གཡུང་སྟོན་པས་གསུངས་པའི་ཕྱག་འཚལ།

༄༅། །གཡུང་སྟོན་པས་གསུངས་པའི་ཕྱག་འཚལ་བཞུགས་སོ། །

ཨེ་མ་ཧོ། །
རྒྱལ་བ་སྐུ་གསུམ་སར་གནས་རིག་འཛིན་དང༌། །
ངོ་མཚར་རྨད་བྱུང་ཨོ་རྒྱན་ཡབ་ཡུམ་གཉིས། །
ལུང་བསྟན་གཏེར་སྟོན་ཐུགས་སྲས་སྤྲུལ་པའི་སྐུ། །
མཚུངས་མེད་ཆོས་ཀྱི་རྒྱལ་པོ་ཀརྨ་པ། །
ཆོས་རྗེའི་ཐུགས་སྲས་མཉམ་མེད་བྱ་བྲལ་བ། །
བརྒྱུད་པའི་བཅུད་འདུས་མཁྱེན་ལྡན་ཤཱཀྱ་མགོན། །
རྩ་བརྒྱུད་བླ་མ་རྣམས་ལ་ཕྱག་འཚལ་ལོ། །

ཐོག་མེད་དུས་ནས་འཁོར་བའི་རྒྱུན་གྲོལ་དུ། །
ལས་རླུང་ཤུགས་ཀྱིས་དུས་མཐར་སྐྱེས་པ་ཡི། །
དབུལ་རྨོངས་གླེན་སྟོང་བློ་ཆུང་ཀུ་སུ་ལུ། །
བས་མཐའི་གནས་ན་ཡིད་བྲེལ་སྙམ་ཆུང་བ། །
རིག་པ་ཅོལ་ཆུང་རྐང་འཁྱམས་སྤྲང་པོ་བདག །
བླ་མ་ཡི་དམ་མཁའ་འགྲོའི་ཐུགས་རྗེ་ཡིས། །
དམ་པས་རྗེས་སུ་བཟུང་ཞིང་རྒྱུད་བཀྲོལ་ནས། །

རྒྱལ་བ་ཀུན་གྱི་དགོངས་པའི་མཐར་ཐུག་ཉིད། །
ཐེག་པའི་ཡང་རྩེ་རྫོགས་ཆེན་སྙིང་པོ་འདི། །
གྲུབ་ཐོབ་རིམ་པར་བརྒྱུད་ནས་བདག་ལ་སྨིན། །
ཟབ་ལམ་འདི་དང་མཇལ་བ་བདག་སྐལ་བཟང༌། །

ཨོ་རྒྱན་ཐུགས་རྗེས་མ་འོངས་འགྲོ་དོན་དུ། །
མཁའ་འགྲོ་སྙིང་ཏིག་ཟབ་མོ་གཏེར་དུ་སྦས། །
ལུང་བསྟན་སྤྲུལ་སྐུ་མཁས་བཙུན་ཚུལ་རྡོར་གྱིས། །
ཆུ་མོ་གླང་ལ་ཟབ་མོའི་གཏེར་སྒོ་ཕྱེས། །

དེ་ནས་སོ་བདུན་ལོན་པའི་ས་མོ་གླང་གི་ལོ། །
ལོ་གསར་རྟ་པ་ཉ་ཡི་གྲུབ་ཉི་ཚེས་གསུམ་ལ། །
སྤྲོས་བཅས་སྤྲོས་མེད་ཁྱད་པར་དབང་ལྔ་རིག་པའི་རྩལ་དབང་དང༌། །
བཏགས་གྲོལ་རྒྱུད་འགྲེལ་མན་ངག་ལག་ལེན་བཅས། །
དོན་ཁྲིད་ཁྲེགས་ཆོད་ཐོད་རྒལ་ངོ་སྤྲོད་གནང༌། །
རྒྱབ་ཆོས་ལུང་བསྟན་མན་ངག་གནད་དང་བཅས། །
རྩ་རླུང་ཐིག་ལེ་གཏུམ་མོ་དཀའ་ཐུབ་དང༌། །
འདའ་ཁའི་ལམ་ཁྱེར་འཆི་བྲོད་བར་དོའི་གནད། །
དབང་སྒྲུབ་མཆོད་གཞུང་ལས་བྱང་སྒོམ་ཁྲིད་དང༌། །
ཐུན་མོང་ལས་མདེའུ་ཁ་ཚར་བསྟན་སྲུང་དང༌། །
ཡིད་ཆེས་ལོ་རྒྱུས་འཕྱུགས་མེད་ཐེམ་ཡིག་བཅས། །
དབང་རྫོགས་བཀའ་རྫོགས་དཔེ་རྫོགས་ལུང་རྫོགས་སུ། །
ཡོངས་རྫོགས་བཀའ་གཏད་གནང་བ་དེ་སྐུ་དྲིན། །

སྣོད་ལྡན་སྣོད་མེད་ཀུན་ལ་གནང་བཀག་མཛད། །
བཀའ་གཏད་གཉེར་གཏད་ཐོབ་པ་བདག་སྐལ་བཟང༌། །

ཆོ་འཕྲུལ་རྟ་པའི་ཚེས་གསུམ་ནས་བརྩམས་ཏེ། །
དབྱར་ར་ས་གས་ཉ་བའི་ཟླ་རྒྱས་པར། །
དགུང་ཟླ་ཕྱེད་དང་བཞི་ལ་དོན་ཆེན་འགྲུབ། །
སོམ་ཉི་མེད་པའི་གདིང་རྙེད་དེ་སྐུ་དྲིན། །

རྟོགས་པའི་ངང་དུ་གོམས་པའི་སྟོབས་བརྟན་ནས། །
རིག་པ་རང་གྲོལ་ཕྱོགས་ལྷུང་མེད་པ་ཡི། །
མཐའ་བྲལ་རྩོལ་མེད་ལྷུན་གྲུབ་གནས་ལུགས་གཤིས། །
སྙིང་པོ་རྣམ་དག་མངོན་དུ་འགྱུར་བར་ཤོག །། །།