Aspiration to Safeguard Happiness in Tibet—Tibetan

༄༅། །བོད་ཁམས་བདེ་བར་སྐྱོབས་པའི་འདོད་དོན་ཞུ་བའི་སྨོན་ལམ་བསམ་དོན་ཀུན་འགྲུབ་ཅེས་བྱ་བ་བཞུགས་སོ།  །

ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།

ཕྱོགས་བཅུ་དུས་གསུམ་རྒྱལ་བ་སྲས་བཅས་དང་།  །

ཁྱད་པར་སྟོན་པ་མཉམ་མེད་ཤཱཀྱའི་རྒྱལ།

ཉེ་སྲས་བརྒྱད་དང་གཏད་རབས་གནས་བརྟན་དང་།  །

འཛམ་གླིང་རྒྱན་དྲུག་རྨད་བྱུང་སློབ་དཔོན་ཆེ།  །

རིག་འཛིན་རྣམ་བརྒྱད་གྲུབ་ཆེན་བརྒྱད་ཅུ་དང་།  །

ཀུན་འདུས་རིག་འཛིན་པདྨ་སཾ་བྷ་ཝ།  །

མཚན་མཆོག་བརྒྱད་དང་འཕྲུལ་ཚན་བཞི་བཅུ་དང་།  །

ཌཱ་ཀི་རྣམ་གཉིས་རྗེ་འབངས་ཉི་ཤུ་ལྔ།  །

ཐུབ་དབང་གཉིས་པ་ཞི་འཚོ་ཨ་ཏི་ཤ།

གསར་རྙིང་མཁས་གྲུབ་རིག་པ་འཛིན་རྣམས་དང་།  །

སྤྲུལ་པའི་གཏེར་སྟོན་བརྒྱ་རྩ་ལ་སོགས་པ།  །

རིག་འཛིན་བླ་མ་བྱེ་བ་ས་ཡ་དང་།  །

རྒྱུད་སྡེ་བཞི་དང་ཁྱད་པར་སྒྲུབ་སྡེ་བརྒྱད།  །

དཔལ་ཆེན་བཀའ་འདུས་བླ་མ་དགོངས་པ་འདུས།  །

མདོ་དང་སྒྱུ་འཕྲུལ་དུས་ཀྱི་འཁོར་ལོ་སོགས།  །

ཞི་དང་ཁྲོ་བོའི་དཀྱིལ་འཁོར་བསམ་ཡས་དང་།  །

རྗེ་བཙུན་སྒྲོལ་མ་མྱུར་མ་དཔའ་མོའི་ཞབས།  །

ཕག་མོ་སེང་གདོང་གནས་གསུམ་དཔའ་བོ་དང་།  །

རྣལ་འབྱོར་མ་དཔལ་བྱེ་བ་འབུམ་ཕྲག་ཚོགས།  །

མགོན་ཆེན་སྡེ་ལྔ་མ་ནིང་ཞིང་སྐྱོངས་དང་།  །

སྔགས་སྲུང་ཁྱབ་འཇུག་དམ་ཅན་རྡོ་རྗེ་ལེགས།  །

དྲེགས་པའི་སྡེ་དཔོན་སུམ་ཅུ་ལ་སོགས་པ།  །

རྒྱུད་གསུམ་དམ་ཅན་དྲེགས་ཚོགས་འཁོར་བཅས་དང་།  །

གཙང་རིས་མགོན་པོ་བདུན་ཅུ་རྩ་ལྔ་མཆེད།  །

རྣམ་སྲས་ཛཾ་ལྷ་ནོར་ལྷ་རྒྱ་མཚོ་དང་།  །

ཚེ་རིང་མཆེད་ལྔ་བརྟན་མ་འགུལ་ལྷ་སོགས།  །

བསྟན་ལ་དགའ་བའི་དཀར་ཕྱོགས་སྐྱོངས་རྣམས་དང་།  །

གནས་དང་གཏེར་གྱི་བདག་པོ་ཆེ་རྣམས་སོགས།  །

མདོར་ན་རྩ་གསུམ་རབ་འབྱམས་ཐུགས་རྗེ་དང་།  །

བྱིན་རླབས་མཐུ་སྟོབས་བདེན་པའི་རྩལ་སྤྲུགས་ཏེ།  །

སྙིགས་མ་ལྔ་བདོའི་མཐའ་ལ་ཐུག་པ་ཡི།  །

བསྟན་དང་འགྲོ་བའི་བདེ་སྐྱིད་ཉི་མྱུར་ཙམ།  །

བསྟན་འཛིན་སྐྱེས་དང་བསྟན་པའི་སྦྱིན་བདག་རྣམས།  །

དམངས་སུ་འབེབས་ཤིང་མངའ་ཐང་འཕྲོག་པ་དང་།  །

ཆོས་འཁོར་གཉེན་པོ་འཇིག་ལ་ཉེ་བས་ན།  །

ཁྱེད་རྣམས་ཐུགས་བསྐྱེད་ནུས་པ་ཟད་དམ་ཅི།  །

