Abhirati Aspiration Prayer—Tibetan

Deities › Akṣobhya | བོད་ཀྱི་བླ་མ།དྲི་མེད་ཞིང་སྐྱོང་མགོན་པོ། | བོད་ཀྱི་བླ་མ།འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

English | བོད་ཡིག

དྲི་མེད་ཞིང་སྐྱོང་མགོན་པོ།

Akṣobhya

Further information:
Download this text:

༄༅།  །བཅོམ་ལྡན་འདས་མི་འཁྲུགས་པའི་ཞིང་བཀོད་དོན་བསྡུས་ཀྱི་སྨོན་ལམ་རིན་པོ་ཆེའི་ཕྲེང་བ་བཞུགས་སོ།  །

 

མངོན་དགའི་ཞིང་ན་བྱང་ཆུབ་ཤིང་དབང་དྲུང་།  །

མི་འཁྲུགས་རྒྱལ་བ་དཔལ་གྱིས་ལྷམ་མེར་བཞུགས།  །

ཉན་ཐོས་བྱང་ཆུབ་སེམས་དཔའ་འཁོར་བཅས་ལ།  །

ལུས་དང་ངག་ཡིད་དྭང་བས་གུས་ཕྱག་འཚལ།  །

 

དངོས་འབྱོར་ཡིད་སྤྲུལ་བདག་པོས་མ་བཟུང་བའི།  །

ལྷ་མིའི་དཔལ་འབྱོར་བདེ་བའི་ཡོ་བྱད་ཀྱི།  །

མཆོད་པའི་སྤྲིན་གྱིས་ནམ་མཁའ་གང་བྱས་ཏེ།  །

བདེ་བར་གཤེགས་པ་སྲས་དང་བཅས་རྣམས་མཆོད།  །

 

ཐོག་མེད་དུས་ནས་དུས་གསུམ་གྱིས་བསགས་པའི།  །

སྲིད་དང་ངན་འགྲོའི་རྒྱུར་གྱུར་མི་དགེའི་ལས།  །

གང་བསགས་འགྱོད་པས་སོ་སོར་བཤགས་པ་ནི།  །

སླན་ཆད་མི་བགྱིའི་སྡོམ་ལ་གནས་པར་བགྱི།  །

 

འཕགས་སྐྱེའི་དགེ་ཚོགས་ཀུན་ལ་ཡི་རང་ཞིང་།  །

རྒྱལ་རྣམས་ཆོས་ཀྱི་འཁོར་ལོ་བསྐོར་བ་དང་།  །

མྱ་ངན་མི་འདའ་བཞུགས་པར་གསོལ་བ་འདེབས།  །

དེ་ལྟའི་དགེ་བ་བྱང་ཆུབ་ཕྱིར་བསྔོ་བས།  །

 

གང་སྨོན་འདས་པའི་སངས་རྒྱས་སྤྱན་ཆེན་པོར།  །

མི་འཁྲུགས་རྒྱལ་བས་བྱང་ཆུབ་ཐུགས་བསྐྱེད་ཅིང་།  །

ནམ་ཡང་ཁྲོ་བ་གནོད་སེམས་མི་འབྱུང་སོགས།  །

སྨོན་ལམ་བརྒྱད་བཏབ་བདག་གིས་འགྲུབ་གྱུར་ཅིག  །

 

གཞན་ཡང་དམ་བཅའ་ཇི་བཞིན་བགྱིད་པ་དང་།  །

གོམ་རེ་བཞིན་ཡང་སངས་རྒྱས་ཡིད་བྱེད་དང་།  །

ཚེ་རབས་ཀུན་ཏུ་ཁྱིམ་ནས་འབྱུང་སོགས་ཀྱི།  །

སྒྲུབ་པའི་སྨོན་ལམ་བཅོ་བརྒྱད་འགྲུབ་གྱུར་ཅིག  །

 

དེ་བཞིན་འཁོར་བཞིའི་ཉེས་ལྟུང་མི་གླེང་དང་།  །

འཚང་རྒྱའི་ཞིང་དུ་ལྟུང་བའི་སྒྲ་ཙམ་ཡང་།  །

མི་གྲགས་དག་ཅིང་ཡོན་ཏན་ལྡན་པ་སོགས།  །

ནན་ཏན་སྨོན་ལམ་བདུན་པོ་འགྲུབ་གྱུར་ཅིག  །

 

ཇི་ལྟར་མི་འཁྲུགས་སྤྱད་བ་སྤྱོད་ཚེ་བཞིན།  །

སངས་རྒྱས་ཞིང་ནས་སངས་རྒྱས་ཞིང་འགྲོ་ཞིང་།  །

དེ་བཞིན་གཤེགས་རྣམས་མཉེས་པར་བྱེད་པ་ལ།  །

སྐད་ཅིག་ཙམ་ཡང་ཐུགས་དབྱུང་མི་བགྱིད་ཤོག  །

 

