ཀློང་སྙིང་དབང་བསྐུར་ཕྲེང་བ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན་ལས་ཞི་ཁྲོ་ངན་སོང་སྦྱོང་བའི་དབང་ཆོག
༄༅། །རྫོགས་པ་ཆེན་པོ་ཀློང་ཆེན་སྙིང་ཐིག་ལེའི་རྩ་གསུམ་སྤྱི་དང་བྱེ་བྲག་གི་དབང་བསྐུར་གྱི་ཕྲེང་བ་བཀླག་ཆོག་ཏུ་བཀོད་པ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན།
༈ ཞི་ཁྲོ་ངན་སོང་སྦྱོང་བའི་དབང་བསྐུར་གྱི་ལེའུ་ཚན་དང་པོ།
ཨེ་མ་དུས་གསུམ་རྒྱལ་བ་ཀུན་ཏུ་བཟང༌། །
རིགས་ལྔའི་སངས་རྒྱས་དགོངས་སུ་གསོལ། །
དཀོན་མཆོག་གསུམ་ལ་སྐྱབས་འགྲོ་དང༌། །
སོ་ཐར་བྱང་སེམས་སྔགས་སྡོམ་རྣམས། །
མགོན་པོས་བདག་ལ་གནང་དུ་གསོལ།
སྐྱེས་བུ་གསུམ་གྱི་བློ་རྩལ་རྣམས། །
གོང་ནས་གོང་དུ་སྤར་བའི་བློས། །
ཀུན་བཟང་རིགས་ལྔའི་ལྷ་ཚོགས་ལ། །
འདི་བཟུང་བླ་མེད་བྱང་ཆུབ་བར། །
གུས་པ་ཡིས་ནི་སྐྱབས་སུ་མཆི། །
བླ་མ་ཀུན་བཟང་སྤྱན་སྔ་རུ། །
ལུས་ངག་ཡིད་ཀྱིས་གཞན་རྣམས་ལ། །
གནོད་པའི་ལས་ལྡོག་དགེ་བ་སྒྲུབ། །
དགེ་ཚུལ་དགེ་སློང་བྱང་ཆུབ་སེམས། །
སོ་སོར་ཐར་པའི་སྡོམ་པ་ལ། །
བདག་ནི་རྒྱུན་དུ་གནས་ཤིང་བསྲུང༌། །
ཧོཿ བླ་མ་ཀུན་བཟང་དགོངས་སུ་གསོལ། །
འདི་བཟུང་བྱང་ཆུབ་མ་ཐོབ་བར། །
འགྲོ་དྲུག་སེམས་ཅན་ཐམས་ཅད་ལ། །
མ་དང་བུ་ཡི་འདུ་ཤེས་ཀྱིས། །
མ་བསྒྲལ་བ་རྣམས་བསྒྲལ་བ་དང༌། །
མ་གྲོལ་དགྲོལ་དང་དབུགས་དབྱུང་ཕྱིར། །
སྨོན་པའི་བྱང་ཆུབ་སེམས་བསྐྱེད་དོ། །
སྔོན་གྱི་རྒྱལ་བ་ཐམས་ཅད་ཀྱང༌། །
སྡོམ་པ་ལ་ནི་གནས་པ་ལྟར། །
འདི་བཟུང་འཁོར་བ་མ་སྟོང་བར། །
བླ་མེད་འཇུག་པའི་བྱང་ཆུབ་སེམས། །
ཕ་རོལ་ཕྱིན་དྲུག་སློབ་ཅིང་སྒྲུབ། །
ཀུན་དོན་ཚུལ་ཁྲིམས་གསུམ་གྱི་དངོས། །
ཐ་མལ་སྣང་ཞེན་ཉེས་སྤྱོད་སྡོམ། །
བསྐྱེད་རྫོགས་ཟབ་མོའི་དགེ་ཆོས་སྡུད། །
