Sādhana of the Five Self-Arisen Noble Brothers—Tibetan

Avalokiteśvara | Sādhanas | Tibetan MastersShikpo Lingpa

English | བོད་ཡིག

Shikpo Lingpa

Ārya Vati Zangpo

Further Information:
Download this text:

༄༅། །འཕགས་པ་རང་བྱོན་མཆེད་ལྔའི་བསྒྲུབ་ཐབས་བསྐྱེད་རྫོགས་ཟུང་འབྲེལ་དུ་གདམས་པ་བཞུགས་སོ། །

 

ཨོཾ་མ་ཎི་པདྨེ་ཧཱུྂ།

སྦྲུལ་ལོ་ཆོ་འཕྲུལ་ཟླ་བ་ལ། །སྐྱེ་བདུན་བསྒྲུབ་ཆེན་བྱས་པའི་ཚེ། །ཚེས་པ་བཅོ་བརྒྱད་སྲོད་ཀྱིས་དུས། །རྨི་ལམ་འཁྲུལ་སྣང་འདི་ལྟར་བྱུང་། །དཀྱིལ་མཁར་མདོ་ནག་གསུམ་མདོ་རུ། །འཁྲུངས་པའི་གུ་རུ་ཁྱུང་གྲགས་དེ། །བདག་གི་མདུན་དུ་བྱོན་ནས་སུ། །ཚེ་གཅིག་ཐར་པ་བགྲོད་པའི་ཆོས། །འཕགས་པ་རིགས་ལྔའི་བསྐྱེད་རྫོགས་ཀྱིས། །ཉམས་ལེན་མཐིལ་ཕྱིན་འདི་ལྟར་བསྒོམ། །

འཁོར་བའི་ཆོས་ལས་ཡིད་འབྱུང་ཏེ། །དང་པོ་མི་རྟག་རྣལ་འབྱོར་སྒོམ། །དེ་ནས་སྐྱབས་འགྲོ་སེམས་བསྐྱེད་བྱ། །ཆོས་ཀུན་སྟོང་པའི་ངང་བསམས་ལ། །འགྲོ་བ་སེམས་ཅན་ཐམས་ཅད་ལ། །མ་ལྟར་བརྩེ་བའི་སྙིང་རྗེ་བསྒོམ། །

