Calling the Guru from Afar—Tibetan

༄༅། །བླ་མ་རྒྱང་འབོད་བཞུགས་སོ།  །

རང་གི་སྤྱི་བོའི་སྟེང་མཁར།  །

པད་དཀར་ཟླ་བའི་དབུས་ན།  །

དྲིན་ཆེན་རྩ་བའི་བླ་མ།  །

རྣམ་པ་པཎ་ཆེན་བི་མ།  །

ལྗང་གསལ་ཞལ་གཅིག་ཕྱག་གཉིས།  །

པཎྜི་ཏ་ཡི་ཆ་བྱད།  །

མཉམ་བཞག་ཚེ་བུམ་འཛིན་ཅིང་།  །

ཤང་རྩེར་ཨ་ཡིག་དཀར་པོ།  །

འོད་དང་འོད་ཟེར་འཕྲོ་བ།  །

སྐྱབས་ཀུན་འདུས་པའི་བདག་ཉིད།  །

མངོན་སུམ་བཞུགས་པར་གསལ་འདེབས།  །

མཁྱེན་ནོ་མཁྱེན་ནོ་བླ་མ་མཁྱེན་ནོ།  །

དཀོན་མཆོག་ཀུན་འདུས་ངོ་བོ།  །

རྩ་གསུམ་རྒྱ་མཚོའི་སྤྱི་གཟུགས།  །

འཇམ་དཔལ་ཆོས་ཀྱི་བཤེས་གཉེན།  །

མི་མངོན་དབྱིངས་ནས་ཐུགས་རྗེས།  །

སྐལ་ལྡན་བདག་ལ་བརྩེས་དགོངས།  །

རྡོ་རྗེའི་ཡེ་ཤེས་འབེབས་མཛོད།  །

མཁྱེན་ནོ་མཁྱེན་ནོ་བླ་མ་མཁྱེན་ནོ།  །

རང་རིག་གཞོན་ནུ་བུམ་སྐུ།  །

འདུ་འབྲལ་མེད་པར་རྟག་བཞུགས།  །

སྐུ་གསུམ་དབྱེར་མེད་ངོ་བོ།  །

འོད་གསལ་སྤྲུལ་པའི་རྡོ་རྗེས།  །

དབྱིངས་རིག་དབྱེར་མེད་ཀློང་ནས།  །

སྐལ་ལྡན་བདག་ལ་བརྩེས་དགོངས།  །

མཁྱེན་ནོ་མཁྱེན་ནོ་བླ་མ་མཁྱེན་ནོ།  །

སྣང་སྲིད་དག་པ་རབ་འབྱམས།  །

བདེ་ཆེན་ཆོས་སྐུའི་ཀློང་ནས།  །

པདྨ་ལས་འཁྲུངས་རྒྱལ་ཚབ།  །

འོད་གསལ་མདོ་སྔགས་གླིང་པས།  །

སྐལ་ལྡན་བདག་ལ་བརྩེས་དགོངས།  །

མཁྱེན་ནོ་མཁྱེན་ནོ་བླ་མ་མཁྱེན་ནོ།  །

གར་བཞུགས་སྤྲུལ་པའི་ཞིང་ཁམས།  །

ཡོངས་རྫོགས་བསྟན་པའི་མངའ་བདག  །

བཀའ་བབས་བདུན་ལྡན་བླ་མ།  །

འཇམ་དབྱངས་མཁྱེན་བརྩེའི་དབང་པོས།  །

རྟག་ཏུ་འབྲལ་མེད་ཐུགས་རྗེས།  །

སྐལ་ལྡན་བདག་ལ་བརྩེས་དགོངས།  །

མཁྱེན་ནོ་མཁྱེན་ནོ་བླ་མ་མཁྱེན་ནོ།  །

སྙིང་ཁ་ཆོས་ཀྱི་ཕོ་བྲང་།  །

འོད་གསལ་སྒྱུ་མའི་རང་གཟུགས།  །

མཁྱེན་བརྩེ་ནུས་པའི་མངའ་བདག  །

འཇམ་དབྱངས་བློ་གྲོས་རྒྱ་མཚོས།  །

དགོངས་པའི་དབྱིངས་ནས་གཟིགས་ཤིག  །

སྐལ་ལྡན་བདག་ལ་བརྩེ་དགོངས།  །

མཁྱེན་ནོ་མཁྱེན་ནོ་བླ་མ་མཁྱེན་ནོ།  །

བདག་རྒྱུད་ཆོས་དང་འདྲེས་པར་བྱིན་གྱིས་རློབས།  །

ལས་ངན་སྡིག་སྒྲིབ་དག་པར་བྱིན་གྱིས་རློབས།  །

རྐྱེན་ངན་བར་ཆད་ཞི་བར་བྱིན་གྱིས་རློབས།  །

སྡོམ་དང་དམ་ཚིག་དག་པར་བྱིན་གྱིས་རློབས།  །

རིམ་གཉིས་མཐའ་རུ་ཕྱིན་པར་བྱིན་གྱིས་རློབས།  །

དགོངས་པའི་རྩལ་ཆེན་རྫོགས་པར་བྱིན་གྱིས་རློབས།  །

སྐུ་གསུམ་གོ་འཕང་ཐོབ་པར་བྱིན་གྱིས་རློབས།  །

བླ་མའི་གནས་གསུམ་འབྲུ་གསུམ་ལས།  །

འོད་ཟེར་དཀར་དམར་མཐིང་གསུམ་བྱུང་།  །

རིམ་དང་གཅིག་ཆར་ཐིམ་པ་ཡིས།  །

དབང་བསྐུར་སྒྲིབ་སྦྱོང་དངོས་གྲུབ་ཐོབ།  །

བླ་མ་འོད་ཞུ་རང་ལ་ཐིམ།  །

རང་སེམས་དུས་གསུམ་རྟོག་པ་ཡི།  །

སྟོང་པའི་འོད་གསལ་ཆོས་ཀྱི་དབྱིངས།  །

འཕོ་འགྱུར་གསལ་འགྲིབ་བྲལ་བའི་ངང་།  །

བྱར་མེད་རང་བབ་ལྷུག་པར་བཞག  །

འདི་ནི་ཀ་དག་ཆོས་སྐུ་ཡི།  །
བླ་མའི་སྒྲུབ་པ་མཐར་ཐུག་གོ  །

རྗེས་ཐོབ་བླ་མའི་རོལ་པ་དང་།  །
མ་ཡེངས་བསྲེས་ལ་ལམ་ཁྱེར་བྱ།  །
སེམས་ཅན་ཀུན་ལ་སྙིང་རྗེ་དང་།  །
ངེས་འབྱུང་དྲག་པོ་ཡང་ཡང་བསྒོམ།  །
སྨོན་ལམ་རྣམ་པར་དག་པ་གདབ།  །
དེས་ནི་དོན་གཉིས་ལྷུན་གྲུབ་འགྱུར།  །

ཅེས་པའང་གྲགས་པ་གཞན་ཕན་གྱིས་བསྐུལ་ངོར་ཆོས་ཀྱི་བློ་གྲོས་པས་བྲིས་པ་དོན་དང་ལྡན་པར་གྱུར་ཅིག། །།