The Heart of Dependent Origination—Tibetan

༄༅། །རྒྱ་གར་སྐད་དུ། པྲ་ཏི་ཏྱ་ས་མུ་ཏཔ་ད་ཧྲི་ད་ཡ་ཀཱ་རི་ཀཱ། །
བོད་སྐད་དུ། རྟེན་ཅིང་འབྲེལ་པར་འབྱུང་བའི་སྙིང་པོའི་ཚིག་ལེའུར་བྱས་པ།

འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །

ཡན་ལག་བྱེ་བྲག་བཅུ་གཉིས་གང། །
ཐུབ་པས་རྟེན་འབྱུང་གསུངས་དེ་དག །
ཉོན་མོངས་ལས་དང་སྡུག་བསྔལ་དང། །
གསུམ་པོ་དག་ཏུ་ཟད་པར་འདུས། །

དང་པོ་བརྒྱད་དང་དགུ་ཉོན་མོངས། །
གཉིས་དང་བཅུ་པ་ལས་ཡིན་ཏེ། །
ལྷག་མ་བདུན་ཡང་སྡུག་བསྔལ་ཡིན། །
བཅུ་གཉིས་ཆོས་ནི་གསུམ་དུ་འདུས། །

གསུམ་པོ་དག་ལས་གཉིས་འབྱུང་སྟེ། །
གཉིས་ལས་བདུན་འབྱུང་བདུན་ལས་ཀྱང། །
གསུམ་འབྱུང་སྲིད་པའི་འཁོར་ལོ་དེ། །
ཉིད་ནི་ཡང་དང་ཡང་དུ་འཁོར། །

འགྲོ་ཀུན་རྒྱུ་དང་འབྲས་བུ་སྟེ། །
འདི་ལ་སེམས་ཅན་ཅི་ཡང་མེད། །
སྟོང་པ་ཁོ་ནའི་ཆོས་རྣམས་ལས། །
སྟོང་པའི་ཆོས་རྣམས་འབྱུང་བ་ཟད། །

བདག་དང་བདག་གི་མེད་པའི་ཆོས། །
ཁ་ཐོན་མར་མེ་མེ་ལོང་རྒྱ། །
མེ་ཤེལ་ས་བོན་སྐྱུར་དང་སྒྲས། །
ཕུང་པོ་ཉིང་མཚམས་སྦྱོར་བ་ཡང། །
མི་འཕོ་བར་ཡང་མཁས་རྟོགས་བྱ། །

ཤིན་ཏུ་ཕྲ་བའི་དངོས་ལ་ཡང། །
གང་གིས་ཆད་པར་རྣམ་བརྟགས་པ༏ །
རྣམ་པར་མི་མཁས་དེ་ཡིས་ནི། །
རྐྱེན་ལས་བྱུང་བའི་དོན་མ་མཐོང། །

འདི་ལ་གསལ་བྱ་གང་ཡང་མེད། །
གཞག་པར་བྱ་བ་ཅི་ཡང་མེད། །
ཡང་དག་ཉིད་ལ་ཡང་དག་བལྟ། །
ཡང་དག་མཐོང་ན་རྣམ་པར་གྲོལ། །

རྟེན་ཅིང་འབྲེལ་པར་འབྱུང་བའི་སྙིང་པོའི་ཚིག་ལེའུར་བྱས་པ། །
སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ། །