རྣམ་བཞིའི་ཕྲིན་ལས་གཞན་ཕན་སྤྱོད། །
སྔགས་ཀྱི་ཆོ་གས་སྡོམ་པར་བགྱི། །
བཛྲ་ཧ་ས་ཧ།
ཀྱཻ། ཁྲོ་བོ་མི་བཟད་འཇིགས་པའི་སྐུ། །
མཚོན་ཆ་སྣ་ཚོགས་ཕྱག་ན་བསྣམས། །
བདག་ཅག་འཁོར་བ་ལས་གྲོལ་ཕྱིར། །
ཁྱེད་ཀྱིས་གནང་སྟེ་བཏང་དུ་གསོལ།
བླ་མ་རྡོ་རྗེ་འཛིན་པ་དང༌། །
དཀྱིལ་འཁོར་ལྷ་ཚོགས་སྤངས་ནས་ནི། །
སྐྱོབ་པ་གཞན་ན་མ་མཆིས་པས། །
སྒོ་ཕྱེ་ཐར་པའི་གྲོང་བསྟན་འཚལ། །
ཨེ་མ་དུས་གསུམ་རྒྱལ་བ་ཀུན་ཏུ་བཟང༌། །
རིགས་ལྔའི་སངས་རྒྱས་དགོངས་སུ་གསོལ། །
འདི་བཟུང་བྱང་ཆུབ་མ་ཐོབ་བར། །
སོགས་ནས།
འགྲོ་དྲུག་སེམས་ཅན་ཐམས་ཅད་ལ། །
མ་དང་བུ་ཡི་འདུ་ཤེས་ཀྱིས། །
མ་བསྒྲལ་བ་རྣམས་བསྒྲལ་བ་དང༌། །
མ་གྲོལ་དགྲོལ་དང་དབུགས་དབྱུང་ཕྱིར། །
སྨོན་པའི་བྱང་ཆུབ་སེམས་བསྐྱེད་དོ། །
སྔོན་གྱི་རྒྱལ་བ་ཐམས་ཅད་ཀྱང༌། །
སྡོམ་པ་ལ་ནི་གནས་པ་ལྟར། །
འདི་བཟུང་འཁོར་བ་མ་སྟོང་བར། །
བླ་མེད་འཇུག་པའི་བྱང་ཆུབ་སེམས། །
ཕ་རོལ་ཕྱིན་དྲུག་སློབ་ཅིང་སྒྲུབ། །
ཀུན་དོན་ཚུལ་ཁྲིམས་གསུམ་གྱི་དངོས། །
ཐ་མལ་སྣང་ཞེན་ཉེས་སྤྱོད་སྡོམ། །
བསྐྱེད་རྫོགས་ཟབ་མོའི་དགེ་ཆོས་སྡུད། །
རྣམ་བཞིའི་ཕྲིན་ལས་གཞན་ཕན་སྤྱོད། །
སྔགས་ཀྱི་ཆོ་གས་བསྡམ་པར་བགྱི།
ཨོཾ་སརྦ་ཡོ་ག་ཙིཏྟ་ཨུ་པ་ད་ཡ་མི།
སངས་རྒྱས་རིགས་ཀྱི་དམ་ཚིག་ཏུ། །
རྒྱལ་སྲས་སངས་རྒྱས་ཐམས་ཅད་དང༌། །
དཔའ་བོ་རྣལ་འབྱོར་མ་རྣམས་བསྙེན། །
རྡོ་རྗེ་རིགས་ཀྱི་དམ་ཚིག་ཏུ། །
རྡོ་རྗེ་དྲིལ་བུའི་ཕྱག་རྒྱ་དང༌། །
བྱང་ཆུབ་སེམས་ནི་སྤང་མི་བྱ། །
རིན་ཆེན་རིགས་ཀྱི་དམ་ཚིག་ཏུ། །
སྦྱིན་པ་རྣམ་བཞི་རྟག་ཏུ་སྦྱིན།
པདྨ་རིགས་ཀྱི་དམ་ཚིག་ཏུ། །
ཐེག་པ་གསུམ་དང་ཆོས་རྣམས་བཤད། །
ལས་ཀྱི་རིགས་ཀྱི་དམ་ཚིག་ཏུ། །
