ། །
བཛྲ་སཱ་དྷུ་ཆ་ཏི་ལྷ་བཙན་དང་། །
དགེ་བསྙེན་གླེ་རུ་ཇོ་མོ་གཡང་རི་སོགས། །
ལྷ་ཀླུ་གཞི་བདག་མ་ལུས་ཉེར་དགོངས་ལ། །
དམ་ལྡན་སྔགས་འཆང་བདག་ལ་དགྱེས་པའི་གྲོགས། །
བགྱིད་ཅིང་མི་མཐུན་གནོད་པའི་རྐྱེན་རྣམས་སྲུངས། །
འགལ་བའི་ཉེས་པ་བཟོད་གསོལ་བར་ཆད་སོལ། །
ཡུལ་ཁམས་བདེ་ཞིང་ཟབ་མོའི་ཆོས་འཕེལ་བ། །
ཇི་ལྟར་སྨོན་པའི་བཀྲ་ཤིས་སྩལ་དུ་གསོལ། །
ཞྭ་དམར་པ་དྲུག་པ་ཆོས་ཀྱི་དབང་ཕྱུག་གིས་མཛད་པའོ།། །།