ཚེ་རབས་ཀུན་ཏུ་ཚངས་པར་སྤྱོད་པ་དང་།  །

ཕ་རོལ་ཕྱིན་པའི་ཆོས་ཉིད་ལས་བརྩམ་པ།  །

སྟོན་ཅིང་དེ་ཚེ་བདག་གི་ལུས་དང་སེམས།  །

ངལ་དང་དུབ་པ་ཅུང་ཟད་མེད་པར་ཤོག  །

 

ཆོས་སྦྱིན་དེ་ཡི་དགེ་ཚོགས་ཇི་སྙེད་པས།  །

རང་གི་སངས་རྒྱས་ཞིང་དེར་བྱང་སེམས་རྣམས།  །

ཚེ་རབ་བརྗེས་ཀྱང་དམ་ཆོས་མི་བརྗེད་ཅིང་།  །

གང་དུ་སྨོན་པའི་ཞིང་དེར་སྐྱེ་བར་ཤོག  །

 

དེ་དག་རྫོགས་པའི་སངས་རྒྱས་རྣམས་དང་ནི།  །

རྟག་ཏུ་མི་འབྲལ་གུས་པས་རབ་བསྙེན་ཅིང་།  །

བདུད་དང་བདུད་ཀྱི་རིགས་ཀྱི་ལྷ་དག་གིས།  །

ཐམས་ཅད་དུ་ཡང་བླགས་རྙེད་མ་གྱུར་ཅིག  །

 

ཇི་ལྟར་རང་ཉིད་དམ་ཆོས་འདོད་པ་ལྟར།  །

སེམས་ཅན་དེ་དག་ཆོས་འདོད་གྱུར་པ་ལ།  །

དེ་དག་དེ་ལྟར་ཡོན་ཏན་མ་རྫོགས་པར།  །

བདག་ཉིད་བྱང་ཆུབ་སྤྱད་པ་སྤྱོད་པར་ཤོག  །

 

བདག་ནི་འདི་ནས་ཤི་འཕོས་གྱུར་པའི་འོག  །

མངོན་པར་དགའ་བ་དག་པའི་ཞིང་ཁམས་སུ།  །

བཅོམ་ལྡན་མི་འཁྲུགས་རྒྱལ་བའི་དྲུང་སྐྱེས་ཏེ།  །

བྱང་ཆུབ་ལམ་གྱི་སྒྲུབ་པས་མཉེས་བྱེད་ཤོག  །

 

རྒྱལ་སྲས་སྤོས་ཀྱི་གླང་པོ་ལ་སོགས་པ།  །

ཞིང་དེའི་བྱང་ཆུབ་སེམས་དཔའ་ཆེ་རྣམས་ཀྱི།  །

ཡོན་ཏན་ཇི་སྙེད་བདག་ལའང་ལྡན་གྱུར་ཅིག  །

སངས་རྒྱས་རྣམས་ཀྱི་རྟག་ཏུ་བསྔགས་མཛད་ཤོག  །

 

ཇི་ལྟར་རྒྱལ་སྲས་དེ་དག་བཅོམ་ལྡན་དེས།  །

བྱང་ཆུབ་ཆེན་པོར་མངོན་སུམ་ལུང་བསྟན་བཞིན།  །

བདག་ཀྱང་ཕྱིར་མི་ལྡོག་པའི་ས་ཐོབ་སྟེ།  །

བྱང་ཆུབ་མཆོག་ཏུ་ལུང་བསྟན་ཐོབ་པར་ཤོག  །

 

རྒྱལ་བ་དེ་ཡི་དམ་པའི་ཆོས་འཛིན་ཅིང་།  །

བྱང་ཆུབ་སྤྱོད་པ་ཀུན་ཏུ་སྣང་བྱས་ཏེ།  །

ཚོགས་གཉིས་རྒྱ་མཚོ་ཡོངས་སུ་རྫོགས་པ་དང་།  །

སེམས་ཅན་རྒྱ་མཚོ་རབ་ཏུ་སྨིན་བྱེད་ཤོག  །

 

མདོར་ན་མི་འཁྲུགས་རྒྱལ་བའི་ཐུགས་བསྐྱེད་དང་།  །

སྤྱོད་པ་སྨོན་ལམ་ཇི་བཞིན་བདག་སྤྱོད་ཅིང་།  །

མངོན་དགའི་ཞིང་མཚུངས་དག་པའི་འཇིག་རྟེན་དུ།  །

བཅོམ་ལྡན་དེ་འདྲའི་གོ་འཕང་མངོན་བྱེད་ཤོག  །།།

 

དྲི་མེད་ཞིང་སྐྱོངས་ནས་གསུངས་པའོ།།   །།

 

This website uses cookies to collect anonymous usage statistics and enhance the user experience.
Decline
Accept