འགྲོ་བའི་དོན་ལ་བརྩོན་པར་བྱ། །
ལྷ་ཡི་ཕྱག་རྒྱ་བླ་མའི་སྟན། །
བཞོན་པ་ལ་སོགས་མི་སྨད་ཅིང༌། །
བསྟན་པ་སྐྱོང་རྣམས་བརྙས་མི་བྱ། །
བླ་མ་སངས་རྒྱས་དྲན་བྱེད་ཅིང༌། །
བརྟན་གཡོ་ལྷ་དང་མཉམ་པར་སྦྱོར། །
མདོར་ན་རྒྱལ་བས་གང་བསྒྲགས་པ། །
དེ་དག་ཐམས་ཅད་བདག་གིས་བཟུང༌། །
ཀྱཻ། རིགས་ལྔ་བདེ་བར་གཤེགས་པ་དང༌། །
བླ་མ་ཡི་དམ་མཁའ་འགྲོ་དགོངས། །
སྒོ་བ་ཆེན་པོ་ཁྱེད་རྣམས་ཀྱིས། །
སྒོ་ཕྱེ་ཐར་པའི་གྲོང་བསྟན་འཚལ།
ཨོཾ་ན་མ་ཏེ་ཧཱུྃ།
ཨོཾ་ན་མ་མེ་ཧཱུྃ།
ཨོཾ་ན་མོ་ན་མ་ཧཱུྃ།
ཀྱཻ། བདེ་གཤེགས་རིགས་ལྔའི་ཕོ་བྲང་འདིར། །
འབྲེལ་བའི་མེ་ཏོག་འདི་དོར་བས། །
ལས་འཕྲོ་གང་ཡོད་ལྷ་དང་མཇལ་བར་ཤོག །
ཨོཾ་པུཥྤེ་སིདྡྷི་ཧཱུྃ།
ནམ་མཁའི་རྡོ་རྗེས་རྒྱལ་བ་ལྔར། །
དགོངས་ཤིང་ཇི་ལྟར་དབང་བསྐུར་ལྟར། །
མཆོད་པ་ཆེན་པོ་བརྡ་ཡི་དབང༌། །
རིག་པ་འཛིན་པ་བདག་ལ་སྩོལ།
ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ
ལན་གསུམ། ཁྲོ་བོར་སྒྲུབ་པའི་སྔགས་འདིའི་རྗེས་ཟློས་མཛོད།
ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ།
ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏེ་པཱ་རི་ཤྭ་དྷ་ནི་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སཾ་མྱག་སཾ་བུདྡྷ་ཡ། ཏདྱ་ཐཱ། ཨོཾ་ཤྭ་དྷ་ནི་ཤྭ་དྷ་ནི། སརྦ་པཱ་པཾ་བི་ཤྭ་དྷ་ནི་སྭཱ་ཧཱ།
ཨོཾ་བཛྲ་སཏྭ་ས་མ་ཡ་སོགས། ས་མ་ཡ་སཏྭ་ཨཱ་ཧཱུྃ་ཕཊ།
རྩ་བ་སྐུ་གསུང་ཐུགས་མཆོག་དང༌། །
ཡན་ལག་དམ་ཚིག་ཉི་ཤུ་ལྔ། །
མེད་དང་གཅིག་པུ་ཕྱལ་བ་སོགས། །
ཆོ་ག་བཞིན་དུ་སྲུང་བར་བགྱི། །
གཙོ་བོས་ཇི་ལྟར་བཀའ་བསྩལ་པ། །
དེ་དག་ཐམས་ཅད་བདག་གིས་བགྱི། །
ཁྱོད་ལ་བདག་ཀྱང་ཡོངས་སུ་འབུལ། །
སློབ་མར་བཟུང་ནས་སྤྱད་དུ་གསོལ། །
