Haribhadra Guru Yoga—Tibetan

༄༅། །མཁས་དང་གྲུབ་པའི་སློབ་དཔོན་ཆེན་པོ་སེངྒེ་བཟང་པོའི་བླ་རྣམ་བཞུགས་སོ།  །

ཨཱཿཆོས་ཀུན་སྐྱེ་མེད་སྟོང་པའི་ངང་།  །

ཨ་ག་རུ་ཡི་ཁྲི་པད་ཟླར།  །

སློབ་དཔོན་ཆེན་པོ་སེངྒེ་བཟང་།  །

དཀར་དམར་མདངས་ལྡན་གཟི་བརྗིད་འབར།  །

པཎྜི་ཏ་ཡི་ཆ་བྱད་ཅན།  །

དབུ་ལ་སྡེ་སྣོད་གསུམ་ཞུ་གསོལ།  །

ཕྱག་གཡས་ཆོས་འཆད་གཡོན་མཉམ་བཞག  །

གླེགས་བམ་བསྣམས་ཤིང་ཕྱེད་སྐྱིལ་བཞུགས།  །

ཐུགས་ཀར་ཤེས་རབ་ཕ་རོལ་ཕྱིན།  །

གསེར་མདོག་ཞལ་གཅིག་ཕྱག་བཞི་མ།  །

རྩ་ཕྱག་ཆོས་འཆད་མཉམ་བཞག་དང་།  །

འོག་མས་སྐྱབས་སྦྱིན་རྡོ་རྗེ་དང་།  །

གླེགས་བམ་འཛིན་ཅིང་ལོངས་སྐུའི་ཆས།  །

པད་ཟླར་རྡོ་རྗེའི་སྐྱིལ་ཀྲུང་བཞུགས།  །

གནས་གསུམ་ཡི་གེ་འབྲུ་གསུམ་དང་།  །

ཐུགས་ཀར་སྐྱེ་མེད་ཨ་ཡིས་མཚན།  །

དེ་ལས་འོད་འཕྲོས་ཡེ་ཤེས་པ།  །

སྤྱན་དྲངས་དམ་ཡེ་དབྱེར་མེད་གྱུར།  །

བཟང་པོ་སྤྱོད་པའི་ཡན་ལག་བདུན།  མཎྜལ་འབུལ་ཞིང་གསོལ་འདེབས་ནི།

ཨེ་མ་ཧོཿ

བྱམས་པ་མགོན་པོས་རྗེས་བཟུང་པཎྜི་ཏ།  །

རྒྱལ་ཡུམ་དགོངས་པ་ཇི་བཞིན་གསལ་མཛད་ཅིང་།  །

མཁྱེན་རབ་མཐའ་ཡས་སེངྒེ་བཟང་པོ་ལ།  །

གསོལ་བ་འདེབས་སོ་ཡུམ་དོན་རྟོགས་པར་ཤོག  །

ཨོཾ་ཨཱཿབཛྲ་གུ་རུ་སེང་ཧ་བྷ་དྲ་པྲཉྫཱ་པཱ་ར་མི་ཏཱ་སརྦ་སིདྡྷི་ཧཱུྃཿ

ཞེས་དང་དབྱངས་གསལ་ཨ་ཡིག་བཟླ།

བླ་མ་ཡུམ་ཆེན་ཐུགས་ཀ་ནས།  །

འོད་ཟེར་གསེར་མདོག་གྲངས་མེད་དང་།  །

དབྱངས་གསལ་ཨ་ཡིག་ཆར་བཞིན་བབས།  །

རང་གི་ལུས་ལ་སིབ་སིབ་ཐིམ།  །

མི་ཤེས་མུན་པ་ཀུན་བསལ་ནས།  །

བློ་མཆོག་སྣང་བ་རྒྱས་པར་མོས།  །

སྐབས་འགར་ཡུམ་གྱི་དོན་ལ་བཞག  །

ཐུན་མཐར་བླ་མའི་གནས་གསུམ་ལས།  །

བདུད་རྩི་དཀར་དམར་མཐིང་གསུམ་པོ།  །

ཡིག་འབྲུ་སྒྲར་བཅས་བྱུང་ནས་ནི།  །

རང་གི་གནས་གསུམ་ཐིམ་པ་དང་།  །

བླ་མ་འོད་ཞུ་ཤེར་ཕྱིན་གྱི།  །

གླེགས་བམ་འོད་ཀྱི་ཕུང་པོར་གྱུར།  །

རང་ཐིམ་ཤེར་ཕྱིན་སེར་མོའི་སྐུར།  །

གྱུར་པའི་ངང་ལ་སྣང་སེམས་བསྲེ།  །

ཨ་ནི་སྐྱེ་བ་མེད་པའི་སྒོ།  །

ར་ནི་རྡུལ་དང་བྲལ་བའི་སྒོ།  །

པ་ནི་ཆགས་པ་མེད་པའི་སྒོ།  །

ཙ་ནི་ཡེ་ཤེས་རྒྱས་པའི་སྒོ།  །

ན་ནི་ནམ་མཁའ་མཛོད་ཀྱི་སྒོ།  །

དྷཱིཿནི་ཡེ་ཤེས་ལྔ་ཡི་སྒོ།  །

དེ་ཡི་དོན་ལ་མཉམ་པར་བཞག  །

ཐུགས་ཀར་ཐིག་ལེ་སེར་པོའི་སྟེང་།  །

དྷཱིཿདང་ཨ་ར་པ་ཙས་བསྐོར།  །

སེམས་གཏད་སྔགས་ཀྱང་བཟླ་བ་དང་།  །

ག་ཏེ་ཡང་ནི་ཅུང་ཟད་བཟླ།  །

ཤེར་ཕྱིན་མདོ་ནི་གང་རུང་བཀླག  །

དགེ་བ་བསྔོ་ཞིང་སྨོན་ལམ་གདབ།  །

རྗེས་སྤྱོད་སྟོང་དང་རྟེན་འབྱུང་དང་།  །

འགྲོ་བའི་དོན་ལ་བརྩོན་བྱས་ན།  །

ཚེ་འདིར་ཡུམ་གྱི་དགོངས་པ་རྟོགས།  །

སྐུ་བཞིའི་རྒྱལ་སར་འཛེགས་པར་ངེས།  །

དེ་སྐད་ཆོས་ཀྱི་བློ་གྲོས་ལ།  །
འཁྲུལ་ཉམས་ཤིང་རྟ་ཟླ་ ༨ ཚེས་ ༢༨ ཀྱི།  །
ཉི་ཤར་ཆ་ལ་རབ་རིབ་ནི།  །
བྱུང་བས་རྐྱེན་བྱས་ཐ་སྐར་གྱི།  །
རྒྱལ་བ་དང་པོའི་ཚེས་༢ ལ་བྲིས།  །
དགེ་བས་བྱང་ཆུབ་ཐོབ་གྱུར་ཅིག  །

མངྒ་ལཾ།།    །།