Sejo Monastery Notice—Tibetan

༄༅། །རྫ་ཁོག་སེ་འཇོ་དགོན་གྱི་བསླང་ཡིག

རྒྱལ་བསྟན་རིན་པོ་ཆེར་གུས་པས་མཆོད་ཅིང་ཆོས་བཞིན་སྐྱོངས་པའི་རྒྱལ་པོ་བློན་པོ་ཁྱིམ་བདག །འབང་མི་སེར་བཅས་མདོ་ཁམས་སྟོད་སྨད་ཀྱི་ས་ཡི་ཆར་འཁོད་པ་ཐམས་ཅད་ལ་ཞུ་རྒྱུ། རྫ་ཁོག་སེ་འཇོ་དགོན་ཞེས་དཔལ་ལྡན་ས་སྐྱ་པའི་རིང་ལུགས་འཛིན་པའི་ཆོས་སྡེ་འདིར་བསྟན་འཛིན་སྐྱེས་ཆེན་རྣམས་ཀྱིས་བརྟགས་བབ། ཆོས་སྐྱོངས་གུར་གྱི་མགོན་པོ་ལྷ་བརྒྱད་ཀྱི་དམར་ཆེན་གཏོར་བཟློག་སྤྲོས་བཅས་ཞིག་ཚུགས་པ་བསྟན་འགྲོ་རིས་མེད་པ་ལ་ཕན་ཐོགས་ཆེ་རྒྱུར་གསུང་ཕེབས་དགོན་པ་དངོས་རྫས་དམན་པས་སློངས་མོ་ཞུ་མཁན་སོང་བ་འདི་རྣམས་ལ་དངོས་པོའི་འབྲེལ་འཇོག་རེ་འབུལ་མཛད་གྲུབ་དང་། དུས་མཆོད་ཐེབས་རྩར་སྨིན་ངེས་འདུག་པས་དེ་བཞིན་དགོངས་གཞུགས་འཚལ། སྡེ་དགེ་རྫོང་གསར་དགོན་ནས་མཁྱེན་བརྩེ་སྤྲུལ་སྐུས་ཤིང་བྱ་ཟླ་ ༦ ཚེས་ ༢༧ ལ་སྤེལ།། །།