Prayer to Marpa, Consort & Heirs—Tibetan

༄༅། །རྗེ་མར་པ་ཡབ་ཡུམ་སྲས་བཅས་ཀྱི་གསོལ་འདེབས།

ཨེ་མ་ཧོ།

ངོ་མཚར་གྲུབ་པ་ཆེན་པོའི་སྐུ་བརྙེས་པ།    །

སྣང་སེམས་དབང་བསྒྱུར་ཆོས་ཀྱི་རྒྱལ་པོ་མཆོག  །

སྒྲ་བསྒྱུར་ལོ་ཙཱ་ཆེན་པོ་མར་པ་རྗེ།    །

བློ་གྲོས་ཆེན་པོ་བློ་མཆོག་མངའ་བའི་བདག  །

རྒྱུད་སྡེ་རྒྱ་མཚོའི་གསང་བའི་མཛོད་འཛིན་པ།    །

ཟུང་འཇུག་གྲུབ་པའི་འཁོར་ལོས་སྒྱུར་བ་ཆེ།    །

གང་གི་གསང་བ་གསུམ་གྱིས་བྱིན་བརླབས་སྲས།    །

བྱང་ཆུབ་སེམས་དཔའ་དཔའ་ཆེན་འགྲོ་བ་འདུལ།    །

དར་མ་མདོ་སྡེ་ཚོགས་གཉིས་རྨད་བྱུང་སྐུ།    །

ཡེ་ཤེས་རྒྱ་མཚོའི་རང་གཟུགས་སྤྱན་རས་གཟིགས།    །

གཞོན་ནུའི་སྐུར་སྟོན་སྨོན་ལམ་མཐའ་ཡས་བདག  །

རྡོ་རྗེ་བདག་མེད་མི་མོའི་གཟུགས་བསྒྱུར་བ།    །

ཤེས་རབ་ལྷ་མོ་བདེ་བའི་བདག་ཉིད་སྐུ།    །

འཁོར་འདས་ཆོས་ཀུན་དབྱིངས་ཀྱི་བྷ་གར་སྡུད།    །

དུས་གསུམ་རྒྱལ་བ་སྤྲོ་དང་སྡུད་མཛད་མ།    །

འཁོར་ལོ་སྡོམ་པའི་གྲུབ་རིག་ཡོངས་ཀྱི་གཙོ།    །

ལ་ལ་ནཱ་དང་རཱ་སའི་རྒྱུ་བ་ཀུན།    །

སྒྲ་གཅན་དབྱིངས་སུ་ཟ་བར་བྱེད་པའི་བདག  །

བཅུ་དྲུག་རྩེར་སོན་མི་སློབ་རྒྱལ་སར་གཤེགས།    །

མཚན་ཐོས་འཁོར་བའི་འཇིགས་ལས་སྐྱོབ་མཛད་ཅིང་།    །

བྱིན་རླབས་ཆེན་པོ་མངོན་སུམ་སྟེར་བའི་བདག  །

རྡོ་རྗེ་རྒྱལ་མཚན་ཐོས་པ་དགའ་ཞེས་གྲགས།    །

འཇིག་རྟེན་གསུམ་གྱི་རྒྱན་གྱུར་མི་ཡི་མཆོག  །

དེ་ལྟར་རྗེ་བཙུན་ཡབ་ཡུམ་སྲས་རྣམས་ལ།    །

གུས་པས་གསོལ་བཏབ་བདག་ལ་བྱིན་གྱིས་རློབས།    །

རང་སེམས་ལྷན་སྐྱེས་ཡེ་ཤེས་ཉི་མ་ཆེས།    །

སྙིང་གི་མ་རིག་མུན་པ་ཀུན་བསལ་ཞིང་།    །

སྲིད་གསུམ་དགྲ་སྡེའི་གྲོང་ཁྱེར་གཏན་བཅོམ་ནས།    །

འོག་མིན་ལྷུན་གྲུབ་གཞལ་མེད་ཉམས་དགའ་བར།    །

སྐུ་དང་ཡེ་ཤེས་འཛད་མེད་གཏེར་ལ་སྤྱོད།    །

ཁམས་གསུམ་འཁོར་བ་དོང་ནས་སྤྲུགས་པར་ཤོག  །

ཅེས་པའང་ལྷོ་བྲག་མར་པ་ཡབ་སྲས་ཀྱི་གཞལ་མེད་ཁང་གི་ཉེ་འདབས་སུ་ཆོས་ཀྱི་བློ་གྲོས་པས་གསོལ་བ་བཏབ་པ་སིདྡྷི་རསྟུ།།    །།