པདྨ་མཁའ་འགྲོའི་སྐོངས་བསྡུས་བདེ་ཆེན་དཔལ་སྟེར།
༄༅། །པདྨ་མཁའ་འགྲོའི་སྐོངས་བསྡུས་བདེ་ཆེན་དཔལ་སྟེར་ཅེས་བྱ་བ་བཞུགས་སོ། །
ན་མོ་གུ་རུ་པདྨ་ཌཱ་ཀི་ནི་ཡེ།
ཕྱི་ནང་གསང་བའི་བསྐངས་རྫས་ཅི་འབྱོར་བཤམས། །ནམ་མཁའ་མཛོད་ཀྱི་སྔགས་དང་ཕྱག་རྒྱས་བྱིན་གྱིས་བརླབ། །
ཧཱུྃ་ཧྲཱིཿབདེ་ཆེན་དབང་གི་དཀྱིལ་འཁོར་ནས། །
ཟླ་གམ་དམར་པོ་འོད་འབར་དབུས། །
དབང་མཛད་པདྨ་མཁའ་འགྲོ་ནི། །
རྡོ་རྗེ་རིན་ཆེན་པདྨ་དང་། །
ལས་ཀྱི་དབང་མཛད་ཌཱ་ཀིའི་ཚོགས། །
སྤྲུལ་པ་ཡང་སྤྲུལ་བྱེ་བ་འབུམ། །
འཁོར་དང་བཅས་པ་འདིར་གཤེགས་ནས། །
ཉི་ཟླ་པདྨའི་གདན་ལ་བཞུགས། །
དགྱེས་པའི་མཆོད་སྤྲིན་འབུལ་པ་ནི། །
སྲིད་དང་ཞི་བའི་ཡོ་བྱད་ཚོགས། །
ཇི་སྙེད་འབྱོར་པ་ཐམས་ཅད་ཀུན། །
ཀུན་ཏུ་བཟང་པོའི་མཆོད་སྤྲིན་དུ། །
ཟག་མེད་ཏིང་འཛིན་རོལ་མོས་སྤེལ། །
ཆོས་དབྱིངས་རྒྱས་པར་བཀང་བྱས་ཏེ། །
པདྨ་མཁའ་འགྲོའི་དཀྱིལ་འཁོར་པའི། །
རྡོ་རྗེའི་དབང་པོ་དྲུག་གིས་བཞེས། །
ཐུགས་དམ་གཉན་པོ་བསྐངས་བ་དང་། །
མ་ཚོགས་མཁའ་འགྲོར་ཉམས་ཆགས་བཤགས། །
བརྟན་གཡོ་སྣང་སེམས་དབང་དུ་འདུས། །
རྩ་རླུང་ཐིག་ལེའི་ནུས་པ་སྤེལ། །
ཡེ་ཤེས་དྷཱུ་ཏིའི་དབྱིངས་སུ་སྡུད། །
འཁོར་འདས་རྣམ་དག་བདེ་བ་ཆེ། །
དབང་མཛད་དབང་གི་དངོས་གྲུབ་བརྙེས། །
པདྨ་མཁའ་འགྲོའི་སྐུ་ཐོབ་ཤོག །
ཅེས་པའང་མེ་ཕག་ཟླ་དྲུག་ཚེས་བཅུ་དྲུག་ལའོ། །། །
