Offering to Norbu Dradül Tsal—Tibetan

༄༅། །ནོར་བུ་དགྲ་འདུལ་རྩལ་གྱི་གསོལ་ཀ

ཀྱཻ།  རིགས་གསུམ་གཅིག་བསྡུས་པདྨ་འབྱུང་གནས་ཀྱི།  །

ཐུགས་རྗེའི་རོལ་རྩལ་ཁྲི་སྲོང་ལྡེའུ་བཙན་གྱི།  །

ཕྲིན་ལས་རྣམ་འཕྲུལ་ནོར་བུ་དགྲ་འདུལ་རྩལ།  །

སྲས་ཡུམ་བཙུན་མོ་བློན་འཁོར་བཅས་པ་དང་།  །

དགྲ་ལྷ་ཝེར་མའི་ཚོགས་བཅས་འདིར་གཤེགས་ལ།  །

གཏོར་མ་གསེར་སྐྱེམས་བསང་གི་མཆོད་པ་བཞེས།  །

སྨྱོ་བའི་འདྲེ་ཐུལ་སྡང་བའི་དགྲ་སྲོག་ཆོད།  །

ནག་ཕྱོགས་རྒྱ་འདྲེ་འབྱུང་པོའི་རྒྱུ་བ་ཆོད།  །

བདག་འཁོར་ཡོན་བདག་བྱམས་པའི་ཐུགས་ཀྱིས་སྐྱོངས།  །

རེ་སྨོན་མཐའ་རྒྱས་ཡིད་བཞིན་འགྲུབ་པ་དང་།  །

ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད།  །

ཅེས་པའང་ཆོས་ཀྱི་བློ་གྲོས་པས་སོ།།  །།