Making the Most of the Freedoms and Advantages—Tibetan

༄༅། །དལ་འབྱོར་དོན་ཡོད་བྱེད་པར་བསྐུལ་བའི་ཞལ་གདམས།

ཨོཾ་སྭསྟི།
དཔལ་ལྡན་བླ་མ་འཇམ་པའི་རྡོ་རྗེ་ཡི། །
ཞབས་ལ་བཏུད་དེ་གདམས་པའི་མགྲིན་གསོས་སྤེལ། །
ཤིན་ཏུ་རྙེད་དཀའི་རྟེན་འདི་ད་ཕྱིན་ནས། །
ཐོབ་པར་དཀའ་བས་དལ་འབྱོར་དོན་ཡོད་མཛོད། །
ཚེ་ནི་མི་རྟག་ཆུ་ཡི་ཆུ་བུར་འདྲ། །
འཆི་བདག་བདུད་ནི་དགོང་ཁའི་གྲིབ་སོ་བཞིན། །
འཁོར་བའི་སྡུག་བསྔལ་བཟོད་པར་དཀའ་བ་ལ། །
བསམ་ནས་རྒྱུ་འབྲས་སྤངས་བླང་ཤིན་ཏུ་གཅེས། །
བླ་མ་མཆོག་གསུམ་སྐྱབས་ཀྱི་སྙིང་པོར་ཟུངས། །
འགྲོ་ཀུན་ཕ་མར་ཤེས་པས་སྙིང་རྗེ་སྒོམ། །
ཚོགས་བསགས་སྒྲིབ་སྦྱོངས་ལམ་ལ་འབད་པ་དང་། །
བླ་མར་མོས་གུས་གསོལ་འདེབས་རྟག་ཏུ་བརྩོན། །
ལུས་ལྷ་ངག་སྔགས་སེམས་གྱི་འཕྲོ་འདུ་ཀུན། །
ཡེ་ཤེས་ཆེན་པོར་ལམ་དུ་ཁྱེར་བ་དང་། །
ཟག་བཅས་ཟག་མེད་དགེ་ཚོགས་འགྲོ་ལ་བསྔོ། །
སྨོན་ལམ་རྒྱལ་པོ་བཟང་སྤྱོད་འདོན་ལ་རེམ། །
སེམས་ཀྱི་གནད་འདི་མ་ཤེས་གྱི་ནར་འཕྱན། །
དེ་ཡང་འཁྲུལ་པའི་སེམས་ཀྱི་རྩར་བཅད་པས། །
ལུས་ངག་ཡིད་གསུམ་གཞི་མེད་རྩ་བྲལ་དུ། །
གཏན་ལ་དབབ་ཅིང་ད་ལྟའི་རིག་པ་ནི། །
རང་གསལ་འགག་མེད་དབྱིངས་དང་འདུ་འབྲལ་མེད། །
གསལ་རིག་སྟོང་གསུམ་སྐུ་གསུམ་དབྱེར་མེད་པའི། །
རང་བྱུང་ཡེ་ཤེས་མཚན་མའི་སྤྱོད་ཡུལ་བྲལ། །
གཟུང་འཛིན་རྟོག་པས་མ་བསླད་རང་བབ་ཞོག །
རྣམ་རྟོག་གང་ཤར་གདམ་ང་མེད་པར་གྲོལ། །
དེ་ལྟར་ཉམས་བླངས་ཡེངས་མེད་བརྩོན་བྱས་ན། །
ཚེ་འདིའམ་ནི་བར་དོར་གྲོལ་བ་སྟེ། །
གདོད་མའི་ས་ལ་གཏན་སྲིད་ཟིན་པར་འགྱུར། །
དེ་སྐད་སྨྲ་བ་བླུན་རྨོངས་ཆོས་བློ་ལ། །
དད་པ་ལྡན་པས་བསྐུལ་བ་མ་གཅོག་ཙམ། །
མདོར་བསྡུས་ཉིད་དུ་ཕུལ་བའི་དགེ་བ་ཡིས། །
སེམས་རྒྱུད་གྲོལ་ཞིང་དོན་གཉིས་ལྷུན་གྲུབ་ཤོག། །
མངྒ་ལཾ།། །།