བདག་ཅག་ཉིན་མཚན་གདུང་ཤུགས་དྲག་པོ་ཡིས།  །

དད་མོས་གསོལ་འདེབས་སྙན་གྱིས་མ་གསན་ནམ།  །

ད་ནི་ཐུགས་རྗེའི་དཔའ་མཚོན་རབ་བསྐྱེད་དེ།  །

ནག་ཕྱོགས་གདུག་པས་བཅོམ་པར་མ་གྱུར་གང་།  །

སྐྱོབས་པ་མཛོད་ཅིག་བཅོམ་ཟིན་ཅི་ཞིག་བྱེད།  །

དེས་ན་གསང་གསུམ་ཕྲིན་ལས་རྩལ་ཤུགས་ཀྱི།  །

ནུས་མཐུ་བསྐལ་པའི་མེ་བཞིན་སྦར་དུ་གསོལ།  །

ཁྱད་པར་གུ་རུ་པདྨ་དྲག་པོ་ཡིས།  །

སྦས་གནས་གངས་བྲག་རི་གླིང་ལ་སོགས་པས།  །

དུ་རུ་ཁ་ཡི་འཇིགས་ལས་སྐྱོབ་བོ་ཞེས།  །

ཞལ་བཞེས་དམ་བཅའ་བརྫུན་དུ་ཟད་དམ་ཅི།  །

སྔོན་སྨོན་ལྡན་པའི་སྐྱེས་བུ་བླ་མ་དང་།  །

ཌཱཀྐིའི་ལུང་བསྟན་འཁྲུལ་མེད་ཐེབས་པ་ཡི།  །

ད་ནི་མྱུར་དུ་གནས་ཡུལ་སྦས་པ་རྣམས།  །

དཀའ་བ་མེད་པར་འབྱེད་ནས་བསྟན་འཛིན་དང་།  །

དད་ལྡན་སྐྱེ་བོ་ཕོ་མོའི་དབུགས་དབྱུང་མཛོད།  །

དེ་ལས་འགལ་རྐྱེན་ཉེར་འཚེའི་རིགས་མཐའ་དག  །

བདུད་ལས་རྒྱལ་བའི་ཁྲོ་རྒྱལ་གྲོ་བོ་ལོད།  །

དྲན་པའི་མོད་ལས་ལྕགས་སྲེག་མེ་བཞིན་དུ།  །

ངང་གིས་ཞི་ནས་བསམ་པའི་དོན་ཀུན་འགྲུབ།  །

གུ་རུ་པད་འབྱུང་ཁྱེད་ཀྱིས་ལམ་སྣ་དྲོངས།  །

ཆོས་སྐྱོང་སྲུང་མ་རྣམས་ཀྱིས་རྒྱབ་ནས་སྐྱོབས།  །

དཀར་ཕྱོགས་སྐྱོང་བ་རྣམས་ཀྱིས་གྲོགས་མཛོད་ཅིག  །

བདུད་ལས་རྣམ་པར་རྒྱལ་བའི་དཔལ་ཐོབ་ཅིང་།  །

ཚེ་བསོད་འདོད་རྒུའི་འབྱོར་པ་རྒྱས་པ་དང་།  །

ལུང་དང་མངོན་པར་རྟོགས་པའི་ཡོན་ཏན་རྣམས།  །

དཀར་པོའི་ཕྱོགས་བཞིན་གོང་ནས་གོང་འཕེལ་ཤོག  །

སྣོད་བཅུད་རྟེན་འབྲེལ་ཉེས་པའི་ཚོགས་ཀུན་ཞི།  །

ཕྱི་ནང་གསང་བའི་རྟེན་འབྲེལ་ཤུགས་འབྱུང་འགྲུབ།  །

ཉེས་ཚོགས་ལྟར་སྣང་དགེ་ཞིང་ཤིས་པར་གྱུར།  །

རྟེན་འབྲེལ་ཕུན་སུམ་ཚོགས་པའི་བཀྲ་ཤིས་ཤོག  །

ཇི་ལྟར་སྨོན་པ་འདི་བཞིན་འགྲུབ་པ་ལ།  །

དཀོན་མཆོག་རྩ་གསུམ་རྒྱ་མཚོས་བྱིན་གྱིས་རློབས།  །

ཆོས་ཉིད་རང་བཞིན་རྣམ་པར་དག་པ་དང་།  །

ཆོས་ཅན་རྒྱུ་འབྲས་རྟེན་འབྲེལ་བསླུ་མེད་ཀྱིས།  །

བདེན་པའི་སྟོབས་ཀྱིས་དབང་དུ་འབྱོར་པ་དང་།  །

ཀུན་མཁྱེན་རྒྱལ་བའི་བསྟན་པ་དར་རྒྱས་ཤོག  །

ཅེས་པའང་རབ་ཚེས་ཤིང་ལུག་ལོའི་བོད་ཟླ་ལྔ་པའི་ཚེས་བཅོ་ལྔ་ཉིན་རྫོང་གསར་བཀྲ་ཤིས་ལྷ་རྩེའི་ཆོས་གྲྭ་ནས་འཇམ་དབྱངས་ཆོས་ཀྱི་བློ་གྲོས་པས་སྤེལ།  སརྦ་མངྒ་ལཾ།།   །།