ཀློང་སྙིང་དབང་བསྐུར་ཕྲེང་བ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན་ལས་རིག་འཛིན་འདུས་པའི་དབང་ཡིག
༄༅། །རྫོགས་པ་ཆེན་པོ་ཀློང་ཆེན་སྙིང་ཐིག་ལེའི་རྩ་གསུམ་སྤྱི་དང་བྱེ་བྲག་གི་དབང་བསྐུར་གྱི་ཕྲེང་བ་བཀླག་ཆོག་ཏུ་བཀོད་པ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན།
༈ བླ་མ་རིག་འཛིན་འདུས་པའི་དབང་བསྐུར་རྒྱས་པར་སྤྲོས་པའི་ལེའུ་ཚན་གཉིས་པ།
ཧོཿ བདག་ནི་སྐལ་ལྡན་རིགས་ཀྱི་བུ༔
ཐུགས་རྗེ་ཆེན་པོས་རྗེས་བཟུང་ལ༔
དམ་ཚིག་ཆེན་པོའི་དཀྱིལ་འཁོར་དུ༔
འཇུག་ཅིང་སྨིན་པར་མཛད་དུ་གསོལ༔
ན་མོ༔ བདག་དང་མཐའ་ཡས་སེམས་ཅན་ཀུན༔
མཆོག་གསུམ་ངོ་བོ་བླ་མ་དང་༔
རིག་འཛིན་རྒྱ་མཚོའི་དཀྱིལ་འཁོར་ལ༔
སྙིང་ནས་དད་པས་སྐྱབས་སུ་མཆི༔
ཧོཿ རིག་འཛིན་དཀྱིལ་འཁོར་འདིར་ཞུགས་ནས༔
ཕ་མ་འགྲོ་དྲུག་སེམས་ཅན་ཀུན༔
ཚད་མེད་སྙིང་རྗེས་སྒྲོལ་བའི་ཕྱིར༔
སྨོན་འཇུག་དོན་དམ་བྱང་སེམས་བསྐྱེད༔
ཧོཿ ཆུ་ལས་ཆུ་བུར་ཇི་བཞིན་དུ༔
ཡེ་ཤེས་དབྱིངས་ལས་སྤྲུལ་པའི་ལྷར༔
མངོན་སུམ་རིག་པས་ཕྱག་འཚལ་ལོ༔
ཉམས་སྣང་གོང་འཕེལ་མཆོད་པར་འབུལ༔
རིག་པ་ཚད་ཕེབས་ངང་དུ་བཤགས༔
ཆོས་ཉིད་ཟད་ལ་རྗེས་ཡི་རང་༔
འཕོ་ཆེན་ཀློང་ནས་ཆོས་འཁོར་བསྐོར༔
འཇའ་ལུས་ཆེན་པོར་བཞུགས་གསོལ་འདེབས༔
དགེ་ཚོགས་གཞོན་ནུ་བུམ་སྐུར་བསྔོ༔
བླ་མ་རིག་འཛིན་སྐྱབས་ཀྱི་མཆོག་ཏུ་འཛིན། །
འགྲོ་བའི་དོན་དུ་སྨོན་འཇུག་སེམས་བསྐྱེད་ཅིང༌། །
སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི། །
དམ་ཚིག་སྡོམ་པ་རྟག་ཏུ་སྲུང་བར་བགྱི། །
ཀྱཻ། རིགས་ལྔ་བདེ་བར་གཤེགས་པ་དང༌། །
བླ་མ་ཡི་དམ་མཁའ་འགྲོ་དགོངས། །
སྒོ་བ་ཆེན་པོ་ཁྱེད་རྣམས་ཀྱིས། །
སྒོ་ཕྱེ་ཐར་པའི་གྲོང་བསྟན་འཚལ།
ཨོཾ་ན་མ་ཏེ་ཧཱུྃ།
ཨོཾ་ན་མ་མེ་ཧཱུྃ།
ཨོཾ་ན་མོ་ན་མ་ཧཱུྃ།
ཀྱཻ། རིག་འཛིན་འདུས་པའི་དཀྱིལ་འཁོར་དུ། །
འབྲེལ་བའི་མེ་ཏོག་འདི་དོར་བས། །
ལས་འཕྲོ་གང་ཡོད་ལྷ་ལ་དབབ་པར་ཤོག །
ཨོཾ་པུཥྤེ་སིདྡྷི་ཧཱུྃ།
ནམ་མཁའ་རྡོ་རྗེས་རྒྱལ་བ་ལྔར། །
དགོངས་ཤིང་ཇི་ལྟར་དབང་བསྐུར་ལྟར། །
མཆོད་པ་ཆེན་པོ་བརྡ་ཡི་དབང་། །
རིག་པ་འཛིན་པ་བདག་ལ་སྩོལ། །
ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔
ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔
རྩ་བ་སྐུ་གསུང་ཐུགས་མཆོག་དང༔
ཡན་ལག་དམ་ཚིག་ཉི་ཤུ་ལྔ༔
མེད་དང་གཅིག་པུ་ཕྱལ་བ་སོགས༔
ཆོ་ག་བཞིན་དུ་སྲུང་བར་བགྱི༔
གཙོ་བོས་ཇི་ལྟར་བཀའ་བསྩལ་པ། །
དེ་དག་ཐམས་ཅད་བདག་གིས་བགྱི། །
ཁྱེད་ལ་བདག་ཀྱང་ཡོངས་སུ་འབུལ། །
སློབ་མར་བཟུང་ནས་སྤྱད་དུ་གསོལ། །
