Daily Yangdak Heruka—Tibetan

༄༅། །ཡང་དག་རྒྱུན་ཁྱེར་བཞུགས།

སྐྱབས་སེམས་སྤྱི་ལྟར་རྗེས།

ཨཿསྟོང་པ་ཉིད་དང་སྙིང་རྗེ་ཆེ།  །

ཟུང་འཇུག་རིག་རྩལ་ཧཱུྃ་མཐིང་ནག  །

དེ་ཉིད་ཡོངས་གྱུར་སྐད་ཅིག་གི།

པད་ཉི་དྲེགས་པའི་གདན་སྟེང་དུ།  །

དཔལ་ཆེན་བཛྲ་ཧེ་རུ་ཀཿ།

མཐིང་ནག་ནམ་མཁའ་དྭངས་པའི་མདོག  །

མཐིང་དཀར་དམར་བའི་ཞལ་གསུམ་པ།  །

ཕྱག་དྲུག་རྡོ་རྗེ་ཁ་ཊྭཱྃ་གཡས།  །

དྲིལ་བུ་བྷནྡྷ་རྒྱུ་ཞགས་གཡོན།  །

དཔལ་དང་དུར་ཁྲོད་ཆས་ཀྱིས་བརྒྱན།  །

ཡུམ་ཆེན་ཀྲོ་དྷི་ཤྭ་རི་མ།  །

མཐིང་སྐྱ་རྡོ་རྗེ་ཐོད་ཁྲག་བསྣམས།  །

གར་དགུའི་ཉམས་ལྡན་འབར་བའི་སྐུ།  །

ཡེ་ཤེས་མེ་དཔུང་ཀློང་ན་བརྗིད།  །

གཽ་རི་ལ་སོགས་ཁྲོ་མོ་བརྒྱད།  །

གཡས་གཡོན་ཞལ་དང་ཕྱག་ལ་རྫོགས།  །

གནས་གསུམ་ཡི་གེ་གསུམ་གྱིས་མཚན།  །

ཡེ་ཤེས་དབང་བསྐུར་དབུ་རྒྱན་རྫོགས།  །

དམ་ཡེ་གཉིས་མེད་ཆེན་པོར་གསལ།  །

ཐུགས་ཀར་དཔལ་གྱི་བེའུའི་དབྱིངས།  །

ཧཱུྃ་མཐིང་རུ་ལུ་འབྲུ་བརྒྱད་འཕྲོ།  །

མར་མེ་ལྟ་བུ་གསལ་ཞིང་འབར།  །

སྣང་གྲགས་གཉིས་མེད་དཔལ་ཆེན་པོའི།  །

ཡེ་ཤེས་འཁོར་ལོར་སད་པར་བསམ།  །

ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ།

ཞེས་བཟླ།  སྐབས་སུ་རྡོ་རྗེའི་བཟླས་པ་དང་།  རླུང་སྔགས་རིག་པ་དབྱེར་མེད་དང་།  །ཡང་དག་དགོངས་པའི་ངང་བསྐྱང་ངོ་།  །

ཐུན་མཐར།

སྣང་ཆ་ལྷ་ཡི་འཁོར་ལོ་རྣམས།  །

སྐྱེ་མེད་ཆོས་ཀྱི་དབྱིངས་སུ་ཐིམ།  །

སླར་ཡང་དཔལ་ཆེན་ཧེ་རུ་ཀའི།  །

གསང་བ་གསུམ་གྱི་རོལ་བ་ཤར།  །

བཛྲ་ཀཱ་ཝཱ་ཙི་རཀྵ་ཧཾ།

དགེ་བསྔོ་སྨོན་ལམ་བྱས་ནས་སྤྱོད་ལམ་ལ་འཇུག་གོ  །

ཅེས་པའང་བསོད་ནམས་རྒྱལ་མཚན་གྱི་ཐུགས་བཞེད་ལྟར།  ཆོས་ཀྱི་བློ་གྲོས་པས་ལྷོ་བྲག་མཁར་ཆུར་བྲིས་པའོ།།   །།