སྟོང་ཉིད་སྙིང་རྗེའི་ངང་ཅན་ལས། །

པད་ཟླའི་གདན་ལ་ཧྲཱིཿཡིག་དཀར། །

དེ་ལས་རང་ཉིད་སྤྱན་རས་གཟིགས། །

ཞལ་གཅིག་ཕྱག་བཞིའི་སྐུ་རུ་སྒོམ། །

སྤྱི་བོར་འཕགས་པ་འཇའ་མ་ལི། །

མདོག་མཐིང་པདྨ་གཡས་ན་སྣམས། །

གཡོན་པ་སྐྱབས་སྦྱིན་ཕྱག་རྒྱ་ཅན། །

མགྲིན་པར་འཕགས་པ་བ་ཏིའི་སྐུ། །

མདོག་དམར་པདྨ་སྐྱབས་སྦྱིན་ཅན། །

སྙིང་ཁར་འཕགས་པ་བུ་ཁམ་དེ། །

མདོག་སེར་སྐྱབས་སྦྱིན་པདྨ་འཛིན། །

ལྟེ་བར་འཇིག་རྟེན་དབང་ཕྱུག་སྐུ། །

མདོག་ལྗང་སྐྱབས་སྦྱིན་པདྨ་འཛིན། །

ཀུན་ཀྱང་ཕྱེད་དཀྱིལ་རོལ་པར་བཞུགས། །

རི་དགས་ལྤགས་པས་ནུ་མ་བཀག །

དར་དང་རིན་པོ་ཆེའི་རྒྱན། །

ཚངས་སྐུད་སེར་པོས་རབ་ཏུ་མཛེས། །

གཙོ་འཁོར་ཐམས་ཅད་འོད་ཟེར་གྱི། །

གུར་དུ་བཞུགས་པར་བསམ་པའི་ངང་། །

པོ་ཊ་ལ་ནས་ཡེ་ཤེས་པ། །

བཀུག་བསྟིམ་མཆོད་ཅིང་བསྟོད་པས་བསྟོད། །

རིགས་བདག་སངས་རྒྱས་དམར་པོ་མཆོག །

སྤྲུལ་པའི་སྐུ་ཡིས་དབུ་བརྒྱན་བསམ། །

ཐུགས་སྲོག་ཧྲཱིཿཡི་མཐའ་སྐོར་དུ། །

གཟུངས་སྔགས་འདི་ཉིད་འཁོར་བ་ལས། །

འོད་འཕྲོས་ནད་གདོན་སྡིག་སྒྲིབ་བསྲེགས། །

ཡར་འཕྲོས་སངས་རྒྱས་སྦྱངས་སེམས་མཆོད། །

འགྲོ་བ་སེམས་ཅན་ཐམས་ཅད་ཀྱི། །

སྡིག་སྒྲིབ་སྦྱངས་ཤིང་ཐམས་ཅད་ཀྱང་། །

འཕགས་པའི་སྐུ་རུ་གསལ་བར་བསྒོམ། །

གཟུངས་སྔགས་འདི་ཉིད་གྲངས་མེད་བཟླ། །

ཨོཾ་ཨཱརྻ་བ་ཏི་མ་ཎི་འཇའ་མ་ལི་པདྨེ་བྷུ་ཁམ་ལོ་ཀེ་ཤྭ་ར་ཧཱུྂ། ཤཱནྟཾ། པུཥྚིཾ། ཝ་ཤཾ། ཀ་རྨཱ་སིདྡྷི་ཕ་ལ་ཧཱུྂ། །

ཅེས་བཟླས་མཆོད་བསྟོད་བརྒྱས་པར་བྱ། །དེ་ལྟར་འཕགས་པའི་ལྷ་ཚོགས་རྣམས་རང་སེམས་ལས་བྱུང་ཆོས་ཀྱི་སྐུ། བདག་གཞན་བརྗེ་ཕོད་བྱང་ཆུབ་སེམས། །རྒྱུན་དུ་བསྒོམ་ཞིང་གཟུངས་སྔགས་བཟླ། །སྟོང་ཉིད་ངང་བཞག་སྤྲོས་བྲལ་དུ། །མཉམ་པར་བཞག་ཅིང་ཕར་ཕྱིན་དྲུག །དོན་ལ་ལྟ་ཞིང་ཉམས་སུ་བླངས། །འདི་ལྟར་བགྱིས་པས་འཕགས་པའི་སྐུ། །དབྱེར་མེད་ཐོབ་ནས་རིགས་དྲུག་གིས། །འཁོར་བ་དོང་སྤྲུགས་ས་ཐོབ་འགྱུར། །རྗེས་སྤྱོད་འགྲོར་བསྔོ་སྨོན་ལ་གདབ། །

འཕགས་པ་རང་བྱོན་མཆེད་ལྔ་ཡིས། །ལུས་དཀྱིལ་བསྐྱེད་རྫོགས་ལག་བཅངས་འདི། །པདྨའི་ཐུགས་སྤྲུལ་གུ་རུ་མཆོག །ཡེ་ཤེས་ཁྱུང་གྲགས་ཞལ་ཉིད་ནས། །རྨི་ལམ་དག་ཏུ་བྱུང་བ་དེ། །གར་གྱི་དབང་ཕྱུག་རྩལ་གྱིས་བཀོད། །དགེ་འདིས་སངས་རྒྱས་མྱུར་ཐོབ་ཤོག །མངྒ་ལཾ།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK