Perfectly Clear Mirror—Tibetan

Deities › Vajrakīla | Literary Genres › Termas | Tibetan Mastersགཏེར་སྟོན་བསོད་རྒྱལ།

English | བོད་ཡིག

གཏེར་སྟོན་བསོད་རྒྱལ།

Razor of the Innermost Essence

Further Information:
Download this text:

༃ ཕུར་པ་ཡང་སྙིང་སྤུ་གྲི་ལས༔ ཐེམས་ཡིག་རབ་གསལ་མེ་ལོང་བཞུགས༔

ན་མོ་གུ་རུ་བེ༔ འདི་ལ་ཆོས་ཀྱི་རྣམ་གྲངས་དང་གཅིག༔ འདོན་པའི་དུས་དང་གཉིས༔ གདམས་ངག་དང་གསུམ༔ མཚོ་རྒྱལ་བདག་གིས་སྦས་པའི་ལོ་རྒྱུས་དང་བཞིའོ༔ ས་མ་ཡ༔ དང་པོ་ཆོས་ཀྱི་རྣམ་གྲངས་ནི༔ བཀའ་དབང་ཟབ་མོ༔ དཀྱིལ་འཁོར་གྱི་ཆོ་ག༔ བྱིན་འབེབས༔ དམ་ཚིག༔ ལྟ་བའི་ཁྲིད༔ མངོན་རྟོགས༔ སྒྲུབ་ཁོག༔ བསྟོད་པ༔ ཚོགས་ཀྱི་ཆོ་ག༔ སྐོང་བཤགས༔ བསྐུལ་བ༔ གདབ་ཁ༔ གཏོར་བཟློག༔ ཟོར་ལས༔ མེ་མཆོད་གཉིས༔ ཕུར་སྲུང༔ སྲོག་དབང་༔ ཐེམས་ཡིག་འདི་དང་བཅུ་དགུ༔ ཁ་བྱང་ཉི་ཟླ་ཁ་སྤྲོད་དང་ཉི་ཤུའོ༔ ཐེམས་མེད་ནི༔ རྟེན་འབྲེལ་བཅོས་ཐབས་ལ་སོགས་པའོ༔ ས་མ་ཡ༔ གཉིས་པ་གཏེར་འདི་འདོན་པའི་དུས་ནི༔ སྤྱིར་གསང་སྔགས་གཟུགས་བརྙན་འཆོལ་པོར་སྤྱོད༔ བཙུན་པས་དམག་ལས་བྱེད༔ མཐའ་མི་དབུས་སུ་འབྱུང་ཉེ༔ མི་ནད་ནོར་ནད་དར་དུས་འཁྲུགས་སྣ་ཚོགས་དར༔ ནམ་ཟླ་དུས་ཚོགས་ཐམས་ཅད་ལོག༔ འབྲུ་བཅུད་མི་སྨིན༔ བླ་སློབ་ཡོན་མཆོད་རྒྱལ་བློན་ཕ་བུ་སོགས་ཉེ་འབྲེལ་ཁྱིམ་མཚེས་ཡུལ་མི་དང་བཅས་ཏེ་ཕན་ཚུན་གཅིག་གིས་གཅིག་བསླུ་བས་སུ་ལའང་ཡིད་ཆེས་པའི་གོ་སྐབས་བྲལ༔ ཆོས་བྱེད་ཉུང་ཞིང་དབུ་འཕང་དམའ༔ སྡིག་བྱེད་ཤིན་ཏུ་མང་ཞིང་མགོ་འཕང་མཐོ༔ ཐམས་ཅད་མི་བདེ་བའི་ཚེ་ན་འདོན་པའི་དུས་སོ༔ ཁྱད་པར་ལྕགས་ཕོ་འབྲུག་དང་ཤིང་མོ་ལུག་གི་ལོ་གཉིས་གང་རུང་གི་སྟོན་ཟླ་འབྲིང་པོའི་ཡར་གྱི་ཚེས་བཅུའམ་བཅོ་ལྔ་གང་རུང་གི་ཚེ་ན་དུས་གནད་ཁྱད་པར་ཅན་ཡིན་ཏེ༔ ཁ་བྱང་ཉི་ཟླ་ཁ་སྤྲོད་ལྟར་ཤེས་པར་བྱའོ༔ ས་མ་ཡ༔ གསུམ་པ་གདམས་ངག་བཤད་པ་ནི༔ ཟབ་གཏེར་འདི་རྙེད་པའི་གཏེར་སྟོན་རྣམས་ཀྱིས་མ་ཧཱ་གུ་རུའི་བཀའ་གསང་ཟབ་ཆོས་འདི་ལ་རང་བཟོ་དང་བཅོས་བསླད་མ་བྱེད༔ ཐོག་མར་ཁོ་ནར་རང་གིས་ཚུལ་བཞིན་བསྒྲུབས་པ་དང་༔ དེ་ནས་སྐལ་ལྡན་ཆོས་ཀྱི་བདག་པོ་སོགས་སྤེལ་བའི་ལག་ལེན་ཐམས་ཅད་ཁ་བྱང་ཉི་ཟླ་ཁ་སྤྲོད་ལྟར་མ་ནོར་བར་བྱ༔ གཞན་ཡང་ཡེར་པ༔ ཤེལ་བྲག༔ མཆིམས་ཕུ་རྣམས་སུ་གཏེར་སྟོན་རང་གིས་ཐ་ནའང་ཞག་བདུན་ཕྲག་གསུམ་རེ་ལས་མི་ཉུང་བར་ཚུལ་བཞིན་ཏུ་སྒྲུབ༔ དེ་ནས་མོས་ལྡན་ཀུན་ལ་སྤེལ་བ་དང་༔ སྒྲུབ་རྒྱུན་འཛུག་པའི་ལག་ལེན་རྣམས་ཀྱང་ཁ་བྱང་ཉི་ཟླ་ཁ་སྤྲོད་ལྟར་བྱ༔ རང་གི་རྒྱུན་དུ་ཉམས་ལེན་ཚུལ་བཞིན་བརྩོན༔ གྲུབ་པའི་རྟགས་དང་མཚན་མ་ཐམས་ཅད་ནང་འདྲེས་པའི་མཆེད་ལའང་མི་སྨྲ༔ ཆོས་འདི་ངོམ་མ་སྔ༔ མི་ངོ་དང་ཟས་ནོར་གྱི་ཕྱིར་དུ་སྲོག་ལ་བབས་ཀྱང་མ་བཙོང་། འདིའི་ལྟ་ཁྲིད་དང་མངོན་རྟོགས་གཉིས་དམ་པར་བྱ༔ གཞན་རྣམས་དད་ལྡན་ལ་རིམ་བཞིན་སྤེལ༔ བོད་ཁམས་རྒྱལ་བསྟན་དང་ཆོས་འཁོར་གཉན་པོ་འཇིག་པའི་འཚེ་བ་བྱུང་ན་དེའི་དུས་སུ་བཻ་རོའི་སྤྲུལ་པ་སོགས་ཐེམས་མེད་དུ་གསལ་བའི་སྔགས་འཆང་རྣམས་ཀྱིས་ཆོས་འདིའི་སྒོ་ནས་བཟློག་པར་བྱ་ཡི༔ དོག་ལ་ཆུང་ངུའི་ཕྱིར་དང་༔ གང་ཟག་གང་རུང་གིས་འཆོལ་པོར་བྱ་བ་ནི་མ་ཡིན་ནོ༔ སྒྲུབ་སྤེལ་ལ་སོགས་ཏེ་འདི་དང་འབྲེལ་བའི་དགེ་བ་གང་བརྩོན་ཐམས་ཅད་གསང་སྔགས་ཀྱི་བསྟན་པ་དར་བ་དང་༔ བྱང་ཆུབ་མཆོག་གི་རྒྱུར་ཡོངས་སུ་བསྔོ་བར་བྱའོ༔ ས་མ་ཡ༔ བཞི་པ་བདག་མཚོ་རྒྱལ་གྱིས་གཏེར་འདི་ཇི་ལྟར་སྦས་པའི་ལོ་རྒྱུས་ནི༔ བློ་དམན་བདག་གིས་གུ་རུའི་ཟབ་ཆོས་ཕུར་པའི་ཆོས་སྡེ་འདྲ་མིན་དྲུག་ཅུ་རྩ་ལྔ་དང་༔ ཐུགས་གཏེར་རྨད་དུ་བྱུང་བ་སུམ་ཅུ་རྩ་དྲུག་སྟེ་བརྒྱ་དང་གཅིག་སྟེ་བོད་ཁམས་གཉིས་སུ་སྦས༔ འདིའང་ཐུགས་གཏེར་ཤིན་ཏུ་ཟབ་པ་ཡིན༔ གཏེར་དཔེ་དང་ཁ་བྱང་ཡང་གཅིག་ཁོ་ན་ལས་མེད་པས་གཏེར་དཔེ་ཤིན་ཏུ་དམ་པར་བྱ༔ འདིའི་རྩ་རླུང་གི་ཆོས་སྡེ་ནི་གཡུ་ཁོག་ཞེས་པའི་གནས་སུ་བྲག་དཀར་སེང་གེ་འདྲ་བ་ལ་མན་ངག་གཏེར་འབྱིན་ལྡེའུ་མིག་དང་ལྷན་ཅིག་ཏུ་གཏེར་སྲུང་མཆོད་ཐབས་ཤོག་དྲིལ་དང་༔ གནུབས་ཆེན༔ དཔལ་དབང་༔ དཔལ་སེང་༔ ཤུད་བུ༔ བདུད་འཇོམས་བཅས་ཀྱིས་བསྒྲུབས་པའི་ཚེ་རིལ་བརྒྱ་དང་བཅུ་གསུམ་རྣམས་འདིའི་གཡས་ཕྱོགས་བྲག་དཔལ་བཤོས་འདྲ་བ་ལ་ཡོད༔ འདི་ཉིད་འདོན་པར་འདོད་ན་མཚམས་བཞི་ལོ་པའི་གྲོགས་མཚན་ལྡན་དང་བཅས་ཤིན་ཏུ་གསང་ཐབས་ཀྱིས་ཐོན་ཅིག༔ གཏེར་གྱི་ཡན་ལག་གཞན་ནི་མེད་དོ༔ ཉི་ཟླ་ཁ་སྤྲོད་དང་ཐེམས་མེད་རྣསས་ནི་འཕྲུལ་གཏེར་ཁོ་ནའོ༔ ས་མ་ཡ༔ རྡོ་རྗེ་ཕུར་པ་ཡང་སྙིང་སྤུ་གྲིའི་ཐེམས་ཡིག་རབ་གསལ་མེ་ལོང་ཞེས་བྱ་བ་འདི་འང་ཨོ་རྒྱན་གུ་རུའི་བཀའ་བཞིན་བློ་དམན་མཚོ་རྒྱལ་བདག་གིས་བྲིས་ཏེ་ཕྱི་རབས་དོན་ཕྱིར་གཏེར་དུ་སྦས༔ སྐལ་ལྡན་ལས་འཕྲོ་ཅན་དང་འདི་འཕྲད་ཤོག གུ་ཧྱ༔ སྤྲུལ་པའི་གཏེར་ཆེན་པདྨ་གར་དབང་ཕྲིན་ལས་འགྲོ་འདུལ་རྩལ་ལ་གཏེར་སྲུང་གིས་དངོས་སུ་ཕུལ་བའི་ཤོག་སེར་ལས་གཏེར་མིང་ལས་རབ་གླིང་པས་དག་པར་ཕབ་པའི་ཡི་གེ་པ་ནི་བློ་གསལ་གསང་སྔགས་བསྟན་འཛིན་གྱིས་བགྱིས་པ་དགེ་ལེགས་འཕེལ། །།

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK