Light from the Wisdom Sun—Tibetan

Sādhanas | Mañjuśrī | Tibetan MastersAlak Zenkar Rinpoche

English | བོད་ཡིག

Alak Zenkar Rinpoche

Mañjuśrī

Further Information:
Download this text:

༄༅། །ལྷག་པའི་ལྷ་མཆོག་རྗེ་བཙུན་འཇམ་དཔལ་དབྱངས་ཀྱི་སྒྲུབ་ཐབས་ཤེས་རབ་ཉིན་བྱེད་སྣང་བ་ཞེས་བྱ་བ་བཞུགས།

 

རབ་འབྱམས་རྒྱལ་བའི་ཡེ་ཤེས་གཅིག་བསྡུས་གར། །
མི་ཟད་རྒྱན་གྱི་འཁོར་ལོ་སྣང་བའི་མཛོད། །
ས་གསུམ་བླ་མ་འགྲོ་བའི་གཉེན་གཅིག་མཆོག །
གང་དང་དབྱེར་མེད་འཇམ་དཔལ་དབྱངས་ལ་འདུད། །

དེ་ལ་འདིར་རྗེ་བཙུན་འཇམ་དཔལ་དབྱངས་ཀྱི་སྒྲུབ་ཐབས་མདོར་བསྡུས་ཤིག་འབྲི་བ་ལ། སྦྱོར་དངོས་རྗེས་གསུམ་ལས།

དང་པོ་ལའང་གཉིས་ཏེ། སྐྱབས་འགྲོ་སེམས་བསྐྱེད་དང་། ཡན་ལག་བདུན་པའོ།

དང་པོ་ནི།

ན་མོ་སངས་རྒྱས་ཆོས་ཚོགས་ཀུན་འདུས་པའི། །

འཇམ་དཔལ་དབྱངས་ལ་སྐྱབས་སུ་མཆི། །

འགྲོ་རྣམས་བྱང་ཆུབ་ཐོབ་ཕྱིར་དུ། །

འཇམ་དཔལ་བསྒྲུབ་ལ་བརྩོན་པར་བགྱི། །

གཉིས་པ་ཡན་ལག་བདུན་པ་ནི།

དངོས་བཤམས་ཡིད་སྤྲུལ་མཆོད་པའི་ཚོགས། །

མི་ཟད་མཛོད་ཀྱི་འཁོར་ལོར་འབུལ། །

ཞིང་གི་རྡུལ་སྙེད་ལུས་སྤྲུལ་ནས། །

སྒོ་གསུམ་གུས་པས་ཕྱག་འཚལ་ལོ། །

བཅས་རང་ཁ་ན་མ་ཐོ་ཀུན། །

གནོང་ཞིང་འགྱོད་པའི་སེམས་ཀྱིས་བཤགས། །

དམིགས་མེད་ཡེ་ཤེས་དམ་པ་དང་། །

བསོད་ནམས་དགེ་ལ་ཡི་རང་ངོ་། །

རིགས་ཅན་རྣམས་ལ་གང་འཚམས་པར། །

ཆོས་ཀྱི་འཁོར་ལོ་བསྐོར་བར་བསྐུལ། །

དམ་པ་མྱ་ངན་འདའ་བཞེད་རྣམས། །

ཇི་སྲིད་བར་དུ་བཞུགས་སུ་གསོལ། །

འདིས་མཚོན་དགེ་ཚོགས་ཇི་བསགས་པ། །

བླ་མེད་བྱང་ཆུབ་ཐོབ་ཕྱིར་བསྔོ། །

གཉིས་པ་དངོས་གཞིའི་རིམ་པ་ནི།

རང་མདུན་ནམ་མཁར་འཇའ་འོད་ཀློང་། །

པད་ཟླའི་གདན་ལ་སྐད་ཅིག་གིས། །

འཕགས་མཆོག་རྗེ་བཙུན་འཇམ་དཔལ་དབྱངས། །

ཞལ་གཅིག་ཕྱག་གཉིས་འཛུམ་ཞལ་ཅན། །

ཕྱག་གཡས་རལ་གྲི་གཡོན་པདྨ། །

ཞབས་གཉིས་སྐྱིལ་ཀྲུང་ལོངས་སྤྱོད་རྫོགས། །

དར་དང་རིན་ཆེན་རྒྱན་གྱིས་སྤྲས། །

སྟོང་གསལ་འོད་ཀྱི་དཀྱིལ་འཁོར་ཅན། །

སངས་རྒྱས་བྱང་སེམས་གྲུབ་པའི་ཚོགས། །

རྣམས་ཀྱིས་ཡོངས་སུ་བསྐོར་བར་བསམ། །

ཐུགས་དབུས་ཟླ་སྟེང་དྷཱིཿཡིག་ལས། །

འོད་འཕྲོས་བདག་ལ་ཐིམ་པ་ཡིས། །

མཆོག་ཐུན་དངོས་གྲུབ་ཀུན་ཐོབ་ནས། །

སྒྲིབ་གཉིས་མུན་པ་ཀུན་སེལ་ཞིང་། །

ཤེས་བྱའི་གནས་རྣམས་མཁྱེན་པ་ཡི། །

སྤོབས་པའི་གཏེར་བརྒྱད་གྲོལ་བ་དང་། །

དོན་གཉིས་ལྷུན་གྱིས་གྲུབ་པར་ཤོག །

ཨོཾ་ཨཿ་ར་པ་ཙ་ན་དྷཱིཿ ཞེས་བཟླས་མཐར། 

གསུམ་པ་རྗེས་ཀྱི་རིམ་པ་ལ་བཞི་སྟེ།

དང་པོ་མཆོད་བསྟོད་བྱ་བ་ནི།

སྣང་ཞིང་སྲིད་པའི་ཆོས་རྣམས་ཀུན། །

ཏིང་འཛིན་མཆོད་སྤྲིན་རྒྱ་མཚོ་ཡིས། །

བཀང་སྟེ་རྗེ་བཙུན་འཇམ་དབྱངས་ལ། །

མཆོད་པས་བསོད་ནམས་ཚོགས་རྫོགས་ཤོག །

ཨོཾ་བཛྲ་ཨརྒྷཾ་པཱདྱཾ་པུཥྤེ་དྷཱུཔེ་ཨཱ་ལོ་ཀེ་གནྡྷེ་ནཻ་ཝ་དྱ་ཤཔྟ་པྲ་ཏཱི་ཙྪ་སྭཱ་ཧཱ།

སྲས་བཅས་རྒྱལ་བ་ཐམས་ཅད་ཀྱི། །

ཕྲིན་ལས་གཅིག་བསྡུས་འགྲོ་བའི་མགོན། །

རྗེ་བཙུན་འཇམ་དཔལ་དཔའ་བོ་ལ། །

མཆོག་ཏུ་དད་པས་ཕྱག་འཚལ་བསྟོད། །

གཉིས་པ་གསོལ་གདབ་བྱ་བ་ནི།

དེང་ནས་ཚེ་རབས་ཐམས་ཅད་དུ། །

རྗེ་བཙུན་ཁྱེད་ཀྱིས་རྗེས་བཟུང་ནས། །

འཆད་རྩོད་རྩོམ་ལ་ཐོག་མེད་པའི། །

སྨྲ་བའི་དབང་ཕྱུག་ཤེས་རབ་སྩོལ། །

གསུམ་པ་བསྡུ་རིམ་ནི།

གཟོད་ནས་རྟེན་འབྱུང་སྣང་བརྙན་དུ། །

ཤར་བའི་ཡེ་ཤེས་སྒྱུ་མའི་སྐུ། །

སྤྲོས་བྲལ་འཇམ་དབྱངས་ཁྱེད་ཉིད་ནི། །

མ་བཅོས་དེ་བཞིན་ཀློང་དུ་ཐིམ། །

བཞི་པ་དགེ་བ་བསྔོ་བ་ནི།

འདི་བསྒྲུབས་པ་ལས་བྱུང་བ་ཡི། །

དགེ་རྩ་ཇི་སྙེད་མཆིས་པ་ཀུན། །

འགྲོ་རྣམས་འཇམ་དཔལ་དཔའ་བོ་ཡི། །

གོ་འཕང་མཆོག་ལ་འགོད་ཕྱིར་བསྔོ། །

རྨད་བྱུང་ཤེས་རབ་གསུམ་གྱི་གྲུ་བོ་ཆེར། །

འགྲོ་ཀུན་ཞུགས་ཤིང་སྨོན་ལམ་གསེར་དབྱུག་གུས། །

བསྐུལ་ནས་སྲིད་པའི་རྒྱ་མཚོ་ལས་བརྒལ་ཞིང། །

གདོད་མའི་རྒྱལ་སྲིད་ཟིན་པའི་རྒྱུར་གྱུར་ཅིག །

 

ཅེས་འཇམ་དཔལ་སྒྲུབ་ཐབས་ཤེས་རབ་ཉིན་བྱེད་སྣང་བ་འདི་ཉིད་སྔ་སོར་ནས་འབྲི་འདུན་ཡོད་ཀྱང་ཕྱིས་སུ་བདེ་ཆེན་དྲི་མེད་ཀྱིས་བསྐུལ་ངོར་ཐུབ་བསྟན་ལུང་རིགས་སྨྲ་བའི་ཉི་མས་བྲིས་པ་འདིས། འགྲོ་ཀུན་འཇམ་དཔལ་དཔའ་བོའི་གོ་འཕང་ལ་འགོད་པའི་རྒྱུར་གྱུར་ཅིག །

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK