གཏོར་བསྔོ་ཕྲིན་ལས་མྱུར་མགྱོགས།
༄༅། །གཏོར་བསྔོ་ཕྲིན་ལས་མྱུར་མགྱོགས་བཞུགས་སོ། །
མཆོད་གཏོར་རྣམས། རྃ་ཡྃ་ཁྃ། ཨོཾ་ཨཱཿཧཱུྃ་ཧ་ཧོ་ཧྲཱིཿས་ལན་གསུམ་གྱིས་གཏོར་མ་སྦྱངས་སྤེལ་བྱ།
ཧཱུྃ། སྐུ་གསུམ་ཞིང་ཁམས་རབ་འབྱམས་ནས། །
བསྟན་སྲུང་མ་ཧཱ་ཀཱ་ལ་ནི། །
དཔལ་ལྡན་རྡོ་རྗེ་གུར་གྱི་མགོན། །
ཡུམ་ཆེན་ཨེ་ཀ་ཙ་ཊི་དང་། །
ལྷ་མོ་འདོད་ཁམས་དབང་ཕྱུག་མ། །
དམ་ཅན་པཱུ་ཏྲ་མིང་སྲིང་དང་། །
གཉན་མགོན་ཆེན་པོ་ཞལ་བཞི་པ། །
ཡུམ་ཆེན་སྲིང་མོ་བཞི་ལ་སོགས། །
བསྟན་སྲུང་འཁོར་དང་བཅས་པ་རྣམས། །
མཆོད་གཏོར་གསེར་སྐྱེམས་རྒྱ་ཆེན་དང་། །
རྟེན་རྫས་བསྐང་རྫས་སྒྲུབ་རྫས་སོགས། །
དངོས་འབྱོར་ཡིད་སྤྲུལ་དཔག་མེད་ཀྱིས། །
མ་ཧཱ་ཀཱ་ལའི་ཐུགས་དམ་བསྐང་། །
ཨེ་ཀ་ཛ་ཊིའི་ཐུགས་དམ་བསྐང་། །
འདོད་ཁམས་ལྷ་མོའི་ཐུགས་དམ་བསྐང་། །
ཞིང་སྐྱོང་དབང་ཕྱུག་གདོང་བཞི་པ། །
ཡུམ་ཆེན་སྲིང་མོ་བཞི་དང་བཅས། །
ཐུགས་དམ་གཉན་པོ་དགྱེས་པར་བསྐང་། །
བཀའ་སྡོད་རྒྱུད་གསུམ་དྲེགས་པའི་ཚོགས། །
འཁོར་དང་བཅས་པའི་ཐུགས་དམ་བསྐང་། །
ཐུགས་དང་འགལ་འཁྲུལ་ཉམས་ཆགས་བཤགས། །
སངས་རྒྱས་བསྟན་དང་བསྟན་འཛིན་རྣམས། །
དར་ཞིང་རྒྱས་པའི་ཕྲིན་ལས་མཛོད། །
བདག་ཅག་ཡོན་མཆོད་འཁོར་བཅས་ལ། །
བྱད་ཕུར་རྦོད་གཏོང་གནོད་པ་བཟློག །
འབྱུང་པོ་གདུག་པས་མི་འཚེ་ཞིང་། །
ནད་རིམས་འཁོན་འཁྲུགས་ཞི་བ་དང་། །
ཚེ་རིང་ནད་མེད་དཔལ་འབྱོར་རྒྱས། །
ཅི་བསམ་ཡིད་བཞིན་འགྲུབ་པ་དང་། །
བཀྲ་ཤིས་བདེ་ལེགས་ཕུན་ཚོགས་ཤོག །
རྟག་ཏུ་མི་འབྲལ་སྲུངས་སྐྱོབས་མཛོད། །
ཅེས་པའང་དྷཱ་ཀི་ཚེ་རིང་ཆོས་སྒྲོན་གྱིས་ལྷ་རྫས་བཅས་ཐུགས་དམ་བྱ་རྒྱུར་གསུང་བསྐུལ་ངོར། ཆོས་ཀྱི་བློ་གྲོས་པས་དཔལ་ས་སྐྱའི་མགོན་ཁང་བསེ་འབག་ཡིད་བཞིན་ནོར་བུའི་དྲུང་དུ་བྲིས་པ་ཤིན་ཏུ་བྱིན་ཆེ་ཞིང་དོན་དང་ལྡན་པར་བྱིན་གྱིས་བརླབ་ཏུ་གསོལ། མངྒ་ལཾ།། །།
